Во време додека Зоран Заев е премиер, фирмите на семејството Заеви енормно се шират, посочи портпаролот на ВМРО-ДПМНЕ, Наум Стоилковски.

„Бизнис во Струмица велат не е можен, а можеби и во цела Македонија, ако фирмите на Заеви во тоа немаат интерес“, порача Стоилковски кој кажа дека сега се турка закон со кој што најголема заработка ќе има нарко- бизнисот, односно, како што рече, плантажите на Заеви за марихуана.

Според портпаролот на опозициската партија, компаниите на Заеви, триесетина на број, прават годишен обрт од 56 милиони евра во време кога Заев е премиер.

„Заев е должен да објасни колкава е разликата во обртот на бизнисите, обртот на пари сега и пред да стане премиер? Колкукратно е зголемен обртот на пари? Заев мора да објасни колку од семејните фирми, но и фирмите кои соработуваат со нив, добивале државна помош и колку изнесува таа помош? Колку тендери добиле и на колку тендери учествувале фирмите соработнички на заевите компании“, јавно запраша Стоилковски и додаде дека актуелниот премиер е пример за можна корупција, за политичко влијание и за моќ во бизнис релациите.

Портпаролот на ВМРО-ДПМНЕ нагласи дека сите политичари кои вршат јавни функции, мора суштински да се оттргнат од компаниите каде се или биле дел, бидејќи во спротивно отвораат оправдана перцепција за корупција и насочување на државната економија кон лични цели.

На вчерашната лидерска средба ВМРО-ДПМНЕ и Христијан Мицкоски се уплашија од брзи избори, истакна портпаролот на СДСМ, Костадин Костадинов.

Според него, тоа што Мицкоски не прифатил избори во декември кажува дека тој се плаши од граѓаните и знае дека го чека нов пораз.

„Јасно е дека СДСМ и коалицијата што ја предводи се фаворити на изборите на 12 април. Во изминатите две години ВМРО-ДПМНЕ и Христијан Мицкоски беа единствените што работеа против реформите, против напредокот, против интеграцијата во ЕУ и НАТО“, нагласи партискиот портпарол додавајќи дека единствените кои се радувале на историската грешка на Самитот во Брисел биле Мицкоски и неговата партија.

Костадинов кажа дека СДСМ е постојано на терен заедно со граѓаните со кои, како што рече, на 12 април ќе го потврдат правиот пат.

„Тоа е патот на повисоки плати, на огромна социјална помош, патот на бескомпромисна и неселективна борба со корупцијата, патот на враќањето пари назад кон граѓаните“, порача портпаролот и додаде дека граѓаните нема да дозволат Мицкоски и ВМРО-ДПМНЕ да ги вратат во темното минато.

По оставката на Зоран Заев, која ќе ја поденесе на 3 јануари, никогаш повеќе нема да дозволиме да ни се случи ваков арамилук, криминал, корупција и неправда на државата, порача на прес-конференција генералниот секратар на ВМРО-ДПМНЕ, Игор Јанушев.

Тој нагласи дека во очите на Заев му се гледа дека е дојден крајот на неговата неславна политичка кариера.

„Зоран Заев заминува во историјата, а со него заминуваат и сите криминогени навики на Заеви, на Шеќеринска, Анѓушев, Спасовски, Кирацовски, Ременски и останатите. Заев е човек кој ја ограби Република Македонија, кој безмилосно ги лажеше граѓаните. Никој повеќе не му верува и затоа тоне дури и на сопствените анкети што ги прави“, истакна Јанушев нагласувајќи дека актуелниот премиер е најнепопуларниот политичар меѓу граѓаните.

Тој порача дека на изборите на 12 април ВМРО-ДПМНЕ и Коалицијата заедно со граѓаните ќе го зададат последниот удар на, како што кажа, криминално рекетарската банда на власт.

„Нè чека сите заедно многу работа и многу посветеност, за да ја вратиме државата на вистински колосек и да го постигнеме сето она што е изгубено изминатиот период. Република Македонија ќе ја направиме економски силна држава, правната држава мора да завладее и секој којшто се огрешил пред законот и направил криминал да одговара за истиот“, истакна Јанушев и додаде дека ВМРО-ДПМНЕ има вистински тим од стручни, чесни и посветени луѓе со визија, програма и план.