СДСМ и Филипче ја потценуваат интелигенцијата на пациентите и медицинскиот персонал, но и сите граѓани кои гледаат дека оваа власт го урнисува здравството и од него создава алатка за терање бизнис, се вели во реакцијата на ВМРО-ДПМНЕ на прес-конференцијата на Венко Филипче.

,,Да потсетиме само на крвавиот тендер за набавка на реагенси вреден 35 милиони евра кој го доби фирма основана непосредно пред распишувањето, сомнителниот бизнис од 14 милиони евра за стерилизација, приватизирањето на службата за брза помош, сомнителните јавни приватни партнерства, набавките на лекови на скопската клиника каде што ќерката набавуваше од веледрогеријата на таткото и на крајот мега скандалот со криминогениот проект изградба на нов Клинички центар за кој нема јасни критериуми, проектна документација и слично, но затоа има 500 милионски кредит во најава.

За неуспесите во здравството на оваа власт доволно говорат епидемијата со морбили, скандалите со вакцините и десетиците смртни случаи кои ја брануваа јавноста, а кои се должеа на недостаток на лекови или несоодветно лекување.Политиките во здравството се насочени или кон приватизација или кон затворање на цели одделенија и здравствени домови ширум државата. Тоа е целосно спротивно на лагите кои ги кажуваа за време на изборите дека ќе овозможат бесплатно и квалитетно јавно здравство.Граѓаните ценат и казната за неодговорното работење и во сферата на здравството ќе ги стаса СДСМ на следните избори”, се вели во реакцијата.

Младите се за НАТО и ЕУ, сигурна иднина и отворени можности, а она што го гледаме е дека ВМРО-ДПМНЕ и Христијан Мицкоски работат против интеграција во ЕУ и НАТО, истакна Александар Димитриевиќ од социјал-демократската младина (СДММ).

„Мицкоски сака да ги врати младите назад во темното минато, кога тие беа без шанса и изолирани од светот. Мицкоски не сака младите од нашата држава да ги имаат истите услови како нивните врсници од ЕУ“, порача Димитриевиќ кој нагласи дека заради спас на белиот дворец, ВМРО-ДПМНЕ е подготвена да ја жртвува иднината на младите луѓе во државава.

Сепак, додаде тој, младите како прогресивна сила тоа нема да го двозволат и незапирливо продолжуваат кон европска интеграција.

Партијата Демократска обнова на Македонија (ДОМ) остро го осудува продолжувањето на градежни активности на нелегалниот објект на кој при интервенцијата на општинската градежна инспекција беа уапсени градежни работници.

Од оваа партија бараат од локалните власти да се санкционираат прекршителите на законите и мораториумот за градба изгласан од Советите на општините Охрид и Струга и веднаш да се започне со најавената акција за отстранување на нелегалните градби.

„Граѓаните со нетрпение очекуваат да се спроведат препораките на УНЕСКО и да се обезбеди зачувување на нашето единствено светско природно и културно наследство. За крајот на овој месец, веќе е најавена и мисија на експерти на УНЕСКО“, се наведува во партиското соопштение.

Во него се додава дека дрското непочитување на законите од страна на поединци фрла сенка на сите претходни вложени напори направени во поглед на заштита и зачувување на природното и културното наследство во Охридскиот регион.