Законите важат за сите подеднакво, без разлика за кое име и презиме станува збор, а тоа е потврдено и со случајот којшто го споменува ВМРО-ДПМНЕ, регираат од СДСМ, откако од опозициската партија обвинија дека во случајот „Лабораторија“ во Визбегово наводно е вмешан и братот на шефот на кабинетот на премиерот Ковачевски.

„Фактите се дека има судска пресуда за овој случај, потврдена и од Апелацискиот суд. Споменатите лица се осудени на затворска казна и ја имаат издржано казната“, се посочува во партиската реакција.

Од СДСМ, воедно додаваат дека денешниот извештај на „Транспаренси интернешнл“ потврдил оти законите важат за сите.

„Една од главните причини за напредокот од 24 места е тоа што земјата има преземено конкретни чекори за кривично гонење на високи функционери од власта“, нагласуваат од партијата.

Институциите, наместо да бидат во служба на СДСМ, да му поднесат кривична пријава на генералниот секретар на таа партија, Миле Зечевиќ, бараат од ВМРО-ДПМНЕ, од каде што обвинуваат дека тој бил позитивен на Ковид-19 и, како што велат, ширел зараза на настани во Охрид.

Од опозициската партија јавно повикуваат директорката на Државниот санитарен и здравствен инспекторат, доктор Ирина Бухова, како што велат, да се однесува како што ѝ прилега на позицијата што ја држи и да го покаже резултатот од тестирањето на Зечевиќ.

„Зечевиќ е позитивен и тој на Водици во Охрид ширел корона. Зечевиќ е неодговорен исто како и Зоран Заев и цел СДСМ, кои се виновни за 8.000 починати и за барање провизии од вакцини“, се наведува во партиската реакција.

Претходно, директорката на Државниот санитарен и здравствен инспекторат изјави дека Зечевиќ не е во системот на тестирани лица од 19 јануари.

Според опозициската партија, тој официјално бил позитивен на корона од 20 јануари, што би значело дека требало да се тестира на 19 јануари за да добие позитивен тест ден подоцна.

Од друга страна, од ВМРО-ДПМНЕ сметаат дека Бухова дава политички изјави и се става во позиција на портпарол на СДСМ.

Секогаш кога ВМРО-ДПМНЕ се фатени како не ги почитуваат законите и здравствените протоколи, партијата се дозакопува со нови невистини.

Не е точно дека генералниот секретар Миле Зечевиќ бил позитивен на празникот Водици, ниту, пак, дека со симптоми учествувал на настаните тој ден. Тоа е целосна невистина од кујната на очајната ВМРО-ДПМНЕ, се вели во соопштението од СДСМ.

Ограмна е разликата помеѓу Миле Зечевиќ и неодговорноста на Кирил Пецаков.

Од СДСМ наведуваат дека Кирил Пецаков додека чекал резултати за Ковид-19, спротивно на протоколите, беше помеѓу граѓаните на одбележувањето на празникот Водици, наместо да биде во изолација и затоа Пецаков треба да понесе одговорност.