Од Единствена Македонија велат дека по вчерашната посета во Софија излегла информацијата дека Зоран Заев понудил нов конкретен предлог до Бугарија за решавање на т.н. бугарско-македонски спор.

„Јавноста е сведок дека Заев досега со секоја своја изјава, со секоја своја посета на Софија се повеќе ги распродава македонските национални интереси. Засега останува тајна содржината на новиот предлог на Заев за кој се зборува по вчерашната посета на Софија, но, го потсетуваме Заев да ја прекине опасната авантура за подарување на македоснкиот идентитет, историја, јазик и култура на Бугарија, бидејќи нема мандат за распродажба на националните интереси“, велат од партијата.

Од таму велат дека прашањето за Македонија и Македонците не е прашање на една партија, на една влада.

„Единствена Македонија го повикува Заев да го покаже новиот антимакедонски предлог што вчера го дал до Софија. Новата народна власт која доаѓа ќе ги поништи антимакедонските договори, одговорност за рушење на Македонија и Македонците мора да има, и ќе има“, велат од Единствена Македонија.

Заев повторно на маса вчера става отворање на Уставот и ветува работи за кои нема согласност, велат од ВМРО-ДПМНЕ.

Воедно, додаваат од таму, беше соопштено дека Заев дал предлог до бугарската влада.

„Јавноста има право да знае каков предлог и каков подарок овој пат Заев нуди на официјална Софија. Нели се преговараше само португалскиот предлог“, прашуваат од ВМРО-ДПМНЕ.

Зоран Заев, додаваат од таму, со секоја нова изјава продава сѐ повеќе и повеќе, позициите на државата со Заев се трајно разнишани.

„Дали предлогот на Заев содржи работи со кои ги продава и идентитетот и историјата. Заев преку неговите изјави трајно го минира позициите на Македонија. Останува отворено кои се 5. историски личности за кои има согласност меѓу историските личности за кои Заев говори. Заев создава поделби во Македонија. Со Заев Македонија губи. Потребно е Заев да си оди, за Македонија да биде за сите луѓе“, велат од ВМРО-ДПМНЕ.

Партијата Алијансата за Албанците денеска изрази жалење што дури и по три години, како што велат, главната цел на договорот од Преспа сè уште не е постигнат.

„Нашата земја е сè уште далеку од отворање разговори со ЕУ иако за три години Владата ги излажа граѓаните најмалку три пати. Духот на преспанскиот договор исто така требаше да се рефлектира и во односите со сите соседни земји, подобрувањето на комуникацијата, решавањето на споровите, унапредувањето на билатералните и регионалните односи, спроведувањето на заедничките развојни проекти и интеграцијата на регионот во Европската Унија“, се наведува во партиското соопштение.

Од партијата на Зијадин Села сметаат дека власта не покажала оти интересот на земјата и граѓаните го става над партискиот.

„Стагнација на реформи, криминал и корупција, партизација на правдата, етничка и политичка дискриминација, се само дел од дамките што ги загрозуваат самиот договор од Преспа и иднината на земјата, како што се очекуваше пред три години“, велат од Алијансата за Албанците.