Во Охрид, по дожд, улиците се како да имало елементарна непогода, обвинуваат од партијата Граѓанско-демократска унија (ГДУ).

„Сликата е хаотична, фекалии на сите страни и на крајот, најголемиот дел од нив завршува во езерото. Фекалната канализација е голем проблем, кој се влече со години и постојано се даваат солуции (за време на избори), а реалноста е дека нема никаква промена, дури и се даваат заклучоци дека нема излез“, се наведува во партиското соопштение.

Во него исто така се бара општинските власти да одговорат зашто барале гласови од граѓаните доколку немаат решение за проблемите.

„Живот дојде само за партиските војници кои се насадени насекаде“, велат од ГДУ.

„Проблемот со фекалната канализација останува, со кучињата скитници останува, проблемот со депонијата останува, всушност, само ДПМНЕ замина, а СДСМ дојде и како и во минатото, така и сега, се случи само мала промена на фотелјите“, истакнуваат од оваа партија, од каде што додаваат дека изборните програми веќе нема ни потреба да се менуваат зашто најголемите партии имаат исти ветувања повеќе од 20 години.

Портпаролот на ВМРО-ДПМНЕ, Наум Стоилковски, познат по шовинистички статуси и денеска продолжува да шири лажни вести и невистини, велат од СДСМ како реакција на прес-конференцијата на која тој рече дека три месеци повикува да се расчисти случајот во врска со тендерот на владиниот генерален секретар, Драги Рашковски, а обвинителката Русковска одговара само со содржински празни соопштенија.

„Дали на Стоилковски му пречи обвинителката Русковска затоа што е жена“, прашуваат од владејачката партија.

„Наместо да рециклира стари и веќе демантирани лаги, Стоилковски треба да го повика Мицкоски да одговори дали Орце Камчев, тајкун на режимот и обвинет во предмети на СЈО, преку негови фирми, бил финансиер на изборна кампања на ВМРО-ДПМНЕ“, се наведува во партиската реакција.

Истрагата во случајот „Рекет“ е фарса, која има цел да го одвлече вниманието на јавноста од Зоран Заев и врвот на власта, без кој милионскиот рекет и воопшто не би бил можен. Случајот е пријавен уште во април по што требаше да се случи медиумски притисок за власта да се реши да жртвува две пипки од октопот, Боки 13 и Зоки Кичеец, само со цел заштита на Јанева и Заев, соопшти ВМРО-ДПМНЕ.

Според партијата, на Јанева смислено ѝ беше оставен 1 месец по апсењето на Боки 13 и Зоки Кичеец за да има доволно време да скрива докази и да влијае врз сведоци и истрагата како би се уништиле трагите што водат кон неа и кон главата на октоподот – Зоран Заев.

„По еден месец откако Јанева е во притвор, истрагатa тапка во место. Нови приведени нема. Има само најави од Владата за формирање тим и наводна акција на УЈП со задоцнување од три месеци. Што е тоа што Русковска и Заев не сакаат граѓаните да го дознаат? Дали се работи за тоа каде завршувале парите и за што тие биле трошени!? Дали се крие дека можеби парите завршиле на Илинденска и со нив е финансирана кампањата на Стево Пендаровски!?
ЈО со ваквиот начин на работа само дополнително се компромитира. Граѓаните очекуваат ефективна и ефикасна истрага. Импровизации на сметка на правната држава не смее да има. Никој, па ни Заев не смее да биде поштеден. За нормално функционирање на државата, потребен е пад на оваа власт. Потребни се предвремени парламентарни избори што побргу“, се додава во соопштението.