Нашата земја, во услови на новата нормалност, има потреба од избори во првиот можен термин, организирани во согласност со здравствените протоколи пропишани од надлежните институции, велат од СДСМ.

Според оваа партија, ваквиот чекор е нужен, за да може земјата подготвена да го дочека септември и најавениот нов бран на коронавирусот.

„Борбата со вирусот треба да ја продолжиме преку целосно почитување на мерките за заштита на здравјето. Носењето заштитна маска или марама на лицето, одржувањето физичка дистанца и зголемена лична хигиена се дел од нашето ново секојдневие. Строгото почитување на овие основни мерки за заштита се наш заеднички влог за новата нормалност и заштита на здравјето на луѓето“, се наведува во соопштението.

Според СДСМ, политичкиот систем, кој сега е во крајно комплицирана состојба исто така ќе функционира во рамките на оваа нормалност.

„На граѓаните, на државата, им се неопходни законодавна и извршна власт, ново Собрание и политичка Влада со полн капацитет и целосен, нов легитимитет“, велат од партијата во одонс на одржувањето на изборите.

Здравствените власти предводени од Венко Филипче се тотално изгубени среде епидемијата со коронавирусот, обвинуваат од ВМРО-ДПМНЕ.

Од оваа партија предупредуваат дека Македонија бележи нови црни биланси во однос на заразата.

„Во последното деноноќие се евидентирани 25 нови заболени и тројца починати. Со овие нови случаи бројот на вкупно заразени се искачи на 2.039, а на починати достигна 113 лица. Македонија е црн рекордер во регионот. Македонија е на врвот по починати на милион жители и заразени на милион жители, a е на дното по извршени тестирања“, стои во соопштението.

Во него се нагласува дека на СДСМ не им е битно здравјето на граѓаните, туку битно им е како да го спасат Заев од дебакл на изборите.

„Поразот им е неминовен и тоа самите го знаат. Сега се обидуваат само како да го ублажат“, велат од ВМРО-ДПМНЕ.

ВМРО-ДПМНЕ ја обвини Владата поради олабавувањето на мерките зашто, како што велат од партијата, бројот на новозаболени од коронавирусот е сè уште голем.

„На 14 април биле дијагностицирани 26 заболени од Ковид-19. На Велигден 37 новозаболени, а само пред два дена беа дијагностицирани 40 инфицирани. Пред еден месец, за Велигден, Заев, Филипче и Владата го прогласија најдолгиот четиридневен карантин, а сега со истите бројки ги укинуваат сите мерки и препорачуваат избори.

Здравствените мерки на Филипче и власта на СДСМ доживуваат фијаско.

Македонија и понатаму е единствената земја во регионот каде што корона-епидемијата, наместо да се намалува, сè уште бележи црни биланси. Во последното деноноќие во Македонија има 16 новозаболени и тројца починати од коронавирусот.

Состојбата е далеку од нормализирана. Филипче, Заев и СДСМ сакаат да организираат брзи избори, само за да го ублажат поразот, иако секој ден наши граѓани се разболуваат и умираат од коронавирусот. Ним им е битно само да ја зачуваат политичката кариера, а не здравјето и животите на граѓаните.

Поради тоа што приоритет им е политиката, а не здравството, Македонија е рекордер во регионот по смртни случаи на милион жители. Поради нивната неодговорност и политиканство, Македонија е во врвот по бројот на заболени на милион жители. Поради тоа што не сакаат јавноста да ја дознае катастрофалната епидемиолошка слика, Македонија е на дното по спроведени тестирања.
Македонија првин мора да ја порази корона-епидемијата, а потоа ќе ја порази епидемијата од неодговорност и неспособност на Зоран Заев и неговата власт.

ВМРО-ДПМНЕ е поинаква од СДСМ. Со СДСМ и Заев, добивме хибриден режим, неспособност, криминал и сиромаштија“, се додава во партиското соопштение.