Политичката партија Единствена Македонија преку соопштение порача дека е згрозена од информацијата оти 20-дневно лекување од коронавирусот во приватните болници изнесува 12.000 евра.

Единствена Македонија ја повикува владата да изврши целосна национализација на приватните болници, хотели, возниот парк и други соодветни објеки, оценувајќи дека такво нешто е потребно во ова тешко време со здравствена катастрофа.

„Ова е крајно морална и правична мерка, бидејќи, општо познато е како се збогатија македонските газди на болници и хотели со тендери и привилегии од сите власти во изминатите 30 години, а посебно транзициските бандити во криминалната и нечесната приватизација и постприватизација со грабеж на народниот имот кој 50 години го создаваа сите работни луѓе во социјализмот. Сега е моментот македонските газди да се одолжат на државата и народот со ставање на приватни болници, хотели, возниот парк и други соодвети објекти, бесплатно и без никаков надомест во функција на заштита на здравјето на народот. На тој начин и македонските тајкуни на конкретен начин ќе покажат дека се на страната на народот“, велат од Единствена Македонија.

Како што се додава во соопштението, Единствена Македонија очекува од Владата прифаќање на оваа мерка.

ВМРО-ДПМНЕ е симбол за фалсификувани патни исправи, а Хритијан Мицкоски не отстапува од одбрана на криминалот, велат од СДСМ преку соопштение.

„Расте нервозата кај Христијан Мицкоски и ВМРО-ДПМНЕ откако не успеаја преку пласирање на чувствителни информации да саботираат сложена полициска акција против група која незаконски издавала патни исправи. Не е првпат ВМРО-ДПМНЕ да биде вмешана во скандали со патни исправи.

Зад нив е скандалот со гласачите од Пустец на локалните избори во Општина Центар во 2013 година, кои преку документи издадени од МВР беа впишувани повеќе од 100 лица на една иста адреса, во обид да се фалсификува волјата на граѓаните.

Во 2017, двајца истакнати кадри на ВМРО-ДПМНЕ, кои беа на високи позиции во УБК за време на режимот, со македонски пасоши со лажни идентитети преминаа во соседна Грција, за да избегнат кривичен прогон за сериозни кривични дела.

Денес, партијата предводена од Мицкоски откако не успеа да ја саботира акцијата, се обидува да ја префрли одговорноста на институциите кои ја спроведуваат акцијата и постапуваат согласно законите.

Како што објави и самото МВР, истрагата за пасошите се води подолг период бидејќи се преземаат дејствија кои имаат и меѓународни импликации.

Сето ова Мицкоски и ВМРО-ДПМНЕ се обидоа да го загрозат и со тоа потврдија дека остануваат на браникот на криминалот.

Ваквото нивно однесување повлекува и истрага за утврдување на одговорност.

Без разлика колку и тоа е да е неприфатливо за Мицкоски и ВМРО-ДПМНЕ, Владата предводена од СДСМ, институциите, продолжуваат со бескомпромисна борба против корупцијата и криминалот на секое ниво.

Секој кој сторил кривично дело ќе одговара и ниту Мицкоски ниту ВМРО-ДПМНЕ ќе можат да го заштитат“, се наведува во соопштението на СДСМ.

Заеви станаа и нарко картел, да одговорат дали комбето фатено со дрога од 800 илјади евра е на семејството Заеви?, прашува опозициската ВМРО-ДПМНЕ.

„Заев да одговори дали е точно дека запленета е дрога од ДЕА во вредност од 800.000€ во бело комбе со грчки таблици, е во сопственост на фирма која е партнер во битолската фирма за канабис „Медикал 420”.

Пратечки возила на дрогата биле управувани од возачот на Трајче Заев (прв и најблизок братучед на премиерот Заев) и Кире ‘Чипсио’ Спиркоски кој е близок до СДСМ и Оливер Спасовски и е командир на ПС Прилеп. Дали е уапсен шоферот на Трајче Заев токму во оваа акција?

Дали во фирмата „Медикал 420” со чие возило се возела дрогата од блиските луѓе на Заеви, сопственички удел преку своја фирма имаат Трајче Заев и Бобан Заев?

Фирма со име „Медикал 420БГ лтд” од овие двајца беше отворена уште на 20.05.2019 година во Петрич.

Дали комбето во кое е фатена дрогата е во сопственост на фирма на картелот Заеви?“, се наведува во соопштението на ВМРО-ДПМНЕ.