Соопштенија
Официјална премиера: пристигнаа новите Škoda Scala и Kamiq
![](https://makfax.com.mk/wp-content/uploads/2024/03/2-2.jpg)
„Концептот Vision RS беше голем успех на Саемот за автомобили во Париз во 2018 година, така што кога работевме на фејслифтот се обидовме да останеме што е можно поблиску до овој концепт“, објаснува дизајнерот Далибор Пантичек, кој го предводеше тимот за надворешен дизајн. Scala сега изгледа поспортски и подинамичен, а Пантичек вели дека клиентите и љубителите на брендот ќе го забележат тоа на прв поглед. „Тоа е секогаш задача на вакво освежување на моделот, да му се даде нов карактер на автомобилот“, вели Пантишек. Тимот на Škoda Design го постигна тоа првенствено со модернизирање на надворешноста со голем број софистицирани детали.
Целокупната форма на автомобилот останува иста, но Scala доби редизајнирана решетка на ладилникот, предни и задни светла и браници. Степенот на овие измени навистина остава впечаток на сосема нов автомобил. Scala сега има потполно нов дизајн на дневните светла и графика на задните светла кои го прават автомобилот лесно препознатлив од далечина.
Спортски израз
Новата решетка на ладилникот сега има нова октагонална форма и е повертикална, нагласувајќи ја агилноста на моделот. Дизајнерите овде ја истакнале играта на светлина и сенка, па предните елементи на новата решетка се сјајни, додека останатите површини се мат. „Предницата е инспирирана од историските возила на Škoda, како што е популарното Monte Carlo, и јасно го сигнализира идентитетот и долгата историја на нашиот бренд“, вели Далибор Пантишек.
Динамичниот карактер е нагласен со целосно новите светла. Овие имаат помали пропорции и на тој начин изгледаат поспортски и модерно отколку во претходната верзија. Кај новата Scala, за прв пат во овој сегмент се користи нова LED Matrix технологија, со Full LED светла кои доаѓаат стандардно. LED елементите вклучуваат и светла за магла. Со цел да се задржи поставеноста на светлата пониско, променет е внатрешниот распоред на елементите на минимум, давајќи уникатен потпис на поделени дневни светла што исто така делуваат и како трепкачи. На овој начин, новата Scala лесно се разликува од кој било друг автомобил.
Промените на браникот повторно се поврзани со поспортски изглед, а светски познатиот чешки кристал е главен извор на инспирација за дизајнерите на Škoda. Браникот има прецизни, остри рабови и карактеристично обликување на отворите за воздух. Структурните елементи во решетката на ладилникот добија поизразено обликување во форма на дијамант кои фаќаат и рефлектираат светлина. Во дизајнот е инкорпорирана врвна функционалност на аеродинамика која резултира со намален воздушен отпор.
Врвни детали
Тркалата на автомобилот се исто така аеродинамични. Нивниот дизајн е преземен од концептот Vision RS. Достапни кај сите верзии, овие тркала повторно ја подобруваат аеродинамиката и ја намалуваат потрошувачката на гориво. Ова покажува дека дури и функционалниот дизајн може да биде привлечен.
Назад, веднаш се забележува новото лого на Škoda, а видливи се и промените на задните светла и браникот. Идејата е иста како и напред: светлата се потесни и подинамични, а браникот има поостри линии и нов, преработен дифузор. Паметниот дизајн на браникот значи дека автомобилите со и без влечна кука изгледаат исто – браникот не се разликува. Тоа е една од добро познатите Simply Clever дизајнерски карактеристики.
Внатрешноста на Scala е исто така обновена: автомобилот сега ќе биде достапен во три нивоа на опременост и вкупно шест опции за внатрешни детали. Дигитална инструмент табла (8 или 10,25 инчи) е стандардна, инфозабавниот систем на автомобилот може да има дисплеј од 8,25 или 9,2 инчи. Лесна за употреба контрола на климатизацијата со копчиња и ротациони контроли.
Клиентите, исто така, може да очекуваат широк спектар на опрема, вклучувајќи мноштво системи за помош и голем број опционални функции кои не се вообичаени во оваа класа. На пример, Scala може да има приспособлив Lane Assist, адаптивен темпомат или електрично отворање на вратата на багажниот простор со „виртуелна педала“. Под хаубата има модерни и економични TSI evo2 мотори.
Škoda Kamiq, омилениот теренец на чешкиот производител, доби значително освежување. Покрај новата технологија, претставен е и новиот, моќен дизајн кој го нагласува робусниот карактер на овој урбан теренец.
Модернизацијата поблиску го усогласува Kamiq со неговите поголеми браќа во семејството на SUV на Škoda. Со новата везија, вертикалната архитектура на Kamiq, заедно со неговите робусни браници, го нагласуваат самоуверениот SUV карактер на автомобилот. Двата браници се редизајнирани, а Kamiq добива впечатлива нова предна маска и нови светла. Предната решетка е повисока и поширока, што дава подоминантен целокупен изглед. Новите двојни вертикални перки се исто така важни за чистиот дизајн кој го доведува Kamiq поблиску до дизајнот на поголемите SUV модели од брендот.
Нови светла
Новите светла имаат нови пропорции. Kamiq сè уште го задржува двојниот вертикален распоред на светлата типичен за теренците на Škoda. Горниот дел со дневни светла сега е потесен, давајќи му врвно технолошки изглед. Овде е применета инспирацијата од популарниот чешки кристал, каде што елементите на дневните светла имаат форма на тродимензионални кристални камења и изгледаат како накит на автомобилот.
Предните светла на модернизираниот Kamiq добија нови пропорции, што го менува нивниот карактер. Опционално се достапни и Full LED Matrix светлата на кои се забележуваат интересни графички елементи во пирамидална структура, што повторно го нагласува впечатокот на кристал. Во исто време, вертикалната поставеност на светлата, заедно со повисоката положба на решетката, го истакнуваат изгледот на теренецот. Цврстите браници помагаат да се осигура дека фаровите, а со нив и сите функционални елементи, се подобро заштитени.
Во предниот дел, браникот има нова решетка што го следи изгледот на поголемите SUV модели од семејството Škoda, така што дизајнот е конзистентен. Големиот спојлер во долниот дел има три отвори, уште една типична карактеристика на теренците на Škoda. Главниот отвор за воздух е поделен хоризонтално со робусни потпори, кои визуелно додаваат чувство на стабилност на целината. Многу од овие детали, вклучувајќи ја секако и решетката на ладилникот, се со типична црна сјајна завршница кај моделите на Monte Carlo, додека кај стандардните верзии се користи комбинација од хромирани и мат сребрени елементи.
Ефективен заден дел
Задниот браник добива нов дифузор со пософистициран изглед. Просторот за кука за влечење е успешно интегриран во браникот на начин што го прави речиси невидлив на прв поглед. Непотребно е да се каже дека надградениот Kamiq има и нова палета на тркала.
Во својата внатрешност, новиот Škoda Kamiq става акцентот на еколошки материјали кои полесно се рециклираат и почесто доаѓаат од рециклирани суровини. Ергономијата е исто така фундаментално преработена. Клиентите ќе ја ценат контролата на климатизацијата со копчиња и ротациони контроли. Но, тоа не значи дека Kamiq пропушта модерни решенија. Напротив, тие сега се стандардни, дури и основниот модел има дигитална инструмент табла (8 инчи како стандард, 10,25 инчи како опција) или инфозабавен систем со екран на допир (8,25 инчи и 9,2 инчи како опција). Клиентите можат да избираат од три нивоа на опременост и вкупно шест дизајни на внатрешност.
Kamiq има економични 1.0 и 1.5 TSI мотори од генерацијата evo2 под хаубата и автомобилот може да биде опремен со навистина модерна технологија. Сега стандардно доаѓа со низа системи за помош при возење: Front Assist со детекција на пешаци, Lane Assist, препознавање сообраќајни знаци и Maneuver Assist. Дополнително, Kamiq може да биде опремен со Side Assist, адаптивен темпомат или адаптивен Lane Assist. Натстандардното решение може да се најде и зад работ на дарежливиот багажен простор: со петтата врата може опционално да се ракува електрично, во тој случај има и функција за виртуелна педала за лесно отворање со движење на ногата под браникот.
Продажбата на новите Scala и Kamiq веќе започна. За повеќе информации повелете во салонот на Škoda или посетете ја нашата web страница www.skoda.mk.
ПР текст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Соопштенија
Почна со реализација проектот „Малите алкалоидовци го истражуваат ‘Алкалоид’“
![](https://makfax.com.mk/wp-content/uploads/2024/07/nm-1.jpg)
„Алкалоид“ во својот развоен фокус ги има, пред сѐ, своите вработени и нивните семејства, а грижата за најмладите е клучен дел од алкалоидовата корпоративна култура. Во насока на зајакнување на чувството за припадност на колективот и кај најмладите членови, „Алкалоид“ ги отвори вратите од своите производствени погони во сегментот козметика за децата на тамошните вработени, со цел непосредно запознавање со компанијата во која нивните родители го поминуваат своето работно секојдневие.
Овој настан, кој им овозможи на малите истражувачи да ги посетат одделенијата за развој, производство и за пакување на производите од портфолиото на Becutan на локалитетот Лафома, во присуство на своите родители, претставува еден од повеќето планирани кои ќе се организираат во рамките на проектот Малите алкалоидовци го истражуваат „Алкалоид“. Ваквото зближување на малите алкалоидовци со компанијата преку еден интересен, проактивен пристап и преку наменски конципирана едукација, во согласност со нивната возраст, им отвори еден целосно нов свет за истражување, кон кој пристапија со неверојатна љубопитност и желба за осознавање.
Организираните посети на малите алкалоидовци ќе станат традиција, а се очекува компанијата да ја посетат повеќе од 1.000 деца на вработените, на возраст од 3 до 18 години.
Покрај едукативниот дел, во чии рамки децата имаа можност од прва рака да ја осознаат работната средина на своите родители, настанот беше збогатен и со забавни содржини за запознавање и за меѓусебно дружење низ спорт и игра во организирани активности.
Човечките ресурси остануваат во развојниот фокус на „Алкалоид“ како едно од највредните капитални добра на алкалоидовата берза на вредности.
ПР текст
Соопштенија
Јанушев: Хајката на СДС е неоснована, ги фаќа страв затоа што секојдневно како Генерален секретаријат откриваме нови злоупотреби и ќе треба да одговараат
![](https://makfax.com.mk/wp-content/uploads/2020/04/janusev-1.png)
„Со денови ги гледам оние трагикомични обиди на СДС и нивните докажани полтрони и сателити во политиката како отворено лажат и ме дискредитираат, како измислуваат и се прпелкаат. Толку изгледа бедно и мизерно нивното поведение што совршено го отсликува мочуриштето во кое се потопени, а во кое царува политиката на ниски страсти, ниски удари и безидејноста која дава одговор зошто и 180 илјади гласови кои ги освоија на последните избори, што е историски најслаб резултат на СДС, на наредните ќе биде недостижна граница затоа што ќе потонат уште подлабоко“, вели Игор Јанушев од ВМРО-ДПМНЕ откако денеска на прес-конференција Кузеска од СДСМ кажа дека Панче Тошковски и Игор Јанушев имаат станови во поклонетиот имот на Јанушев.
„Ве пуштав да се излизгате… прво да изнесе лаги еден сдсовски сателит и советник на криминалното СЈО, во исто време шарен револуционер и познат лажен патриот, па потоа да се надоврзе една пара партиска структура и на крај да излезе изворот на таквите дезинформации, партијата која ја води неврохирургот на Заеви или како што во СДС го викаат малиот на Зоки, Венко Филипче.
Па да ви одговорам по ред.
Прво, СДС вели дека имотот на анкетниот лист е енормно зголемен. Тоа не е вистина и е комплетна лага. Не само што не е зголемен, туку е и двојно помал доколку се направи споредба со тој од 2017та година.
Второ, не постои никакво подарено земјиште … има погрешно внесени податоци за што веќе е направена и корекција од моја страна. Истиот имот кој во моментов го поседувам, го поседував и во минатото и доколку било што беше проблематично владата на СДС&ДУИ имаше и повеќе од доволно време да постапува.
Трето, 7 години бандитите на ДУИ и СДС беа на власт. 7 години водеа политички процес и хајка врз мене и тоа за непостоечки случај за набавка на автобуси, и кога можеа за тоа да водат случај, што мислите колку пати ќе бев затворен доколку е вистина она што сега го говорат?
Да не заборавиме дека само до месец и половина, тие беа баграта која водеше процеси, која судеа луѓе, обвинуваа и прогласуваа за виновни. Ова се криците на истите тие бандите кои нема да не поколебаат во намерата Македонија да ја вратиме на народот.
А сега ќе ви кажам и зошто се исплашени. Затоа што меѓу другото како Генерален секретар на Владата, работејќи од 12 до 16 часа на ден, доаѓам до фрапантни сознанија. Ајде тоа што затекнавме празни канцеларии, без столчиња и услови за работа, туку ќе треба да одговарате и за милионите евра фрлени за софтвери кои не функционираат, за картички кои не работат, за машини за штампање на пластика и документи кои невообичаено се во посед на ГС, за набавка на клима уреди кои се несоодветни за тоа што е потребно, но важно критериумот набавувачот да е од Струмица е задоволен и ред други работи.
Паразити кои ја оставија Владата со затворен главен влез затоа што 2 години не ги сервисирале скенерите и полесно им било да го затворат влезот.
Останете така. ОЈО има работа. А, вие продолжете да измислувате и да се давите во барата“, вели Јанушев.
Соопштенија
Левица: Клиничките центри остануваат руинирани, ребалансот предвидува тројно намален буџет
![](https://makfax.com.mk/wp-content/uploads/2018/12/untitled-20-e1543931531449.jpg)
Новата влада предводена од ДПМНЕ и ЗНАМ на самиот старт ја обезвредни здравствената дејност. Трикратно намалување на буџетските средства за изградба на државните Клинички центри и болници низ Македонија со новиот ребаланс на буџетот. Од прв ден докажа дека нема цели и соодветни приоритети за зајакнување на капацитетите на јавното здравство, како и унапредување на пристапот до здравствена заштита како важен елемент во еден државен систем, истакнуваат од Левица.
„Предвидено е трикратно намалување на средствата за доизградбата на Клиничкиот центар во Штип, како и за нов Клинички центар во Скопје, иако во предизборната кампања, ДПМНЕ како приоритет на новата Влада ја промовираше доградбата на Клинички центар во Штип и изградба на нов Клинички центар во Скопје.
Средствата за доизградба на Клиничкиот центар во Штип и нов Клинички центар во Скопје се намалени од 2,5 милиони евра на само 880 илјади евра;
Од 2 милиони евра, намалување на 780 илјади евра има и за Специјализираната болница за ортопедија и трауматологија „Св. Еразмо“ – Охрид и Клиниката за хирургија во Скопје;
Од 800 илјади евра, сега само 29 илјади евра има и за ЈЗУ Општа болница во Кичево.
Политиката на кратење на средства од јавното здравство укажува на фактот дека намерата на новата власт е да продолжи со руинирање на јавното здравство. Продолжува политиката на Венко Филипче и Фатмир Меџити кои на штета на јавното здравство граѓаните ги фрлија во канџите на приватните болници, коишто своите услуги ги наплаќаат десеткратно повисоко во однос на државните болници“, велат од Левица.
Потсетуваат дека министерот за здравство, Таравари, на прес конференција децидно посочи дека нема покачување на платите за здравствените работници до крајот на годинава поради буџетскиот дефицит.
Но од Левица дополнуваат дека за огромниот број на работници во јавниот сектор, oд кои голем дел не се појавуваат на работното место, власта одвои 723 милиони евра.
Левица ја осудува, како што велат, неразумната одлука за измена на висината на буџетските средства насочени кон јавното здравство.
„Како партија се залагаме за зголемени инвестиции во сите сегменти на јавното здравство. Држава мора да изнајде механизми, средства и решенија со кои на најголемиот дел од граѓаните во Македонија ќе им биде достапно бесплатно јавно здравство со врвни професионални здравствени услуги, почнувајќи од здравствените домови, па се до клиничките центри“, потенцираат од партијата.