Граѓаните и бизнис секторот во овие тешки времиња се оставени на милост и немилост. Се соочуваме со светска пандемија на опасниот коронавирус, но и со економска криза од досега невидени размери, а мерките на Владата немаат никаков ефект, реагираат од ВМРО-ДПМНЕ на прес-конференцијата на претседателот на Комисијата за финансии на СДСМ, Фатмир Битиќи, кој кажа дека предлозите за економски мерки на ВМРО-ДПМНЕ се несериозни и со далеку пониски износи.

„Неспособноста на СДСМ секојдневно не чини човечки животи и работни места. Бројот на наши сограѓани кои што се оставени без парче леб од ден во ден е се поголем, бројот на заболени од коронавирусот секојдневно расте, а Владата нема јасна стратегија за справување со ситуацијата. Република Македонија ја очекува економска апокалипса доколку Владата не ја разбере сериозноста на ситуацијата. Додека Заев и Спасовски танцуваат со короната, граѓаните не знаат како ќе го поминат месецот. Суетата на врхушката скапо ја чини државата. Владата на СДСМ и натаму одбива да ги прифати економските мерки кои ги предлага ВМРО-ДПМНЕ, мерки за спас на економијата“, се вели во реакцијата.

Според партијата, висината на дупката во буџетот се менува од ден за ден, а причината за ова е неработењето, корумпираноста и несериозноста на владата предводена од СДСМ.

Владините мерки обезбедуваат поддршка од 200 милиони евра, предлозите на ВМРО-ДПМНЕ се несериозни и со далеку пониски износи, изјави Фатмир Битиќи, претседател на Комисија за финансии на СДСМ.

„И додека повторно и во најголемата глобална криза од која не е поштедена и нашата држава, СДСМ предлага сет мерки кои опфаќаат поголем број на граѓани погодени од кризата, ВМРО-ДПМНЕ излезе со сет мерки кои се селективни и носат помалку пари во стопанството. Анализите покажуваат дека мерките што ги предлага ВМРО ДПМНЕ, освен што се несериозни и неодговорни, се мерки за поддршка на тие кои што се во категоријата на повисоко платени работни места и можеби под претпоставка дека нивната куповна моќ е поголема“, рече тој.

Битиќи кажа дека бројот на работни места кој што е таргетиран од страна на СДСМ е 250.000 вработени, а додека со моделите на ВМРО-ДПМНЕ таа поддршка е значително пониска.

„Моделот предложен од страна на ВМРО ДПМНЕ и категоризацијата на бизнисите според нивото на претрпени штети и добивање на подршка, очигледно е дека ги става во поповолна состојба сите подобро платени работни места, наспроти пониско платените работни места. Тоа почитувани граѓани значи помал опфат и помалку задржани работни места. Затоа што со помала поддршка, компаниите се склони полесно да се откажат од работниците“, рече тој.

Додека Владата спроведува сериозни мерки и чекори за справување со последиците од економската криза, додаде Битиќи, ВМРО-ДПМНЕ и Мицкоски научени на земање, сакаат да им ги земат парите на граѓаните од вториот пензиски столб.

Од политичката партија Алијанса за Албанците реагираат дека строгиот полициски час, со кој Владата забрани движење во општина Куманово во текот на целиот викенд, попладнево предизвикал хаос во општината бидејќи, како што велат, оваа мерка ја зголемила загриженоста кај граѓаните.

„Препораките за одржување на оддалеченост воопшто не се почитуваат од напнатоста на граѓаните во последен момент да ги обезбедат основните потреби за храна за наредните денови како резултат на ад хок повикот на Владата за полициски час, што создаде паника и конфузија“, велат од политичката партија.

Владата попладнево воведе построг полициски час кој се однесува само за Куманово, односно целосна забрана за движење за викендот, со почеток од 21 часот (денеска) до 5 часот наутро во понеделник.

Од паријата на Зијадин Села апелираат до граѓаните да бидат трпеливи и без паника да се приджуваат до заштитните мерки.

Потсетување, ваквата одлука на Владата следува откако денеска беше соопштено дека заболени со коронавирус се 11 доктори од тамошната болница, при што од новозаразените 46 лица за кои беше информирано денеска, половината, односно 23 се од Куманово.

Во работните денови, од понеделник до петок, забраната важи секој ден во периодот од 16 до 5 часот.