Соопштенија
(Видео) Ѓорчев: Никој не презема одговорност што Македонија гори, во март регистрирани се 500 пожари

Влатко Ѓорчев од ВМРО-ДПМНЕ на прес-конференција ги изнесе пораките на неговата партија во врска со пожарите во земјава, тема која, како што кажа, ја преокупира Македонија изминативе недели и месеци.
Ѓорчев рече дека само во март како никогаш досега имало повеќе од 500 пожари низ цела Македонија и од Заев побара оставки и разрешувања.
„Македонија гори, штетите се милионски и огромни, а никој не презема одговорност. Господине Заев, ова е доказ за вашата неспособност и неспособноста на вашите министри и градоначалници. Имаме ситуација каде што буквално нема држава и затоа оние коишто палат се чувствуваат осоколени, охрабрени и сметаат дека можат да палат без последици“, кажа Ѓорчев и додаде дека ниту еден закон во Македонија не се почитува.
Пратеникот од ВМРО-ДПМНЕ нагласи дека премиерот нема дадено ниту една изјава за пожарите и нема свикано ниту еден кризен штаб.
„Оди во кампања, се слика и дава изјава. Вози мотор во викенди, кафе во чаршијата во Охрид, а истовремено ја имаме најголемата криза последните сто години во месец март со пожарите и никому ништо. На министерот за земјоделие и шумарство, Николовски, му изгореа илјадници хектари, го нема никаде да се појави. Имаме стотици и стотици подметувачи на пожари, а полицијата на Оливер Спасовски не поднесува кривични пријави. Можеби ќе направат една, две, три или пет да ја забошатат работата, но ние зборуваме овде за 500 пожари“, истакна Ѓорчев.
Тој додаде дека 500 пожари во Македонија во месец март покажуваат само дека нема држава и дека секој пали што сака и како сака.
„На градоначалниците им изгореа општините, им изгореа цели планини, тие го игнорираа ова. Цела Македонија гори, ајде да направат кризен штаб, ајде малку да се ангажираат, ајде да не им завршува денот во 1 или 2, па да ги гледаме по улица Македонија по кафиња. Нека земат нека си ја сработат работата, жал и грев е да се гледаат илјадници изгорени животни по националните паркови, а уште не дошла жешката и летната сезона“, рече Ѓорчев и додаде дека пожарите претставуваат тотален дебакал на државните институции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
(Видео) Шукова од Аеродром: Конкретен план за опасниот извор на загадување – Вардариште

Во присуство на претседателот на СДСМ, Венко Филипче и кандидатот за градоначалник на Аеродром, Александар Трајановски, кандидатката за Градоначалничка на Град Скопје, Каја Шукова, вчера говореше на митинг во општина Аеродром.
Таа посочи дека ова не е уште една политичка вечер, туку обид да се врати смислата на локалната политика, која треба да биде во служба на граѓаните.
Шукова особено се задржа на темата што со години е болка за жителите на Аеродром – депонијата Вардариште. Таа понуди конкретен план за решавање на проблемот со овој опасен извор на загадување, со силен надзор и системско управување со отпадот. Посочи дека ова не е предизборна флоскула, туку животна потреба, затоа што никој повеќе нема право да си игра со здравјето на граѓаните.
Таа говореше и за Скопје како град на потенцијал, а не само на проблеми. Град што може повторно да стане простор на можности, создавање и заедништво. Град што ги инспирира младите да останат, а не да се иселуваат.
Во своето обраќање, Шукова говореше и за довербата кон нејзиниот колега и кандидат за градоначалник на Аеродром, Александар Трајановски, за кого рече дека е човек што знае што значи отчетност и знае како да ја претвори локалната власт во вистинска служба на граѓаните. Таа ги повика граѓаните да го изберат патот на работа, искреност и реална промена.
„Скопје заслужува повеќе. Аеродром заслужува повеќе. Вие заслужувате повеќе“ – заврши Шукова.
Соопштенија
(Видео) Филипче: Јавното здравство е во колапс, приватните болници му диктираат на министерот

„Нема лекови, се одложуваат операции, нема доктори, се затвораат клиники во интерес на приватните болници, кои му диктираат на министерот за здравство како да работи. Докторите од приватните болници му се советници. Може да замислите каква катастрофа од систем – едноставно, тотална блокада на државата,“ рече претседателот на Социјалдемократскиот сојуз на Македонија, д-р Венко Филипче, на граѓанската трибина „Се бориме за нашиот дом“, во општина Аеродром.
Тој нагласи дека ова е доказ за неспособноста на власта, која е ненародна влада и нема ништо добро направено во ниту една сфера.
„И тоа е само доказ за една незаинтересираност и неспособност на оваа власт која нема намера да имплементира ниту една политика во интерес на граѓаните или на државата”, истакна д-р Филипче, додавајќи дека нема ниту еден проект за кој оваа власт може да се пофали.
Соопштенија
(Видео) Филипче од Аеродром: Владата на ВМРО-ДПМНЕ ја води државата во економски колапс

Со катастрофални економски политики, Владата на ВМРО-ДПМНЕ ја води државата во целосен економски колапс, истакна Претседателот на СДСМ, д-р Венко Филипче, на граѓанската трибина „Се бориме за нашиот дом“, што се одржа во скопската општина Аеродром.
„Економските политики се катастрофални, просечната плата три месеци се намалува, за повеќе од половина се намалени странските инвестиции, паѓа индустриското производство, се намалува бројот на вработени“, рече Филипче.
Тој предупреди дека сериозно е влошена состојбата со ликвидноста на илјадници компании кои се доведени во криза и доцнат со исплата на плати.
„Околу 12.000 фирми доцнат со исплата на платите. Повеќе илјади фирми чекаат поврат на ДДВ, а во наше време тоа се исплаќаше во истиот ден и час кога требаше да се случи. Сериозно е нарушена ликвидноста на компаниите, стопанството, поради тоа што државата и општините не ги вршат навреме исплатите.“
Во обраќањето, Филипче нагласи дека власта ги изневери сите граѓани, вклучително и пензионерите.
„Денеска на виделина излезе уште една лага, а тоа е за пензионерите – само 1.000 денари зголемување. Над 97% од вкупниот број на пензионери кои сега земаат само 1.000 денари, требаше по нашата методологија да земат 2.000 денари“, рече Филипче.
На граѓанската трибина тој порача дека не постои ниту една област во која ВМРО-ДПМНЕ може да се пофали со резултати.
„Ваква ненародна Влада, мислам дека држава, нема една сфера во која што е добро. Нема еден проект, една работа за која може да се пофалат“, посочи претседателот на СДСМ, Венко Филипче.
Овој хаос, како што кажа Филипче е резултат на нефункционалната и незаинтересирана Влада на ВМРО ДПМНЕ.
„Тоа е само доказ за една незаинтересираност и некапацитетност на оваа Влада која нема намера да направи и да имплементира ниту една политика во интерес на граѓаните и државата.“ рече Претседателот на СДСМ, Венко Филипче.