Соопштенија
ВМРО-ДПМНЕ: Бандата СДСМ – ДУИ ќе изгуби на изборите поради криминал и корупција, фашистички ковид-мерки и згрижување бегалци

Зоран Заев заедно со ДУИ ќе изгубат на изборите. Токму оваа коалициска банда ќе изгуби на изборите поради криминал и корупција. Второ име на оваа криминална банда е неспособност. Секогаш во предизборието се расфрлаат со слатки зборови и ветувања, коишто, за жал, остануваат само во нивните памфлети, соопшти ВМРО-ДПМНЕ.
„ Дека СДСМ – ДУИ освен криминал и корупција не знаат ништо да сторат е и примерот со мерките за Ковид-19. Имено, од никакви мерки, непостоење на мерки, наеднаш се премина на радикални мерки кои прават поделби кај граѓаните. Токму тоа значи само дека власта нема концепт и буквално како муви без глави летаат и не знаат што да прават ниту со себе, ниту со државата.
Владата предводена од криминалната банда СДСМ – ДУИ направи погрешен потег, уште една глупост која нема граници, а тоа е примање бегалци за кои Македонија нема капацитет да ги смести. Додека побогати земји одлучиле да примат едноцифрен број бегалци, а Владата на Заев која не може за своите граѓани да се грижи ќе згрижи огромен број бегалци. Со секое јавно појавување на Заев се зголемува бројката на бегалци кои ќе бидат згрижени во Македонија.
Сите проблеми на граѓаните во врска и со лични карти и со сè друго лежи во пораз на СДСМ на локалните избори. Конечниот пораз и конечното решение на сите проблеми на граѓаните е пораз на криминалната банда СДСМ – ДУИ на локалните избори, веднаш по поразот на власта на локалните избори нови луѓе со нова визија, мотивирани и храбри да работат за интересите на државата и на граѓаните“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
Шајн: Време е за промени во Охрид, охриѓани ќе изберат нов концепт, проекти и резултати

Кандидатот за Градоначалник на општина Охрид од редовите на Социјалдемократскиот сојуз на Македонија, Асен Шајн, на вечерашната граѓанска трибина на која присуствуваше и лидерот на СДСМ, Венко Филипче, рече дека реалноста во Охрид е далеку од сликата која оваа општина ја заслужува и дека е време за промени и вистински проекти.
„Граѓаните се разочарани и со право. Многу се ветува, а ништо не се исполнува. Комуналниот развој е запоставен, градот е нечист, нема проекти, нема никаков развој. Младите заминуваат, економијата стагнира, а граѓаните живеат од денес за утре. Туризмот, кој треба да биде носечки столб на еден ваков туристички бисер, е сведен на неколку месеци хаос, а остатокот од годината живееме со истите и нерешени проблеми“, истакна Шајн.
Тој додаде дека Охрид станал лична своина на градежни инвеститори, кои со амин на локалната власт, на охриѓани приредија страшна урбана девастација.
„Штетата зазема непоправливи размери, ги загрозува природните и културните богатства и комплетно ја уништува околината. Дишеме загаден воздух, нема каде да паркираме, а јавните површини се уништени. Се навикнавме на сето она што не треба да биде нормално, нагласи кандидатот за градоначалник Шајн.
На граѓанската трибина на СДСМ во Охрид, Шајн истакна дека нема да зборува за минатото, туку за иднината, бидејќи заедно со кандидатите за советници има реални идеи, нов концепт и конкретен план.
„Урбанистичкото планирање ќе има нова димензија, ќе воведеме нови еколошки практики, а на крајбрежјето на Охридското Езеро, уредување, согласно препораките на УНЕСКО. Културата и спортот ќе добијат нова енергија, а туризмот ќе го градиме на одржливи темели, со грижа кон природата, историјата и локалните потреби“, истакна Шајн.
Нагласи дека инфраструктурата е негов приоритет и дека ќе води општина која нема да заборави никого.
„Секоја улица, секое мало, секое населено место ќе го добие потребното внимание. Ќе го слушаме гласот на месните и урбаните заедници, тие ќе бидат наш вистински партнер и сојузник во работата. Одлуките ќе се носат со народот, а не без него“, рече Шајн, додавајќи дека СДСМ е партија што досега покажала дека знае да инвестира во капитални проекти и трајни вредности.
Тој напомена дека е време е да се врати Охрид, на охриѓани и дека нема да бидат заборавени ниту социјалните семејства, пензионерите, лицата со попреченост, а за учениците вети дека ќе учат во модерни училници.
„Нашите ученици ќе се образуваат во модерни училници, а дечињата ќе добијат услови за згрижување по сите стандарди. Нашата цел е младите да ја гледаат својата иднина тука, во своето родно место“.
Увери дека тој и кандидатите за советници имаат капацитет и дека ќе работат чесно, домаќински, транспарентно и пред се, човечки, повикувајќи ги граѓаните на 19-ти октомври да ја дадат поддршката за него.
Соопштенија
Сајкоски: Да гласаме за континуитет кој значи многу проекти и многу работа за Битола, масовно да дадеме поддршка за Тони Коњановски

Генералниот секретар на ВМРО-ДПМНЕ, Ѓорѓија Сајкоски на денешниот митинг во Битола во рамките на изборната кампања за локалните избори 2025 година со слоган „Вистинскиот избор! Твојот човек! Твоето место! За твојата иднина!“ истакна:
„Сите имаме иста цел, да продолжи заедничката работа и во иднина со актуелниот, но и иден градоначалник на Битола, Тони Коњановски. Кога зборуваме за континуитет зборуваме за континуитет на проекти, работи. Затоа можеме да веруваме дека Коњановски ќе испорача дупло повеќе проекти од претходниот мандат“, кажа Сајкоски.
Сајкоски укажа дека во иднина дополнително во развојот на Битола ќе придонесе и Владата.
„Соработката на локалната власт со централната е многу важна тоа се виде од претходната година кога Владата ги поддржуваше проектите на општините, а претходно најде средства за тоа“, вели Сајкоски.
Според Сајкоски треба да се стави крај на оние кои се независни, а се зависни од мал број на луѓе.
„Затоа треба масовно да излеземе и да гласаме за Тони Коњановски и за советничката листа на ВМРО-ДПМНЕ. Една кандидатка бара поддршка од ДУИ. Патот го бираме ние и вие, а ние ќе го одбереме патот на проекти и работа. Затоа треба масовно да се излезе и да се гласа за континуитет кој подразбира работа“, заклучи Сајкоски.
Соопштенија
Каранфилова Пановска: Промените во Вевчани доаѓаат со Стефан Радиновски, да се избориме за нашиот дом

„Вевчани е посебно место – по својата историја, традиција, но и по духот на луѓето. Вевчанци секогаш знаеле гласно и јасно да ја кажат вистината, да кажат ‘Доста е!’ кога нешто не е како што треба“, порача заменик-претседателката на СДСМ, Фани Каранфилова Пановска на граѓанска трибина во Вевчани.
Таа истакна дека на овие избори граѓаните на Вевчани повторно ќе ја покажат својата сила и решителност.
„Да му кажеме на ВМРО-ДПМНЕ доста е! И во Вевчани, а со тоа да испратиме порака низ цела Македонија. Затоа што се работи за нашиот дом.“
Каранфилова Пановска потсети дека граѓаните веќе видоа како изгледа Вевчани препуштено на ВМРО-ДПМНЕ – застанати проекти, запоставени граѓани, изгубени години. „Нивниот градоначалник не е гласот на народот, туку глас на партијата. Не работи за граѓаните, туку за бизнис интересите на ВМРО-ДПМНЕ“, подвлече таа.
„Наместо развој видовме застој. Наместо подобар живот – растечка сиромаштија, стагнација на платите, дивеење на цените и масовна иселување. Македонија оставена без план, без визија, без перспектива. Боли кога гледаме како нашиот дом се руши. Затоа ова не се само избори – ова е борба за иднината на Македонија, за нашите деца да растат во европска, модерна и просперитетна држава,“ нагласи Каранфилова Пановска.
Таа истакна дека мисијата на СДСМ е да ја врати надежта, правдата и државата во рацете на граѓаните. „Нашата борба е за секој наш дом, за секоја наша улица, за секое семејство,“ рече таа.
Во Вевчани, Каранфилова Пановска даде поддршка за кандидатот за градоначалник од СДСМ и Коалицијата, Стефан Радиноски, како и за советничката листа.
„Нашиот иден градоначалник Стефан Радиноски е човек со големо срце, со визија и амбиција за промена. Проектите во неговата програма јасно кажуваат дека Вевчани може и мора да оди напред,“ истакна заменик-претседателката.