Соопштенија
ВМРО-ДПМНЕ: Нема државен тендер или грант, кој не го доби фирма или НВО поврзана со СДСМ
СДСМ и картелот на власт спроведуваат грабеж како од дивиот запад. На криминалните тендери и грантови им нема крај, обвини ВМРО-ДПМНЕ.
„Секој нов ден, нов скандал, а после скандалот со сомнително поделените грантови од Фондот за иновации, јавноста е повторно сведок на делење на државни пари на високи функционери, овој пат од страна на министерството за одбрана. Министерката Радмила Шеќеринска одобрила грант од половина милион денари за невладина организација каде таа самата членува, а со неа раководи лично советникот на Зоран Заев, Исмет Рамадани“ соопшти ВМРО-ДПМНЕ.
Од таму додаваат дека ниту Кочо Анѓушев не беше задоволен со парите кои ги спечали на товар на граѓаните па сега повторно неговата компанија „Брако“ се наоѓа во центарот на вниманието со добиениот државен тендер во вредност од 37 илјади евра.
„Општиот грабеж кој СДСМ го спроведува во Македонија не може да се сокрие со распродажба на националните и државните интереси. Грабежот СДСМ не може да го сокрие со разни капитулантски договори или со откажување од се што е македонско. Во Европската Унија и НАТО, Македонија не може да влезе со криминалиот картел сместен на Илинденска бб. Со промена на името, идентитетот, јазикот и откажување од македонското малцинство во соседството, нема да се реши проблемот со корупцијата и арамилакот на картелот. Капитулантскиот договор за промена на името кој Заев го договори со Грција, нема да го реши проблемот со судството, кое наместо да го гони, го амнестирал криминалот на високи функционери на СДСМ меѓу кои и самиот Заев“ се наведува во соопштението.
Институциите мора да се одважат, според опозициската партија, да покажат доблест и да се справат со криминалот на СДСМ.
„Правосудниот систем мора да почне да ја работи својата работа, а доколку не со тоа дефакто станува соучесник во криминалот на власта. Прашање на време е кога во Македонија ќе се врати правната држава, а тогаш ќе одговараат сите оние кои се огрешиле пред законот исто како што ќе одговараат тие што го амнестирале криминалот. Која ќе се врати правната држава, Македонија повторно ќе се врати на својот евроатлански пат, без капитулација која ја нуди Заев и СДСМ. Тогаш навистина Македонија ќе победи! Македонија ќе влезе во ЕУ, кога картелот ќе излезе од власта!“ стои во соопштението на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Соопштенија
Македонски концепт со поддршка за Орце Ѓорѓиевски: За стабилно и одговорно раководење со Град Скопје
„Македонски Концепт застанува цврсто зад изборот на Орце Ѓорѓиевски за градоначалник на Град Скопје. Нашата поддршка е резултат на убедувањето дека Скопје заслужува докажан и компетентен кадар, со јасна визија и професионален пристап во управувањето со главниот град“, велат од Македонски Концепт.
„По години на политички егзибиционизам и импровизација, време е да се стави крај на експериментите со судбината на Скопје. На граѓаните им е потребен стабилен, искусен и проверен градоначалник кој ќе работи за интересите на сите скопјани – без популизам, без партиски калкулации и без лични промоции.
Македонски Концепт верува дека Орце Ѓорѓиевски, како кандидат на нашата коалиција “Твоја Македонија”, е вистинскиот избор за враќање на достоинството, редот и функционалноста во управувањето со Град Скопје. Време е Скопје повторно да стане модерен, уреден и безбеден европски град“, се наведува во соопштението на Македонски Концепт.
Соопштенија
„Касами ќе го спасува криминалецот Дехари од ДУИ во Кичево“, велат од партијата Левица
„Јавно изразената поддршка на Билал Касами за кандидадот за градоначалник од ДУИ во Кичево претставува директна заштита и амнестија на криминалните мандати на Фатмир Дехари! Додека Мицкоски и провладините медиуми во паника постојано ја оцрнуваат Левица, токму оној кој ја доби поддршката од ВМРО-ДПМНЕ во Тетово сега ќе го спасува Дехари од губење на власта во Кичево“, велат од партијата Левица.
„Дали премиерот Мицкоски вака ќе расчистува со криминалите на ДУИ – додека неговата партија го поддржа сепаратистот Касами во Тетово, токму тој во вториот круг ќе го спасува Фатмир Дехари од губење на градоначалничката функција?! Иако ВМРО-ДПМНЕ немаше кандидати за градоначалници во Тетово, Гостивар и Струга за понизно да ги поддржи коалициските кандидати, сепак ВРЕДИ не го поддржа кандидатот на ВМРО-ДПМНЕ во Кичево за конечно ДУИ да отиде во опозиција во градот кој за Ахмети беше “воен плен”!
Додека Мицкоски опсесивно да ги оцрнува кандидатите за градоначалници на Левица, фактите се јасни: во Брвеница и Кичево неговите коалициски партнери директно соработуваат со ДУИ. Потсетуваме дека во општина Брвеница, кандидатот за градоначалник од ВРЕДИ повика на обединување со ДУИ во вториот круг од локалните избори.
Ваквото коленичење на ВМРО-ДПМНЕ со 58 пратеници пред помалиот коалициски партнер е на директна штета на сите жители на Кичево – кои неколку мандати се заробени од криминалното владеење на Фатмир Дехари.
Станува јасно дека целата оркестрирана владина кампања против Левица (која доживеа историски успех овие избори во градот Скопје) е со единствена цел – дефокус од понижувањето кое го доживеа партијата на Мицкоски од сопствените коалициски партнери, кои директно одработуваат за заштита на криминалите на ДУИ“, соопшти партијата Левица.
Соопштенија
Митовски: Црешево и Смилковци ги враќаме на мапата на развојот
Актуелниот градоначалник цел мандат ги остави Црешево и Смилковци во пустош и заборав. Без ниту еден капитален проект, без инвестиции, без елементарни услови за живот. Времето на неработа, запоставеност и игнорирање на овие населени места завршува. Таа слика ќе се промени во мандатот што следи, затоа што мојата визија е јасна – рамномерен развој на сите населени места во Општина Гази Баба, изјави кандидатот за градоначалник на Гази Баба од СДСМ, Влатко Митовски.
„Во Црешево ќе изградиме нов резервоар за вода со капацитет од дополнителни 300 кубни метри, ќе се доврши фекалната канализација, а краците од улица 3 ќе бидат конечно асфалтирани и санирани. Ќе ја замениме целата водоводна линија од препумпната станица во Железара до резервоарот во Црешево во должина од 6 километри, ќе изградиме нова бушотина за зголемен доток на вода, ќе го осветлиме регионалниот пат Црешево–Стајковци и ќе изградиме пешачка патека по целата должина. Дополнително, ќе изградиме и прочистителна станица за фекални води. Во Смилковци исто така ќе изградиме нов резервоар за вода со капацитет од 300 кубни метри, ќе ја довршиме фекалната канализација и ќе ја замениме целата водоводна линија во должина од 3,5 километри. Ќе се изгради нова бушотина, ќе се прошири патот и ќе се направи пешачка патека од Смилковци до Црешево, а краците од улица Павле Божинов конечно ќе бидат асфалтирани. Во недела, гласот за број 5 е глас за реализација на овие проекти, за секој дом, за секој од вас, за модерна и развиена Општина Гази Баба“, рече Митвоски.

