Соопштенија
Здравата уста е здраво тело

Секоја година на 20 Март светот се обединува за подигнување на свесноста за важноста на оралното здравје. Оралните болести ги погодуваат не само поединците, туку и здравствените системи и економии насекаде во светот. Целта на Светскиот ден на оралното здравје е да ги наоружа луѓето со знаење, алатки и доверба за добро орално здравје.
Оралните болести се главна здравствена грижа во многу земји и имаат негативно влијание врз квалитетот на живот. Оралните болести водат кон болка и непријатност, социјална изолација, намалена самодоверба и останати сериозни здравствени проблеми. Но нема потреба за грижа- најголемиот дел од оралните состојби можат да се превенираат и да се третираат во рана фаза.
Правилната орална нега е есенцијална за здрави заби и непца, а таа вклучува секојдневно четкање на забите и редовни посети на стоматолог. Само на тој начин ќе имате здрава и убава насмевка и добро орално здравје. Еве неколку совети за правилна орална нега уште од најмала возраст.
1. Започнете рано и бидете конзистентни:
- За бебиња, исчистете ги непцата со мека, влажна крпа по секое хранење за да ги отстраните остатоците од храна
- Откако ќе се појави првото запче започнете со четкање на запчињата со детска четка за заби и соодветна паста за заби
- За деца и возрасни, четкајте ги забите најмалку два пати дневно со соодветна паста за заби. Воспоставената рутина уште од најрана возраст ја прави оралната нега навика.
2. Користете соодветна техника
- За бебиња, користете нежни, кружни движења за да ги исчистите непцата и запчињата.
- За деца и возрасни користете соодветни пасти за заби.
- Научете ги децата правилно да ги четкаат забите за да не дојде до оштетување на непцата или глеѓта.
3. Ограничете го внесот на шеќер
- Минимизирајте ги слатките задоволства и засладените пијалаци, бидејќи тие придонесуваат за развој на кариес.
- Наместо засладени пијалоци, консумирајте вода
- За бебиња, избегнувајте да заспиваат со шише кое содржи било што освен вода
4. Редовно посетувајте стоматолог
Посетата на стоматолог треба да биде редовна и тоа се однесува на целото семејство
5. Применувајте здрави навики и избегнувајте ги лошите
- Применувајте здрави навики како консумирање на вода, балансирана и здрава храна богата со свежо овошје и зеленчук.
- Одбегнувајте навики како цицање на прст или долга употреба на цуцла, бидејќи тие можат да влиајат врз развојот на оралното здравје.
- Внимавајте на лошите навики како грицкање на нокти или отворање на разни пакувања со помош на забите, бидејќи на тој начин можете да ги оштетите забите и непцата.
Секое чувство на непријатност во оралната сфера може да биде ублажено со соодветни производи како што се геловите за орална нега.
Запомнете, одржувањето на добра орална хигиена е клучот за добро здравје и благосостојба во секоја фаза од животот. Создавањето навики од најрана возраст може да помогне да се спречат стоматолошките проблеми, а со тоа да ги задржите здравите и блескави насмевки што е можно подолго.
ПР текст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
ДОМ инсистира на итни мерки што ќе обезбедат интегритет и транспарентност на сите функционери

Демократската обнова на Македонија (ДОМ) ги осудува последните случувања околу оставката на претседателката на Државната комисија за спречување на корупција, Татјана Димитровска. Обвинението за оддавање службена тајна и компјутерски фалсификат во случајот „Адитив“ открива длабока инфилтрација на коруптивни практики во самите врвови на институциите кои треба да бидат првиот бедем во одбраната на правната држава. Оваа скандалозна афера не само што го подрива кредибилитетот на ДКСК, туку ја потврдува потребата за итна и безкомпромисна промена на системот на контрола и отчетност.
Времето кога нашата држава требаше да го прифати мотото „Нула корупција“ беше пред 34 години, со прогласувањето на независноста. Наместо тоа, сведочиме дека децении подоцна продолжуваме да доцниме, додека младите масовно си заминуваат поради отсуството на доверба во правната држава. Ова не е прашање на партиска припадност, туку на основни човечки вредности и на историската одговорност на државата кон граѓаните.
ДОМ инсистира на итно донесување мерки што ќе обезбедат интегритет и транспарентност на сите избрани и назначени функционери: детално и доследно верификување на анкетните листи за имотна состојба, јавно објавување на судирите на интереси, автоматско суспендирање при поднесено основано обвинение и воведување независен антикорупциски инспекторат со реални санкции.
Зелената партија ДОМ го повикува Собранието да ги усвои клучните законски измени за борба против корупцијата, како и итно да формира независно специјализирано тело за проверка на интегритетот на јавните службеници и функционери. Без овие промени, сите останати декларации против корупцијата ќе останат само празна реторика.
ДОМ останува цврсто на ставот дека корупцијата не смее да се релативизира, ниту да се премолчува. Ги повикуваме сите граѓани и граѓанки, здруженија и политички партии кои веруваат во правдата и еднаквоста пред законите, да застанеме заедно, едни до други, во одбраната на правната држава и владеењето на правото. Пред да го загубиме последниот остаток на институционален кредибилитет. Пред иднината на младите засекогаш да ја побараат на некоја нова, надвор од државата, адреса.
Соопштенија
(Видео) Шукова: Во работата ќе ме водат двете сили кои во 1963 го издигнаа Скопје од урнатините – љубовта кон градот и заедништвото

Потпретседателката на СДСМ и кандидатка за градоначалничка на Скопје, Каја Шукова, денеска испрати емотивна порака до скопјани, по повод 62-годишнината од катастрофалниот земјотрес што го погоди градот во 1963 година.
Шукова потсети на солидарноста и заедништвото со кои Скопје беше изградено одново и порача дека токму тие вредности мора повторно да го поведат градот напред.
„Скопје беше повторно изградено со срце, со волја и пред сѐ со солидарност. И токму заедништвото и искрената љубов кон градот се двете сили кои единствено можат да го водат овој град напред. Денес, ни се потребни повеќе од било кога“, рече Шукова.
Кандидатката за градоначалничка остро се осврна на изминатите четири години од актуелното локално раководство, обвинувајќи го за неспособност и занемарување на интересите на граѓаните.
„Скопје изминатите четири години беше силно погодено од неспособност, лични интереси и негрижа. Духот на Скопје се рушеше и обезличуваше секој ден, оставајќи ги скопјани немоќни пред партиските интереси“, рече Шукова.
Таа истакна дека како иден градоначалник ќе работи со чесност и одговорност, посветена на граѓаните.
„Никогаш како градоначалничка нема да дозволам личните, партиските и било кои други интереси да го уништат градот. Ветувам дека во работата ќе ме водат двете сили кои во 1963 го издигнаа Скопје под рушевините – силата на љубовта кон градот и силата на заедништвото со секој од вас“, порача таа.
Шукова заклучи дека Скопје заслужува повеќе и повика на нов почеток.
„Градот што го преживеа најтешкото, заслужува повеќе. Ние сите заслужуваме повеќе бидејќи го сакаме овој град. Скопје може подобро и ќе биде подобро. Затоа што Скопје сме сите ние. Време е да му дадеме нова сила. Време е да ги земеме работите во свои раце“, вели Шукова.
Од СДСМ најавуваат кампања за која велат дека ќе понуди реални решенија за сите предизвици со кои се соочува Скопје и визија за град кој им припаѓа на своите граѓани.
Соопштенија
(Видео) Градоначалникот тепач од Крива Паланка глуми жртва,а се однесува како шериф во општината, вели Манасиевски

Градоначалникот тепач Сашко Митовски од Крива Паланка, пред јавноста глуми жртва, а во суштина се однесува шерифски во општината, вели Валентин Манасиевски, член на Централниот комитет на ВМРО – ДПМНЕ. Тој денес на прес-конеренција рече дека Митовски ја злоупотребил службената положба.
„Митовски нема извршено надзор и контрола и спротивно на Закон одобрение за градба потпишал како важечко, иако не требало, за СДС тоа е режим, а Митовски жртва во случајот. Митовски не е никаква жртва, туку локален шериф во Крива Паланка, кој ги тепа своите сограѓани заради тоа што има капка повеќе алкохол во него. Но, сепак, еве би ги прашале СДС, дали тепачот градоначалник Митовски е жртва и во друг случај, кога повторно, спротивно на Закон, се изготвило решение за поставување на урбана опрема, поднесена од правно лице-угостителски објект, или во превод кафуле, чиј сопственик и управител е токму неговиот брат, Милан Митовски“, рече Манасиевски.
Ваквоо однесување, според Манасиевски покажува до каде одат градоначалниците од СДС како Митовски, во општините со кои раководат, мислат дека општината им е нивен приватен бизнис, па си прават што сакаат и мислат дека нема да одговараат пред Законот, затоа што досега праксата покажала дека секој оној којшто е близок до СДС или пак член на истата политичка партија, не одговара и нема никакви судски последици за работите кои ги прават спротивно на Законите.
„Исто така, за овој случај, тепачот Митовски има добиено кривична пријава, и покрај него уште три други лица, кои веројатно по негова насока го одобриле барањето од правно лице – угостителски објект, за поставување на урбана опрема, кое е во сопственост да повториме, на неговиот брат Милан Митовски. Ова е уште една потврда дека Сашко Митовски не е никаква жртва, ниту под прогон на некаков си режим, туку само обичен локален шериф, кој својата власт ја користи за свои лични интереси. Митовски знае дека за многу брзо од денес, ќе ги загуби изборите, бидејќи на граѓаните на Крива Паланка им е доста од градоначалник кој ги тепа своите сограѓани“, рече Манасиевски.
Тој е уверен дека на граѓаните на Крива Паланка им е потребна промена, а ВМРО-ДПМНЕ преку свој кандидат ќе ја испорача промената.