Претседателот на СДСМ Венко Филипче од големиот митинг „Се бориме за нашиот дом“ во Струмица, ја побара поддршката од граѓаните, за кандидатот на градоначалник, Марјан Даскаловски и советничката листа на СДСМ и коалицијата.

„Марјан Даскаловски, нашиот другар, вашиот сосед и пријател ја доби обврската и привилегијата да ги продолжи најдобрите традиции на татковците на градот, кој како и секој татко се грижи за домот. Вие, струмичани, многу добро знаете кој е Марјан Даскаловски. Човек од теренот. Човек од градот. Човек од народот и човек за народот. Вие добро го знаете, теренец 4×4, незапирлив. Цел живот со и за струмичани и Струмица“, истакна Филиче.

Тој нагласи дека Даскаловски и СДСМ имамат јасна визија за Струмица и знаат како таа визија да стане реалност.

„Струмица ја гледаме како општина со развиена економија, модерно земјоделство, силен туризам и стабилен систем на социјална заштита. Визијата е да создадеме локална средина каде што секој граѓанин ќе има еднакви можности за образование, работа и квалитетен живот“, истакна Филипче, додавајќи дека предложениот тим за

Струмица ја презема одговорноста и она што ќе го вети ќе го исполни.

„Затоа СДСМ на овие избори нуди луѓе кои луѓе кои живеат чесно, работат чесно и сакаат чесно да ја водат својата општина. Луѓе со интегритет, кои го даваат својот збор пред граѓаните, а не пред партијата. Кои ќе служат на граѓаните, а не на СДСМ. Тоа е клучната разлика меѓу нас и ВМРО-ДПМНЕ“, порача претседателот на СДСМ Венко Филипче од Струмица.

За време на средбата на коалицијата ВЛЕН со граѓаните во Куманово, еден од лидерите на коалицијата и кандидат за градоначалник на општина Чаир, Изет Меџити истакна дека изборната кампања треба да се фокусира на конкретните проблеми на граѓаните и на решенијата кои директно влијаат врз нивниот секојдневен живот.

„Изборната кампања се обидуваме да ја фокусираме на локалните решенија и локалните проблеми, затоа што граѓаните имаат само еден живот“, истакна тој, додавајќи дека иселувањето на Албанците е резултат на слабата инфраструктура, образованието, здравството и животниот стандард.

Споредувајќи го пристапот на актуелната влада со минатото, Меџити посочи неколку суштински разлики.

„Оваа влада за 15 месеци издвојува 1 милијарда евра за да се почитува целата земја во духот на Охридскиот договор. Претходните влади издвојуваа исто толку, но за менување на историјата и коруптивни проекти, воопшто не во интерес на Албанците, и тоа секако им пречи“.

Тој нагласи дека ВЛЕН донесе конкуренција во идеи и програми, рушејќи го долгогодишниот политички монопол.

„Во минатото имаше политички монопол, додека денес ВЛЕН донесе конкуренција во програмите и идеите, а не кој ќе критикува повеќе. Тие што немаат визија прибегнуваат кон навреди, критики и националистички карти“.

Понатаму, Меџити потсети на неуспесите на претходните влади во клучни национални прашања.

„20 години не го донесоа ниту Законот за борците од војната, ниту Законот за албанскиот јазик. За големите теми ќе зборуваме на парламентарните избори, Албанците сега го имаат ВЛЕН, кој може подобро да им застане зад албанските прашања од нив“.

Тој дополнително истакна дека ВЛЕН има докажан интегритет и политичка чистота.

„Немаме ниту една корупциска афера, а оној што имаше, му се придружи на ‘црните листи’. Албанците овојпат одлучија да му дадат шанса на ВЛЕН секаде каде што живеат, и по 4 години нека се направи споредба во работата“.

Меџити упати и повик на граѓаните да го изберат развојот, достоинството и одговорната промена.

„Време е Албанците да гласаат за тие што работат за нив, а не за тие што ги разочараа две децении“, порача тој на крај.

Кандидатот за градоначалник на ВМРО-ДПМНЕ за општина Штип, Иван Јорданов, на вчерашниот митинг во рамките на изборната кампања под слоганот Вистинскиот избор! Твојот човек! Твоето место! За твојата иднина!, истакна дека граѓаните се најголемата поддршка за реализација на многубројните проекти и идна мотивација за наредните 4 години за развој на Штип.

„Почитувани сограѓани вечерва оваа енергија е поинаква, се чувствува поддршката на локалната самоуправа. Вечерва нема да ги набројувам проектите кои ги реализиравме изминатите 4 години затоа што секој еден од вас имаше можност во транспарентна постапка секојдневно да ги констатира проектите, работењата. Во овие четири години вложивме многу посветеност, труд, љубов, доживеавме различни предизвици. Она кое сакам да го порачам вечерва, суштината на секој изборен процес е да бидеме подобри од минатото, со нашето искуство кое го стекнавме, ќе се трудиме да ја подобриме продуктивноста на локалната администрација, да бидеме слуга на вас, граѓаните, преку јавните претпријатија, само така ќе испорачаме подобрување на вашето и наше секојдневие, за помодерен и поубав Штип“, рече Јорданов.

Кандидатот за градоначалник на општина Штип упати благодарност и порака до граѓаните, масовно да излезат на 19 октомври и да го дадат својот глас за ВМРО-ДПМНЕ, за да продолжи општина Штип да се развива со уште по засилено темпо, со уште поголеми проекти за најмодерен и најразвиен град во Македонија.

„Секој еден глас одлучува, секој еден глас ја создава иднината на нашиот град, излезете и масовно заокружете го бројот 9 на 19 октомври. Колку е по масовна победата толку е поголема обврската и одговорноста која што ја имаме. На Штип му е потребно обединување, на Штип му е потребен развој, на Штип му е потребна масовна победа и поддршка за советничката листа на ВМРО-ДПМНЕ и коалицијата Твоја Македонија, само така ќе продолжи развојот, само така ќе продолжат проектите во нашиот град. Никогаш нема да ве изневериме, со уште поголемо срце и енергија ќе продолжиме да го градиме нашиот град, да го направиме најразвиениот, најмодерниот, најубавиот град во Македонија. Вечерва со чист образ ве гледам во очи, ајде заедно да продолжиме да го градиме нашиот Штип со којшто ќе се гордееме“, вели Јорданов.