Соопштенија
Најголемата ИТ компанија во Македонија се ребрендира: Сеавус е сега Киншифт

Сеавус официјално се ребрендира и ќе работи под името Киншифт (Qinshift). Оваа значајна промена е дел од најавената трансформација на технолошкиот столб на KKCG Групацијата, која на почетокот на летото објави дека ќе работи под два главни бренда, за да ја утврди својата позиција како меѓународен лидер во областа на информатичката технологија (ИТ). Компаниите кои се фокусирани на развој на наменски софтвер ќе работат под брендот Киншифт (Qinshift).
Со ова ребрендирање Сеавус се интегрира кон Киншифт, со што како најсилна алка на групацијата дополнително ја зацврсти својата позиција како меѓународна ИТ компанија.
Сеавус како компанија за развој на софтвер и консултантски услуги, беше основана во 1999 година во Малме, Шведска, а со интеграцијата во Киншифт опфати над 1400 вработени во преку 17 канцеларии и претставништва во 10 земји во светот, како и значајно портфолио на клиенти.
„Да се биде дел од Киншифт е голем предизвик. Ние за овој чекор се подготвувавме повеќе од две години, со што ова е за нас еден природен и очекуван процес. Да потсетам дека експанзијата на Киншифт е доказ за нашата посветеност во развој на иновациите и трендовите во ИТ индустријата и нашето досегашно искуство во успешни деловни софтверски решенија создадени од тимот од над 1400 ИТ експерти, сите до еден заслужни за тоа каде стигнавме денес и каде ќе ја однесеме компанијата утре. Денес Киншифт го чинат повеќе од 3500 професионалци, над 300 клиенти, 28 канцеларии низ светот и вкупен приход од над 200 милиони евра. Убав почеток“, изјави Коча Бошку, досегашниот извршен директор на Сеавус, кој во Киншифт ќе го води и развива бизнис одделот за телекомуникации, медиуми и технологија.
Киншифт е глобална технолошка компанија со силно европско присуство, со експертиза во дизајн на софтвер, комплетни корпоративни решенија, UX и UI дизајн, управувани услуги и иновативни понуди за развој на производи. Киншифт, исто така дава и деловни консултантски услуги. Компанијата опслужува разновидни клиенти, вклучувајќи големи телекомуникациски и сателитски оператори, финансиски институции, производствени и автомобилски компании, како и организации за мобилност и здравствени услуги, овозможувајќи им да напредуваат во дигиталната ера.
До крајот на годината ќе се ребрендира и интегрира во Киншифт и Stratiteq, компанија специјализирана за анализа на податоци со седиште во Шведска. Потоа, Cleverlance, чешкиот и словачки лидер во обезбедувањето услуги за дигитализација на бизнисот, како и дел од чешката корпорација Komix, која има силно присуство во автомобилската индустрија. Интеграцијата ќе биде завршена до крајот на 2024 година со вклучување на Clearcode, светски партнер за развој на софтвер за рекламирање и маркетинг (AdTech & MarTech) и Musala Soft, компанија со седиште во Бугарија која работи со големи клиенти (blue chip companies).
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
Георгиевски: Во Илинден ќе се отвори полициска станица за безбедна и мирна животна средина за сите граѓани

Александар Георгиевски, кандидат за градоначалник за општина „Илинден“ од редовите на ВМРО-ДПМНЕ, на денешниот митинг одржан во рамките на изборната кампања, под слоганот „Вистинскиот избор! Твојот човек! Твоето место! За твојата иднина!“, се обрати и истакна дел од реализираните проекти во општина Илинден.
„Ја подобривме инфраструктурата, изградивме фекални канализации и ја модернизиравме водоводната мрежа. Јавните комунални претпријатија добија современа механизација и зголемен возен парк, за полесно да ги извршуваат своите обврски кон граѓаните на Илинден, бидејќи нашите граѓани заслужуваат современи услови за живеење. Илинден, е финансиски стабилна општина без долгови“, рече Георгиевски.
Георгиевски истакна дел од проектите на изборната програма.
„Ќе изградиме и реконструираме над 15км главни и локални улици и патишта низ сите локални места, ќе изградиме и реконструираме најмалку 5 локални моста, ќе продолжиме со изградба на пешачки и велосипедски патеки, како и со проектот светла општина Илинден каде што предвидуваме поставување на нови линии на улично осветлување, во делот на образованието, ќе продолжиме со инвестиции во инфраструктурата на нашите училишта, во рамки на основното училиште „Гоце Делчев“ ќе изградиме нова училишна зграда која ќе обезбеди современи и безбедни услови за учење, исто така, ќе изградиме и нова спортска сала во основното училиште „Браќа Миладиновци“ која ќе обезбеди современ простор за физичко образование, спортски активности и рекреација, во овој дел, важно е да се спомене и финансиската поддршка за секое ново прваче која за прв пат ќе ја доделиме со почеток од новата учебна година, на новиот мандат, ќе изградиме нова градинка“, истакна Георгиевски.
Го истакна еден од најзначајните проекти и тоа отворањето на полициска станица, која ќе обезбеди безбедна и мирна животна средина за сите граѓани.
„Како дел од нашите напори за зајакнување на јавниот ред и мир, ќе отвориме полициска станица, оваа Влада, предводена од ВМРО-ДПМНЕ, конечно оваа година со промена на законските регулативи овозможи отворање на полициска станица од општа надлежност во Илинден. Оваа полициска станица ќе овозможи побрза и поефикасна реакција на полицијата, како и поголема присутност во заедницата, што ќе создаде безбедна и мирна животна средина за сите граѓани“, рече Георгиевски.
Ги повика граѓаните да изберат чесност и посветена работа и да го заокружат бројот 9.
Соопштенија
Ковачки: Илинден е пример за брз раст и развој, заслужува да се гради

Илинден заслужува да се гради, Илинден е пример за брз раст и развој, рече членот на Извршниот комитет Драган Ковачки пред присутните на митингот во општина Илинден.
Ковачки порача дека во Илинден локалната власт е со населението, и тоа насекаде во маалата, во селата, во училиштата.
„За големи работи потребно е партнерство, визија, лидерство и токму такво лидерство има Илинден во актуелниот и идниот градоначалник Александар Георгиевски. Илинден се менува под негово водство, општината покрај тековни работи кои се изведуваат ќе добие и полициска станица од општа надлежност и тоа на инсистирање на граѓаните“, кажа Ковачки.
Ковачки укажа дека Илинден е модерен дом за сите и додаде дека тоа е така бидејќи зад него се граѓаните од една страна, а од друга страна Владата.
„Александар ве има вас, а тој ја има поддршката од Владата и премиерот Христијан Мицкоски. Ова е Влада што верува во вистински развој и Влада што знае дека вистинскиот развој почнува од локалната самоуправа. До пред нешто повеќе од година дена имаше влада која кочеше, која стопираше, а денес е сосема поинаку ова е Влада која е партнер на граѓаните, на локалната самоуправа“, посочи Ковачки.
На крајот од своето обраќање Ковачки апелираше за масовна излезност на 19 октомври и гласање за број 9.
Соопштенија
Филипче: Со Лазар Петров, Демир Капија станува модерен винско-туристички центар во југоисточна Македонија

Претседателот на Социјалдемократскиот сојуз на Македонија, Венко Филипче, на граѓанската трибина во Демир Капија, истакна дека со работа, визија и чесно управување, локалната власт предводена од градоначалникот Лазар Петров ја трансформира општината на подобро, во која секоја инвестиција е одговор на реална потреба на граѓаните.
„Два мандати со Лазар Петров и дела што се гледаат. Сработеното зборува за трудот, посветеноста и љубовта што се вложени во Демир Капија и секое село во општината. Кога ќе ги видите обновените улици, реконструираното училиште, детската градинка, новите паркови, канализационата мрежа и новата обиколница, јасно е дека тука не се ветувало, туку се работело”, истакна Филипче.
Тој нагласи дека на Демир Капија и е потребен континуитет на веќе започната работа и на над 58 реализирани проекти: подобрена и нова инфраструктура, локален развој, развој на туризмот и создавање услови за младите да останат и живеат во својот град.
„Демир Капија ќе ја градиме, ќе ја развиваме и модернизираме. Ќе ја градиме со луѓе што знаат, што имаат волја и што работат — за народот, а не за фотелјата.
Лазар е градоначалник кој го реализира она што е ваш приоритет, а не на поединци. И ве уверувам дека така ќе продолжи, транспарентно, квалитетно и домаќински”, потенцираше Филипче.
Нагласи дека разликата помеѓу СДСМ и ВМРО-ДПМНЕ е во чесноста, отчетноста и грижата за граѓаните, потенцирајќи дека кадрите на СДСМ работат чесно и до план, заедно со граѓаните и за граѓаните.
„Кога се работи чесно и транспарентно, кога се мисли на народот, има резултати. Демир Капија денес е општина со нов лик, со развиена инфраструктура и подобрени услови за живот. Од новите патишта, канализациите и резервоарите за вода, до уредените паркови и јавни површини – се гледа дека градоначалникот Лазар Петров знае како да се грижи за сите”, рече Филипче.
Како дел од новата програма на градоначалникот Петров претседателот на СДСМ, Филипче најави неколку капитални и урбани проекти кои ја поставуваат Демир Капија во центарот на еколошкиот, туристичкиот и инфраструктурниот напредок на регионот.
„Со изградбата на современа пречистителна станица за отпадни води, нова автобуска станица, off-road патека за велосипедисти и мотори, како и прогласување на Демиркаписката Клисура за заштитено природно подрачје – поставуваме цврсти темели за зелена и одржлива иднината на општината,“ рече тој.
Дополнително, се најавуваат и проекти за уредување на крајбрежјето на реката Бошава во рекреативна зелена зона, отворање дневен центар за стари лица, адаптација на младинскиот креативен центар и програми за детска инклузија и поддршка на социјално ранливи семејства.
Филипче на граѓанската трибината порача дека Демир Капија мора да продолжи да се гради и развива како модерен винско-туристички центар на југоисточна Македонија и ги повика присутните на 19 октомври да го поддржат Лазар Петров и советничката листа на СДСМ.