Соопштенија
Протест на УЖ на ВМРО-ДПМНЕ: Сите сме Јилдиз, неказнивоста значи одобрување
Болниците станаа жолта куќа во која никој не е безбеден, велат од Унијата на жените на ВМРО-ДПМНЕ. Последниот скандал со Јилдиз Веапоска, родилката од Струга, како што додаваат, ја прелеа чашата, која се полнеше со повеќе случаи во кои пациенти завршиле трагично поради лекарски грешки што не биле санкционирани.
„Како да не беше доволно што на Веапоска ѝ извадиле здрави органи и матка поради што повеќе нема да може да раѓа, туку и сомнежот за полот на бебето е јасен показател дека докторот Мухамед Асани извршил злосторство за кое мора да има казна, а не заштита од нефункционалниот хаотичен систем на Филипче и неговите пајташи.
Нашите тела не се кукли фантоми за вежбање на партиските миленици, нашите животи не смее да зависат од некадарноста на оние што вршат злосторство и поминуваат неказнето бидејќи се заштитени од политиката. Не смееме да дозволиме враќање во средниот век, во кој жените од страв ќе се пораѓаат дома бидејќи штетниците се заштитени од Филипче и хаотичното здравство.
Мора да има одговорност, мора да има правда. Ако премолчиме за ова, ќе се случуваат уште многу други вакви случаи. Ако не го кренеме гласот за ова, хоророт ќе продолжи, а виновниците ќе поминуваат неказнето. И затоа не смее повеќе да се молчи!
Ве повикуваме да го кренете гласот против неправдите на протест в сабота, 20 март, во 11 часот, пред Министерството за здравство затоа што сите ние сме Јилдиз и затоа што неказнивоста на ваквите трагични случаи значи нивно одобрување.
Ова е протест за жената и женските права, ова е протест против заштитата на злосторниците, ова е протест против хаосот и трагедиите во здравството и очекуваме поддршка од сите општествени фактори!“, порачаа од Унијата на жените на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
Шајн: Време е за промени во Охрид, охриѓани ќе изберат нов концепт, проекти и резултати

Кандидатот за Градоначалник на општина Охрид од редовите на Социјалдемократскиот сојуз на Македонија, Асен Шајн, на вечерашната граѓанска трибина на која присуствуваше и лидерот на СДСМ, Венко Филипче, рече дека реалноста во Охрид е далеку од сликата која оваа општина ја заслужува и дека е време за промени и вистински проекти.
„Граѓаните се разочарани и со право. Многу се ветува, а ништо не се исполнува. Комуналниот развој е запоставен, градот е нечист, нема проекти, нема никаков развој. Младите заминуваат, економијата стагнира, а граѓаните живеат од денес за утре. Туризмот, кој треба да биде носечки столб на еден ваков туристички бисер, е сведен на неколку месеци хаос, а остатокот од годината живееме со истите и нерешени проблеми“, истакна Шајн.
Тој додаде дека Охрид станал лична своина на градежни инвеститори, кои со амин на локалната власт, на охриѓани приредија страшна урбана девастација.
„Штетата зазема непоправливи размери, ги загрозува природните и културните богатства и комплетно ја уништува околината. Дишеме загаден воздух, нема каде да паркираме, а јавните површини се уништени. Се навикнавме на сето она што не треба да биде нормално, нагласи кандидатот за градоначалник Шајн.
На граѓанската трибина на СДСМ во Охрид, Шајн истакна дека нема да зборува за минатото, туку за иднината, бидејќи заедно со кандидатите за советници има реални идеи, нов концепт и конкретен план.
„Урбанистичкото планирање ќе има нова димензија, ќе воведеме нови еколошки практики, а на крајбрежјето на Охридското Езеро, уредување, согласно препораките на УНЕСКО. Културата и спортот ќе добијат нова енергија, а туризмот ќе го градиме на одржливи темели, со грижа кон природата, историјата и локалните потреби“, истакна Шајн.
Нагласи дека инфраструктурата е негов приоритет и дека ќе води општина која нема да заборави никого.
„Секоја улица, секое мало, секое населено место ќе го добие потребното внимание. Ќе го слушаме гласот на месните и урбаните заедници, тие ќе бидат наш вистински партнер и сојузник во работата. Одлуките ќе се носат со народот, а не без него“, рече Шајн, додавајќи дека СДСМ е партија што досега покажала дека знае да инвестира во капитални проекти и трајни вредности.
Тој напомена дека е време е да се врати Охрид, на охриѓани и дека нема да бидат заборавени ниту социјалните семејства, пензионерите, лицата со попреченост, а за учениците вети дека ќе учат во модерни училници.
„Нашите ученици ќе се образуваат во модерни училници, а дечињата ќе добијат услови за згрижување по сите стандарди. Нашата цел е младите да ја гледаат својата иднина тука, во своето родно место“.
Увери дека тој и кандидатите за советници имаат капацитет и дека ќе работат чесно, домаќински, транспарентно и пред се, човечки, повикувајќи ги граѓаните на 19-ти октомври да ја дадат поддршката за него.
Соопштенија
Сајкоски: Да гласаме за континуитет кој значи многу проекти и многу работа за Битола, масовно да дадеме поддршка за Тони Коњановски

Генералниот секретар на ВМРО-ДПМНЕ, Ѓорѓија Сајкоски на денешниот митинг во Битола во рамките на изборната кампања за локалните избори 2025 година со слоган „Вистинскиот избор! Твојот човек! Твоето место! За твојата иднина!“ истакна:
„Сите имаме иста цел, да продолжи заедничката работа и во иднина со актуелниот, но и иден градоначалник на Битола, Тони Коњановски. Кога зборуваме за континуитет зборуваме за континуитет на проекти, работи. Затоа можеме да веруваме дека Коњановски ќе испорача дупло повеќе проекти од претходниот мандат“, кажа Сајкоски.
Сајкоски укажа дека во иднина дополнително во развојот на Битола ќе придонесе и Владата.
„Соработката на локалната власт со централната е многу важна тоа се виде од претходната година кога Владата ги поддржуваше проектите на општините, а претходно најде средства за тоа“, вели Сајкоски.
Според Сајкоски треба да се стави крај на оние кои се независни, а се зависни од мал број на луѓе.
„Затоа треба масовно да излеземе и да гласаме за Тони Коњановски и за советничката листа на ВМРО-ДПМНЕ. Една кандидатка бара поддршка од ДУИ. Патот го бираме ние и вие, а ние ќе го одбереме патот на проекти и работа. Затоа треба масовно да се излезе и да се гласа за континуитет кој подразбира работа“, заклучи Сајкоски.
Соопштенија
Каранфилова Пановска: Промените во Вевчани доаѓаат со Стефан Радиновски, да се избориме за нашиот дом

„Вевчани е посебно место – по својата историја, традиција, но и по духот на луѓето. Вевчанци секогаш знаеле гласно и јасно да ја кажат вистината, да кажат ‘Доста е!’ кога нешто не е како што треба“, порача заменик-претседателката на СДСМ, Фани Каранфилова Пановска на граѓанска трибина во Вевчани.
Таа истакна дека на овие избори граѓаните на Вевчани повторно ќе ја покажат својата сила и решителност.
„Да му кажеме на ВМРО-ДПМНЕ доста е! И во Вевчани, а со тоа да испратиме порака низ цела Македонија. Затоа што се работи за нашиот дом.“
Каранфилова Пановска потсети дека граѓаните веќе видоа како изгледа Вевчани препуштено на ВМРО-ДПМНЕ – застанати проекти, запоставени граѓани, изгубени години. „Нивниот градоначалник не е гласот на народот, туку глас на партијата. Не работи за граѓаните, туку за бизнис интересите на ВМРО-ДПМНЕ“, подвлече таа.
„Наместо развој видовме застој. Наместо подобар живот – растечка сиромаштија, стагнација на платите, дивеење на цените и масовна иселување. Македонија оставена без план, без визија, без перспектива. Боли кога гледаме како нашиот дом се руши. Затоа ова не се само избори – ова е борба за иднината на Македонија, за нашите деца да растат во европска, модерна и просперитетна држава,“ нагласи Каранфилова Пановска.
Таа истакна дека мисијата на СДСМ е да ја врати надежта, правдата и државата во рацете на граѓаните. „Нашата борба е за секој наш дом, за секоја наша улица, за секое семејство,“ рече таа.
Во Вевчани, Каранфилова Пановска даде поддршка за кандидатот за градоначалник од СДСМ и Коалицијата, Стефан Радиноски, како и за советничката листа.
„Нашиот иден градоначалник Стефан Радиноски е човек со големо срце, со визија и амбиција за промена. Проектите во неговата програма јасно кажуваат дека Вевчани може и мора да оди напред,“ истакна заменик-претседателката.