Македонија
СДСМ: Мицкоски е поразен, демократските промени се заокружија

Политичката реалност е дека Мицкоски е поразен, демократските промени се заокружија, наместо нов Иванов, имаме вистински претседател, велат преку соопштение од Социјалдемократскиот сојуз на Македонија.
„Политичката реалност е дека Мицкоски е поразен на претседателските и локалните избори, демократските промени се заокружија, наместо нов Иванов, имаме вистински претседател, кој води напред. Граѓаните на 5 мај гласно порачаа дека не сакаат кочење, не сакаат враќање назад, не сакаат деструкција и режим. Волјата на граѓаните е јасна, граѓаните сакаат напредокот да продолжи, сигурна иднина, членство во ЕУ, НАТО“, велат од СДСМ.
Владејачката партија додава дека концептот на Пендаровски е за заедништво, обединување и напредок, а тоа се пораките на граѓаните, како и политичка реалност.
„Причините за поразот на претседателските избори, како и за поразот на локалните избори, Мицкоски треба да си ги побара кај себе. Вака покажува дека толку е очаен Мицкоски, што пред своето членство поразот на претседателските избори, поразот на локалните избори во Охрид и поразот на локалните избори во Ново Село, ги претставува нереално. Република Северна Македонија продолжува напред“, додава СДСМ во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Голема крводарителска акција во Центарот за култура во Ѓорче Петров

Во организација на Општина Ѓорче Петров, Црвениот крст и Институтот за трансфузиона медицина на Република Македонија, денеска во Центарот за култура се одржа голема крводарителска акција, која обедини бројни хумани граѓани под заедничка мисија – спасување животи.
Градоначалникот Александар Стојкоски, кој исто така е крводарител и даруваше крв денес, истакна дека крводарувањето е едно од најголемите хумани дела што секој може да го направи. „Секој дарител е херој. Вашиот гест може да биде од пресудно значење за некого што се бори за живот“, нагласи Стојкоски.
Со оваа акција, уште еднаш се потенцира важноста на солидарноста и заедништвото во нашата заедница. Општина Ѓорче Петров упатува голема благодарност до сите кои се вклучија и дадоа свој придонес.
Акцијата продолжува до 18 часот, а сите заинтересирани имаат можност да се приклучат и да станат дел од оваа значајна иницијатива.
Македонија
Mицкоски за средбата со Филипче: Одговорност, мудрост и чесност и’ се повеќе од потребни на Македонија

Премиерот Христијан Мицкоски на социјалните мрежи објави фотографии од средбата со лидерот на СДСМ, Венко Филипче, што во моментов се случува во владината зграда.
„Средба каде разговараме за актуелните случувања, и од која сакам да се знае дека одговорност, мудрост и чесност и се повеќе од потребни на Македонија!“, напиша Мицкоски.
Пред средбата изјава за медиумите даде Филипче, кој рече дека очекува конструктивен разговор. Му се заблагодари на Мицкоски што ја прифатил поканата и изрази жалење што одредени политички партии уфрлиле етничка димензија за средбата, бидејќи повикот за меѓупартиска средба бил упатен кон сите партии.
Македонија
Владата има план за царината од САД: „Нема потреба од паника, нема да се одрази многу на нас“

Одлуката на САД за царинските трошоци, нема да има голем импакт врз нашата економија, но ние имаме подготвен план за надминување на ситуацијата, велат од Владата по одлуката САД да ја зголемат царината за увоз од сите земји, која за Македонија изнесува 33 отсто, што е повеќе од земјите од ЕУ – 20 отсто.
Одлуката е очекувана, велат од Владата, и не ја одмина ниту една земја во светот – дури ни Велика Британија, Канада, Европската Унија и уште стотици други држави.
„Владините тимови веќе некое време ги анализираат можните последици и заедно имаме подготвен план за надминување на ситуацијата. Оваа одлука нема да има голем импакт врз нашата економија, но ние имаме јасен план како понатаму“, велат од Владата.
Се додава и дека контактите со американската администрација се веќе воспоставени и ќе продолжат на високо ниво, а Владата ќе работи на изнаоѓање решение и на спроведување на планот.
„Она што е значајно да се спомене е дека нема потреба од никаква паника, ниту од избрзани реакции и заклучоци. Станува збор за нешто долго најавувано од оваа администрација, и не е одмината ниту една земја – дури ни најстарите и најтрадиционални партнери на САД. Ова е обид за репреговарање на трговските односи во светот – нешто што беше неопходно и што, иако сега за некои претставува шок, за други ќе значи можност“, се вели во соопштението на Владата.
Се додава и дека оваа ситуација е шанса за многу луѓе кои не ѝ посакуваат добро на Владата да напаѓаат неосновано и да се обидуваат да нанесуваат штета врз нивниот углед – било поради лични интереси, било поради партиски цели, било поради малодушност.