Кандидатот за градоначалник на Општина Центар од редовите на СДСМ Горан Герасимовски, вчера на терен „од врата до врата“ со центарци дискутираше за проектите што треба да се реализираат во новиот мандат.

Тој, најави бројни капитални проекти како изградба на градинка со капацитет од 100 деца, изградба на дом за стари лица кадешто е предвидено вработување на 25 негователи, изградба на нов административно-граѓански објект, како и два затворени базени.

„Во новиот мандат работиме за сите граѓани поеднакво, реализираме проекти за децата, за младите, за возрасните, но и за пензионерите. Воведуваме бесплатен оброк за ученици во целодневна настава, а на учениците од петто до деветто одделение им следува бесплатна екскурзија низ Македонија. За 50% ги зголемуваме стипендиите за талентирани ученици, за 50% ги зголемуваме и субвенциите за новороденче. Вложуваме и во подобар квалитет на живот на пензионерите. Од 2.500 на 5.000 денари ја зголемуваме еднократната парична помош на пензионерите со пониска пензија“, вели Герасимовски.

Герасимовски, истакна дека на 19 октомври победува концептот „За Центар што го сакаме“ затоа што развојот на Центар мора да продолжи.

„Поддршката од граѓаните е голема, во изминатите четири години направиме многу за нашата општина. Реализиравме над 90% од програмата. Денеска, Центар е нова и успешна приказна која мора да продолжи да се развива по победата на локалните избори. Ги повикувам сите центарци да го направат вистинскиот избор за Центар, за поубава и подобра општина“, потенцира Герасимовски.

„Се движиме по новите тротоарски површини коишто ги градиме во овој момент. Ова е проект којшто е пример како треба да изгледа едно урбано, уредено населено место“, вели Виктор Паунов, кандидат за градоначалник на општина Карбинци од ВМРО-ДПМНЕ.

„Ние продолжуваме заеднички, за подобри услови за сите граѓани, за општина Карбинци“, изјави Виктор Паунов, кандидат за градоначалник на општина Карбинци од ВМРО-ДПМНЕ.

Носителот на листата на советници на Коалицијата за зелена иднина во општина Куманово, Сретен Стојковски, во видео-обраќање зборува за нови стандарди во локалното управување, како што се фер правила, транспарентност и зелени политики што служат на граѓаните.

„Во Куманово знаеме дека чистата општина почнува со чиста совест — со правила што важат за сите и со почит кон секој човек,“ истакнува Стојковски, додавајќи дека општината мора да се води од јавниот интерес, а не од привилегии.

„Општината не е каса за привилегии, напротив, треба да ја изградиме во заеднички зелен дом“, вели Стојковски.

Стојковски упатува и една од клучните пораки на коалицијата: „Нашата порака е јасна: Заедно до зелено и чесно Куманово.“

Тој нагласува дека како член на истиот состав на Советот ќе се спротивстави на партиски контролираните локални практики.

„Не прифаќаме општина зад паравани и партиски списоци. Бараме јавно управување, трага на секоја општинска одлука и отчет што се гледа за секој потрошен општински денар“, порачува Стојковски.

На крајот од обраќањето Стојковски испраќа порака за достоинствено секојдневие и одржлив развој на општина Куманово.

„Куманово има потенцијал што не смее повеќе да се распарчува со импровизации. Наместо цинизам, нудиме достоинство во секојдневието на кумановци и кумановки — почиста животна средина, култура на одговорност и инклузија како норма, а не како исклучок. Коалицијата за зелена иднина стои покрај вас. Нашата амбиција и цел е Куманово да го направиме место за живеење, а не за преживување“, порачува Сретен Стојковски, носител на листа за советници на Коалицијата за зелена иднина во општина Куманово.