Соопштенија
Трајановски: Во ек на пандемија Шилегов на сила протурка незаконско решение за промена на имиња на улици и булевари во Скопје

Во време на пандемија и кога секојдневно се соочуваме со голем број загубени животи, кога сме на врвот на светската листа по смртност, Петре Шилегов на сила протурка незаконско решение за промена на голем број имиња на улици и булевари во Скопје, реагира Коце Трајановски од ВМРО-ДПМНЕ.
„Оваа одлука е целосно незаконска, спротивна на член 8 од Законот за именување на улици, плоштади и други инфраструктурни објекти во кој децидно стои дека не треба да се вршат промени на улици шест месеци пред локалните, претседателски или парламентарни избори, како и дека една година пред планиран попис“, напиша Трајановски на својот фејсбук-статус.
Во време на пандемија и кога секојдневно се соочуваме со голем број на загубени животи, кога сме на врвот на светската…
Posted by Коце Трајановски on Среда, 31 март 2021
Како целосно незаконска, најверојатно оваа одлука ќе падне на суд, со што непотребно ќе ги ставате на трошок граѓаните и компаниите, кои вашите ветувања и хирови ќе ги чинат многу пари, пишува Трајновски.
Тој уште додава дека со таквата незаконска одлука се сменети 493 имиња на улици, плоштади и мостови во Скопје.
„Толкава бројка се нема случено по Втората светска војна, па оттаму се поставува прашањето, зошто се брзате толку ова да го направите на неколку месеци пред локалните избори? Чии интереси сакате да задоволите со оваа незаконска постапка? Зошто ја обезличувате Македонија? Целата постапка со која се променија фантастични 493 улици го направивте во крајно нетранспарентен начин, без никаква јавна дебата. Шилегов се испофали дека дел од имињата биле дадени во онлајн анкетата, меѓутоа никаде немаше јавна дебата за квалитетот на имињата кои (наводно) биле предложени од граѓаните, за потребата за именување на улици по нив, како и потребата да бидат тргнати некои од постоечките имиња. Ако зборувавте за транспарентност ќе направевте една проширена анкета и дебата, каде што ќе ги вклучивте сите оние луѓе, археолози, историчари, етнолози и останати стручни фели кои ќе дадеа придонес за вистинска транспарентност“, реагира Трајановски.
Според него има добри предлози, на најголемиот број се несоодветни и прашува со кое право Шилегов и СДСМ си дозволија да ги тргнат имињата на голем број од личностите од македонска историја, од периодот на антиката, преку Илинден до партизаните?
„Покрај скандалозното тргање на дел од имињата, истите се заменуваат со имиња кои се или анонимни, или се лица кои немаат никаква допирна точна со Скопје или Македонија“, пишува Трајановски на својот статус.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
Левица: 62 години од земјотресот во Скопје – изграден од солидарност, денес уништен од корупција и алчност

Делегација од Левица составена од членовите на Централниот комитет – Андреа Јанков, Катерина Јовановска и Дарја Мустафаоглу, денес оддаде почит и положи свежо цвеќе на Споменикот на жртвите од катастрофалниот земјотрес кој на 26 јули 1963 година, во 5 часот и 17 минути, го погоди Скопје.
„Во тој страшен миг, тагата и болката се вплетоа во животите на илјадници луѓе и засекогаш ја променија историјата на нашиот град. Над 1.000 загинати, 3.000 повредени и 200.000 останати без дом. Но, во часовите и деновите по трагедијата, заживеа нешто подеднакво моќно – солидарноста.
Првата помош стигна од југословенските републики, а потоа и од целиот свет – 87 нации испратија медицински тимови, храна, шатори, механизација. Скопје го доби епитетот „Град на солидарноста“, а 14 октомври, кога ОН усвои резолуција за обнова на градот, влезе во светската историја како Ден на Скопје. Обновата на градот ја предводеа визионерски умови.
Денес, 62 години подоцна, Скопје го разјадува корупцијата, градежната мафија и дивото градење. Наместо планско и хумано урбанизирање, имаме илјадници дивоградби, уништени паркови, станбени блокови без основна инфраструктура.
Сето тоа се случува во град кој се наоѓа на трусно подрачје – нешто што надлежните постојано го забораваат или свесно го игнорираат. Наместо да се гради отпорно, одржливо и безбедно, Скопје стана жртва на профитерско и ризично узурпирање.
Она што некогаш беше симбол на заедничка обнова и визија, денес е претворено во хаос каде што јавниот интерес е распродаден за приватен профит. Градот кој беше изграден со солидарност – денес е разјаден од алчност.
Овој ден не треба да биде само тивко сеќавање на трагедија, туку и гласно предупредување дека негрижата, корупцијата, непочитувањето на стандардите можат да чинат човечки животи.
Нека овој ден нѐ потсети не само на минатото, туку и на нашата одговорност за иднината на Скопје“, стои во соопштението од Левица.
Соопштенија
ДОМ инсистира на итни мерки што ќе обезбедат интегритет и транспарентност на сите функционери

Демократската обнова на Македонија (ДОМ) ги осудува последните случувања околу оставката на претседателката на Државната комисија за спречување на корупција, Татјана Димитровска. Обвинението за оддавање службена тајна и компјутерски фалсификат во случајот „Адитив“ открива длабока инфилтрација на коруптивни практики во самите врвови на институциите кои треба да бидат првиот бедем во одбраната на правната држава. Оваа скандалозна афера не само што го подрива кредибилитетот на ДКСК, туку ја потврдува потребата за итна и безкомпромисна промена на системот на контрола и отчетност.
Времето кога нашата држава требаше да го прифати мотото „Нула корупција“ беше пред 34 години, со прогласувањето на независноста. Наместо тоа, сведочиме дека децении подоцна продолжуваме да доцниме, додека младите масовно си заминуваат поради отсуството на доверба во правната држава. Ова не е прашање на партиска припадност, туку на основни човечки вредности и на историската одговорност на државата кон граѓаните.
ДОМ инсистира на итно донесување мерки што ќе обезбедат интегритет и транспарентност на сите избрани и назначени функционери: детално и доследно верификување на анкетните листи за имотна состојба, јавно објавување на судирите на интереси, автоматско суспендирање при поднесено основано обвинение и воведување независен антикорупциски инспекторат со реални санкции.
Зелената партија ДОМ го повикува Собранието да ги усвои клучните законски измени за борба против корупцијата, како и итно да формира независно специјализирано тело за проверка на интегритетот на јавните службеници и функционери. Без овие промени, сите останати декларации против корупцијата ќе останат само празна реторика.
ДОМ останува цврсто на ставот дека корупцијата не смее да се релативизира, ниту да се премолчува. Ги повикуваме сите граѓани и граѓанки, здруженија и политички партии кои веруваат во правдата и еднаквоста пред законите, да застанеме заедно, едни до други, во одбраната на правната држава и владеењето на правото. Пред да го загубиме последниот остаток на институционален кредибилитет. Пред иднината на младите засекогаш да ја побараат на некоја нова, надвор од државата, адреса.
Соопштенија
(Видео) Шукова: Во работата ќе ме водат двете сили кои во 1963 го издигнаа Скопје од урнатините – љубовта кон градот и заедништвото

Потпретседателката на СДСМ и кандидатка за градоначалничка на Скопје, Каја Шукова, денеска испрати емотивна порака до скопјани, по повод 62-годишнината од катастрофалниот земјотрес што го погоди градот во 1963 година.
Шукова потсети на солидарноста и заедништвото со кои Скопје беше изградено одново и порача дека токму тие вредности мора повторно да го поведат градот напред.
„Скопје беше повторно изградено со срце, со волја и пред сѐ со солидарност. И токму заедништвото и искрената љубов кон градот се двете сили кои единствено можат да го водат овој град напред. Денес, ни се потребни повеќе од било кога“, рече Шукова.
Кандидатката за градоначалничка остро се осврна на изминатите четири години од актуелното локално раководство, обвинувајќи го за неспособност и занемарување на интересите на граѓаните.
„Скопје изминатите четири години беше силно погодено од неспособност, лични интереси и негрижа. Духот на Скопје се рушеше и обезличуваше секој ден, оставајќи ги скопјани немоќни пред партиските интереси“, рече Шукова.
Таа истакна дека како иден градоначалник ќе работи со чесност и одговорност, посветена на граѓаните.
„Никогаш како градоначалничка нема да дозволам личните, партиските и било кои други интереси да го уништат градот. Ветувам дека во работата ќе ме водат двете сили кои во 1963 го издигнаа Скопје под рушевините – силата на љубовта кон градот и силата на заедништвото со секој од вас“, порача таа.
Шукова заклучи дека Скопје заслужува повеќе и повика на нов почеток.
„Градот што го преживеа најтешкото, заслужува повеќе. Ние сите заслужуваме повеќе бидејќи го сакаме овој град. Скопје може подобро и ќе биде подобро. Затоа што Скопје сме сите ние. Време е да му дадеме нова сила. Време е да ги земеме работите во свои раце“, вели Шукова.
Од СДСМ најавуваат кампања за која велат дека ќе понуди реални решенија за сите предизвици со кои се соочува Скопје и визија за град кој им припаѓа на своите граѓани.