Вечерва во Абу Даби, актуелниот шампион Панатинаикос и трите предизвикувачи во Олимпијакос, Фенербахче и Монако ја започнуваат битката за најголемиот трофеј во европската кошарка.
Завршниот турнир во Евролигата ќе го отворат Панатинаикос и Фенербахче во 17:00 часот, а три часа подоцна ќе играат Олимпијакос и Монако.
Во величествената сала со 18.000 седишта, во петок и недела, четири екипи ќе одлучат кој ќе биде шампион, а Панатинаикос ќе се обиде да ја одбрани титулата освоена минатата сезона во Каунас и да стане европски шампион по осми пат, со што ќе се израмни на второто место со ЦСКА на вечната листа, лидер е Реал Мадрид со 11 пехари.
Тоа ќе биде можност за тренерот Ергин Атаман да го направи истото со Панатинаикос како што го направи со Ефес, да ја одбрани титулата.
Ако успее и го освои четвртиот трофеј, Турчинот ќе се изедначи на второто место на вечната листа со Еторе Месина, Божидар Маљковиќ, Педро Ферандиз и Александар Гомељски. Далеку пред сите е Жељко Обрадовиќ со девет титули.
Шарунас Јасикевичиус и Василис Спанулис ќе се обидат да освојат титули и како тренери и како играчи, што им успеало само на Светислав Пешиќ, Лоло Саинц и Арменак Алачачан.
Историјата веќе ја испиша асот на Панатинаикос, Костас Слукас, кој ќе игра на Фајналфорот по 11-ти пат, што никој пред него не го направил, а со евентуалната титула би станал единствениот петкратен шампион во овој век, а во историјата, само Дино Менегин би бил пред него како играч со седум титули.
Панатинаикос и Фенербахче ќе го играат полуфиналното дерби. Актуелниот шампион ќе има сериозен предизвик против турскиот клуб кој одигра одлично во регуларниот дел од сезоната, а потоа го декласираше Париз во плејофот со 3:0.
„Зелените“ ги добија двата натпревари од сезоната, со победа на гостински терен од 81-76, по што следеше трилер од 91-90 во Атина во февруари. Иако офанзивната моќ на најкорисениот играч во лигата, Кендрик Нан, и четирикратниот шампион Костас Слукас, ќе го привлечат најголемото внимание пред натпреварот, клучот за овој натпревар ќе биде дефанзивата.
Од друга страна, Фенербахче може да се пофали со докажан стрелец на победнички шутеви во ликот на Најџел Хејс-Дејвис, но турскиот тим првенствено се потпира на колективната игра предводена од искусните Марко Гудуриќ и Вејд Болдвин.
Јасикевичиус ќе се обиде да ја освои својата прва титула во својот петти обид како тренер откако не успеа со Жалгирис, двапати со Барселона и минатата сезона со Фенербахче.
Вториот натпревар носи поизразен фаворит (Олимпијакос), но јасно е дека и Монако има свои адути.
Олимпијакос игра и против традицијата, од 2017 година најдобриот тим во регуларниот дел од сезоната не успеал да ја освои титулата на завршниот турнир. Олимпијакос ќе се обиде да ја освои првата титула по 2013 година, кога успеа да ја одбрани титулата освоена во 2012.
Ова ќе биде 14-та средба меѓу овие два тима од 2022 година, вклучувајќи го и полуфиналето пред две години, кое Олимпијакос го доби по историска серија од 27-2 во третата четвртина.
Мајк Џејмс ќе го предводи Монако во нивниот обид конечно да ја освои Евролигата.
Клучен играч на Олимпијакос секако ќе биде Саша Везенков, кој по одличната регуларна сезона беше прогласен за МВП на плејофот со просек од 19 поени и седум скока во победата во серијата од 3:1 над Реал Мадрид.
Уште еден интересен дуел се одвива на клупата, каде што легендарниот Василис Спанулис го има своето тренерско деби на Фајналфорот против неговиот поранешен шеф Јоргос Барцокас, кој ја бара својата втора круна откако го водеше тимот со Спанулис на теренот до титулата во 2013 година.
Натпреварот за третото место ќе се игра во недела во 16:00 часот, додека финалето е во 19:00 часот.
