Фудбалскиот клуб Реал Мадрид се огласи во јавноста по објавите на шпанските медиуми дека нивниот играч Мартин Едегард бил позитивен на коронавирусот на тестот што му бил направен по натпреварот со Реал Сосиедад.

„Откако беа тестирани сите фудбалери и тренери, резултатите на тестовите на Ковид-19 се негативни“, објавија од Реал Мадрид.

Едегард, во неделата, започна во стартниот состав на Реал против клубот во кој играше минатата сезона. Тој во понеделникот имал „лажен позитивен тест“, што предизвика мала паника во клубот.

Норвежанецот бил тестиран уште еднаш, вториот тест му бил негативен што значи дека нема да мора да оди во 14 дневна изолација.

Барселона ја доби битката со Баерн Минхен околу потписот на талентираниот десен бек на Ајакс Сержињо Дест. Челниците на барселона ги искористиле врските кои со клубот ги има актуелниот спортски директор на Ајакс Марк Овермарс за го договорат трансферот.

Барселона за услугите на младиот репрезентативец на САД ќе плати фиксни 20.000.000 евра, а преку бонусите во касата на Ајакс ќе се слеат уште 5.000.000 евра.

Според медиумите Дест ја одбрал Барселона бидејќи таму сигурно ќе биде во стартниот тим, додека во Баерн за конкуренти на позицијата десен бек би ги имал Бенжаман Павар и Џошуа Кимих.

Дест доаѓа на „Ноу Камп“ на местото на Рубен Семедо кој за 38.000.000 евра се пресели во Вулверхемптон.

Били Донован е новиот тренер на НБА франшизата Чикаго Булс. Донован пред три недели доби отказ во Оклахома Тандер откако не успеа да ја мине првата рунда во плејофот на Западот. Тандер во седум натпревари испаднаа од Хјустон.

Донован ја прифатил понудата од Чикаго поради визијата што ја има франшизата и поради големиот број на млади кошаркари кои го носат дресот на Булс.

Инаку, Оклахома под водство на Донован пет сезони по ред играше во плејофот. Во првата сезона кога во тимот беа Кевин Дурент и расел Вестбрук Тандер играа во финалето на Западот.

На клупата на Оклахома тренерот забележал 243 победи и 157 порази.