Поранешниот лев бег на Арсенал и на Челси, Ешли Кол потврди дека се повлекува од фудбалот, ставајќи крај на својата 20-годишна кариера на 38 години.

Откако ја помина младинската школа во Арсенал, тој направи контроверзен трансфер во Челси во 2006 година, пред да игра за Рома, Лос Анџелес галакси и Дерби каунти до крајот на минатата сезона под водство на својот поранешен соиграч, Френк Лампард. Тој сега ќе се фокусира на добивањето на тренерската лиценца.

„По долго размислување, ми стана јасно дека морам да се повлечам. Сега е време за следното поглавје во мојот живот и се надевам дека ќе станам тренер“, изјави Кол.

Во својата кариера, поранешниот англиски репрезентативец имаше 697 настапи за клубови, освои 13 трофеи (од кои три титули од Премиер лигата и еден од Лигата на шампионите). За националниот дрес тој одигра 107 настапи, со што е шести на вечната листа.

Жозе Мурињо од декември не е тренер на ниту еден клуб, откако Манчестер јунајтед му ја откажа верноста, и очигледно фудбалот многу му недостасува откако се појави видео на кое низ солзи објаснува колку му недостасува фудбалот.

Мурињо од неодамна е коментатор на „Скај спорт“ каде што ја коментира Премиер лигата, меѓутоа очигледно, му недостасува работата.

„Првиот момент кога почнав да работам во професионалниот фудбал го почувствував тоа ’клик’. Од тој момент тоа се сериозни работи. Без престан. Сега, кога не сум веќе тренер, наместо да уживам, многу ми недостасува. Во моментов учам германски бидејќи него знам. Зборувам англиски, шпански, француски, португалски и италијански“, вели Мурињо за „Газета дело спорт“.

José Mourinho tears up while saying he misses football. pic.twitter.com/ZdAAGQkpKA

— Polo Maruwa (@elchaupo) August 17, 2019

Робин ван Перси вели дека тоа што Арсенал не му понудиле нов договор за останување на „Емирати“ го натерале да го направи контроверзниот трансфер во 2012 година.

Холанѓанецот, кој постигна 132 гола во 280 настапи за „топчиите“, сепак, исто така признава дека не можел да го спречи „малото дете“ во него кое врескало за трансфер во Манчестер јунајтед. Ван Перси потоа со Јунајтед освои уште еден трофеј од Премиер лигата за Сер Алекс Фергусон, но трансферот од 22 милиони фунти ги наруши односите со навивачите на Арсенал.

„Можете да го споредите тоа што бев во Арсенал со брак. Јас и мојата сопруга, Арсенал, бевме оженети осум години. По осум години, и се смачив на мојата жена. Тоа се фактите. Кога Арсенал не ми нудеа нов договор, беше јасно. Морав да видам наоколу. Сакав да ја освојам титулата. Тоа е животот. Имаше три опции. Една да одам надвор од Англија, која наскоро ја немаше, или да одам во Сити или Јунајтед“, вели Ван Перси за „БТ“.

Околу односите со навивачите на Арсенал, Ван Перси е отворен.

„Секако, навивачите не беа среќни од мојата одлука, но стојам зад неа. Тие не ја имаа целата приказна и никогаш не сум имал ништо против Арсенал“, вели Ван Перси, кој постигна 58 гола во 105 настапи за Јунајтед.