Еден ден откако ја победи Венус Вилијамс во тесен меч, двократната гренд слем шампионка Викторија Азаренка стигна до апсолутно шокантна 6:0/6:0 победа над шампионката од Австралија опен, Американката Софија Кенин во второто коло на Италијанскиот опен во Рим.

Азаренка имаше 10 директни победнички топки и само 4 неизнудени грешки за да го комплетира мечот за само 61 минута. Азаренка освои речиси двојно повеќе од Кенин – 57-29, за своја прва победа над топ 5 тенисерка од 2019 година.

Азаренка, која загуби во финалето на САД опен во Њујорк од Јапонката Наоми Осака, има 13 победи во последните 14 меча и сега ќе игра со руската квалификантка Дарја Касаткина, која со 6:2/6:3 беше подобра од Чехинката Катерина Синијакова.

Шведскиот ас во скок со стап, Арманд Мондо Дуплантис успеа да избрише уште еден светски рекорд на легендарниот Украинецот Сергеј Бубка, прескокнувајќи 6.15 метри во Рим, подобрувајќи го рекордот на отворено на Бубка од 1994 година.

Дуплантис доминираше во натпреварувањето во кое немаше вистинска конкуренција – Белгиецот Бен Бредерс беше втор со 5.80 метри, додека Рену Лавилени скокна само 5.70 метри за четврто место.

За 20-годишниот европски шампион од 2018 година, некогаш магичната граница од 6 метри стана вистинска формалност, откако претходно оваа година скокна и 6.07 метри. Во февруари, тој го сруши светскиот рекорд на Лавилени во сала со скок од 6.17 метри во Торун, Полска, за потоа да скокне и еден сантиметар повисоко во Глазгов.

WOW!😍👏👏👏Här sätter Armand Duplantis nytt utomhusrekord när han klarar 6,15 meter. pic.twitter.com/BBEzMKRysa

— TV4 Sport (@TV4Sport) September 17, 2020

Кил имаше супериорна 31:21 победа на гостувањето кај ППД Загреб, додека Барселона исто така без проблеми стигна до гостинска победа кај Мотор Запорожје (25:30), за комплетирање на натпреварите од првото коло од ЕХФ Лигата на шампионите во групата Б.

Во „Арена Загреб“, бундеслигашот покажа дека не се шегува уште во првото полувреме, кога дозволи домаќините да постигнат само шест гола, за потоа во второто полувреме да го „доврши“ противникот. Сандер Сагосен со седум гола и Никлас Екберг со шест гола беа лидери кај Кил, додека кај „плинарите“, Филип Вистороп имаше шест гола.

За Каталонците, блесна Алекс Гомез со 10 постигнати голови, Лука Циндриќ постигна пет, а за Запорожје, Аиденас Маласинскас имаше седум гола.

ЕХФ ЛИГА НА ШАМПИОНИ, 1.КОЛО, ГРУПА Б

Мотор Запорожје – Барселона 25:30 (11:13)

ППД Загреб – Кил 21:31 (6:14)