Спорт
Без шанса против силната Хрватска, сега со Исланд на „мегдан“
Македонија во третиот натпревар на Светското првенство во ракомет во Германија и Данска го забележа првиот пораз откако Хрватска се покажа како пресилна селекција за нашите момци, стигнувајќи до превисока 31:22 победа.
Со овој резултат, Хрватска се пла…


Македонија во третиот натпревар на Светското првенство во ракомет во Германија и Данска го забележа првиот пораз откако Хрватска се покажа како пресилна селекција за нашите момци, стигнувајќи до превисока 31:22 победа.
Со овој резултат, Хрватска се пласира во втората рунда на натпреварувањето со минимални 2 поени (откако не победи нас и Исланд, двете репрезентации со шанси за пласман понатаму), додека за нас останува големата пресметка со „рибарите“ за третото место во групата.
Освен на почетокот, кога одевме гол-за-гол со „каубоите“, селекцијата на Лино Червар се покажа како пресилна за нас и посебно имавме проблем со нивниот напад. Во текот на првото полувреме, Хрватска создаде предност од дури +7, за на полувреме да се отиде со пет гола разлика (16:11).
Во второто полувреме имавме можност да ја намалиме оваа разлика на само три гола, но на крајот Хрватска, предводена со фантастичниот Мартин Шего на голот, одигра стабилно и на крајот стигна до убедлива победа за трет триумф на Мундијалот.
Дејан Манасков беше најрасположен за игра со седум постигнати голови, додека капитенот Кирил Лазаров по слабото прво полувреме, се „активираше“ во второто и заврши со пет гола. По три постигнаа Пешевски и Талески. За Хрватска, Домагој Дувњак постигна шест гола, додека по четири имаа Карачиќ, Мандиќ и Шипиќ.
Сега, за „четата“ на Раул Гонзалес следува ден одмор, пред во среда да се судриме со неговата матична Шпанија, пред во четврток да го играме одлучувачкиот дуел со Исланд.
Фото: ЕПА
СВЕТСКО ПРВЕНСТВО ГЕРМАНИЈА/ДАНСКА, 3.КОЛО
ГРУПА Б
Исланд – Бахреин 36:18 (16:10)
Македонија – Хрватска 22:31 (11:16)
Шпанија – Јапонија 20.30 ч.
Табела: 1.Хрватска 6, 2.Шпанија 4, 3.Македонија 4, 5.Исланд 2, 5.Јапонија 0, 6.Бахреин 0
ГРУПА А
Србија – Бразил 22:24 (11:14)
Русија – Германија 22:22 (10:12)
Франција – Кореја 20.30 ч.
Табела: 1.Германија 5, 2.Франција 4, 3.Русија 4, 4.Бразил 2, 5.Србија 1, 6.Кореја 0
ГРУПА Ц
Тунис – Чиле 36:30 (18:15)
Норвешка – Австрија 34:24 (16:13)
Данска – Саудиска Арабија 20.15 ч.
Табела: 1.Норвешка 6, 2.Данска 4, 3.Австрија 2, 4.Тунис 2, 5.Чиле 2, 6.С.Арабија 0
ГРУПА Д
Унгарија – Катар 32:26 (16:11)
Аргентина – Египет 20:22 (9:8)
Шведска – Ангола 20.30 ч.
Табела: 1.Унгарија 5, 2.Шведска 4, 3.Катар 2, 4.Ангола 2, 5.Египет 2, 5.Аргентина 1
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Една сезона и заврши – Шортс повеќе нема да игра во Евролигата?!

Ти Џеј Шортс, американски плејмејкер со македонски пасош, имаше фантастична дебитантска сезона во Евролигата со Пари Сен Жермен. Се очекуваше дека тој ќе се приклучи на еден од најсилните европски тимови во текот на летото, но тоа најверојатно нема да се случи.
Францускиот „Баскет Јуроп“ објавува дека Шортс ќе ја напушти Европа на крајот од сезоната и ќе им се придружи на Мемфис Гризлис, што значи дека ќе се испроба во НБА.
Според извештаите, постигнат e принципиелен договор, па Шортс повторно ќе соработува со финскиот тренер Томас Исало во Мемфис, под чие водство играше во Бон и Париз минатата сезона. Оваа сезона, тој соработуваше со бразилскиот стручњак Тијаго Сплитер во Париз.
Шортс беше шампион и МВП на Лигата на шампионите на ФИБА пред две години со Бон, минатата сезона беше шампион и МВП на Еврокупот со Париз, а оваа сезона беше избран во идеалната петорка на Евролигата и го водеше Париз до четвртфиналето.
Значи, ситниот плејмејкер ќе ја продолжи својата серија, настапувајќи во Лигата на шампионите, Еврокупот, Евролигата и НБА година по година.
Според истиот извор, бројни тимови од Евролигата му понудиле на Шортс плата и шест пати поголема од онаа што ја имал во Париз, но на крајот веројатно ќе преовлада одлуката за НБА лигата.
Овој играч во просек постигнуваше 19 поени, 2,6 скока и 7,3 асистенции по натпревар во Евролигата.
Спорт
Македонија официјално го призна ММА спортот – Скопје ќе биде домаќин на најголемиот борачки настан досега

Министерството за спорт донесе одлука Мешаните боречки вештини да бидат официјално признаени како легитимен спорт во Македонија. Со оваа одлука, Македонија станува четвртата земја во Европа што го признава ММА како официјален спорт, потврдувајќи го растечкиот успех и влијание на овој спорт на нашата територија.
Ова признание е резултат на долгорочна посветеност, страст и исклучителни успеси на македонските борци на домашната и меѓународната сцена. Особено ги истакнуваме постигнувањата на клубот “Д Стронгест”, Даниела Алексовска, Ивица Алексовски и Стефан Пецевски. Во последниве две години, тие донесоа чест и респект за нашата земја на меѓународната ММА сцена како и безброј победи, двајца европски прваци и бронзен медал на Светското ММА првенство, велат од Федерација на Р.С. Македонија за ММА.
Со официјалното признавање е формирана Македонската ММА Федерација, на чие чело е Ивица Алексовски, со преку 30 години искуство во развојот и промоцијата на боречката сцена.
Во духот на ова ново поглавје, се најави и најголемиот ММА спектакл досега во Македонија. Настанот ќе се одржи на 6-ти септември, организиран од страна на Македонската ММА Федерација и промотерската организација ARMMADA, градот Скопје ќе биде домаќин на врвни борци од Македонија и целиот свет.
На настанот ќе бидат поканети некои од најголемите ММА имиња денес, како што се Александар Волкановски, Александар Ракиќ и Педи Пимблетт.
Најавени беа и неколку македонски ММА борци кои ќе влезат во октагонот, меѓу кои се Горјан Славески, Даниела Алексовска, Марко Трајановски и Дино Старчевич.
Настанот ќе биде пренесуван во живо на каналот „Арена Фајт“.
Спорт
Роналдо Џуниор дебитираше во Хрватска, гордиот татко му честита

Кристијано Роналдо Џуниор (14), најстариот син на легендарниот португалски фудбалер со исто име, пристигна во Хрватска каде што настапува со португалската репрезентација до 15 години на Меморијалниот турнир „Влатко Марковиќ“ во Свети Мартин на Мури. Португалија го отвори турнирот со победа од 4:1 над Јапонија.
Синот на Роналдо влезе во игра во 53-тата минута (се играа 2×40 минути), но немаше некој посебен ефект. Неговиот татко Кристијано по дебито објави порака на Инстаграм полна со гордост: „Честитки за твоето деби за Португалија, сине. Многу сум горд на тебе.“
Тој го носи бројот 7 на дресот, како и неговиот татко. Марија Долорес дос Сантос Авеиро, неговата баба и мајка на постариот Кристијано, исто така пристигна во Хрватска со него. Таткото очигледно не можел да дојде поради клупски обврски во Саудиска Ал Наср.