Спорт
Бразилска „шок-терапија“ за Србија, Исланд без мака против Бахреин
Бразил со 24:22 ја победи Србија за да ги освои првите поени на Светското првенство во ракомет во Германија и Данска, за речиси сигурно да ги уништи шансите на „орлите“ за втора рунда, додека во нашата група, Исланд без мака со 36:18 го совлада Бахреин…
Бразил со 24:22 ја победи Србија за да ги освои првите поени на Светското првенство во ракомет во Германија и Данска, за речиси сигурно да ги уништи шансите на „орлите“ за втора рунда, додека во нашата група, Исланд без мака со 36:18 го совлада Бахреин за да потврди дека ќе биде најголемата пречка на Македонија за пласман понатаму.
Бразилците почнаа „фуриозно“ и имаа предност од 10:5 по неполни 20 минути игра, предност која ја сочуваа и на полувремето (11:14). Во второто полувреме, голманот на Вардар, Дејан Милосављев со неколку одбрани ги врати Србите во игра, за во драматичниот финиш, Србите да се вратат од 19:22 на 21:22, меѓутоа на крајот победата отиде кај јужноамериканците. Толедо со пет гола беше најдобар кај победниците, додека Радивојевиќ и Марсениќ имаа исто толку голови за Србија.
Исланд јасно стави на знаење дека оди на втора рунда на Мундијалот, откако со 38:16 го „збриша“ Бахреин за први поени на шампионатот по поразите од Шпанија и од Хрватска. Арнор Гунарсон беше фантастичен со осум голови, додека пет имаше Гудмундсон.
Фото: ЕПА
СВЕТСКО ПРВЕНСТВО ГЕРМАНИЈА/ДАНСКА, 3.КОЛО
ГРУПА А
Србија – Бразил 22:24 (11:14)
Русија – Германија 18.00 ч.
Франција – Кореја 20.30 ч.
Табела: 1.Германија 4, 2.Франција 4, 3.Русија 3, 4.Бразил 2, 5.Србија 1, 6.Кореја 0
ГРУПА Б
Исланд – Бахреин 36:18 (16:10)
Македонија – Хрватска 18.00 ч.
Шпанија – Јапонија 20.30 ч.
Табела: 1.Шпанија 4, 2.Хрватска 4, 3.Македонија 4, 5.Исланд 2, 5.Јапонија0 , 6.Бахреин 0
ГРУПА Ц
Тунис – Чиле 36:30 (18:15)
Норвешка – Австрија 17.30 ч.
Данска – Саудиска Арабија 20.15 ч.
Табела: 1.Данска 4, 2.Норвешка 4, 3.Австрија 2, 4.Тунис 2, 5.Чиле 2, 6.С.Арабија 0
ГРУПА Д
Унгарија – Катар 32:26 (16:11)
Аргентина – Египет 18.00 ч.
Шведска – Ангола 20.30 ч.
Табела: 1.Унгарија 5, 2.Шведска 4, 3.Катар 2, 4.Ангола 2, 5.Аргентина 1, 6.Египет 0
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Клубовите се против – Шведска нема да воведе ВАР
Системот за видео анализа (ВАР) нема да биде воведен во Шведска, откако на оваа идеа се спротивтавиле фудбалските клубови, изјави во петокот претседателот на Шведската фудбалска федерација (SvFF), Фредрик Рајнфелд.
ВАР постојано беше во центарот на контроверзноста во лигите каде што беше воведен, со поплаки поврзани со неговата обемна анализа и одложувања кои често траат неколку минути.
Во јули 2023 година, Шведската професионална фудбалска лига, која ги претставува клубовите во првите две дивизии на шведскиот фудбал, соопшти дека мнозинството клубови во земјата „активно се противат“ на воведувањето на ВАР.
Рајнфелд, кој минатата година рече дека ВАР е „иднината“, беше критикуван од навивачите за неговиот став по ова прашање.
„Ако броев правилно, имаме 18 елитни клубови и два региони кои рекоа дека не сакаат да воведат ВАР. Ние тоа го почитуваме. Поради тоа не излеговме со овој предлог на претходниот состанок, а тоа нема да се случи ниту во иднина. Јас сум за почитување на демократските правила на играта“, изјави Рајнфелд, инаку поранешниот премиер на Шведска.
Спорт
Иџе во поход по нова европска титула: „Очекувам добра трка“
Трикратниот европски шампион, Игор Стефановски Иџе овој викенд со трката во Австрија започнува нова сезона во која ќе се обиде да стигне до четвртата титула во Европскиот шампионат на ридски патеки (еHC).
Летечкиот Македонец, Игор Стефановски викендов пред нов предизвик. Во Австрија, на патеката Рекбер тој ќе го започне својот најнов поход на Европскиот шампионат на ридски патеки, кој и годинава има 10 трки. Шампионатот започнува на 28.04.2024, а ќе заврши во септември со трката во Хрватска.
Стефановски и оваа сезона не ги крие своите шампионски амбиции, за кои верува дека ќе може да се реализираат, особено затоа што годинава на патеката ќе управува со новиот автомобилски ѕвер од Ферари 488 B8, специјално дизајниран за овие патеки.
„Очекувам добра трка. Посакувам да постигнеме одличен резултат. Би сакал да се заблагодарам на мојот тим, како и на тие кои го препознаа потенцијалот и ме поддржуваат за натпреварувањата во оваа сезона, особено моите спонзори кои веруваат во мојот потенцијал “- вели Стефановски.
Минатата година Иџе во текот на целата сезона беше во сигурна доминација со седум победи на 10 трки.
Спорт
Хулкенберг од наредната сезона во Заубер
Германскиот автомобилист Нико Хулкенберг од 2025 година, ќе има нов работодавец. 36-годишникот ќе вози за тимот на Кик Заубер.
„Среќен сум што возам за Кик Заубер од 2025 година и што во иднина ќе го претставувам германскиот производител на патеките во Ф1“, објави Нико Хулкенберг на социјалните мрежи.
Од 2026 година во Заубер влегува германскиот производител Ауди.
Хулкенберг е член на тимот на Хас во тековната сезона, а неодамна беше објавено дека нема да ја продолжи соработката со американскиот тим.
„Хулк“ дебитираше во Формула 1 во 2010 година како возач на Вилијамс на Големата награда на Бахреин. Во меѓувреме освои една пол-позиција.
Во претходната сезона, Хулкенберг го заврши натпреварувањето на 16. место во генералниот пласман во Ф1 со девет бодови.