Спорт
Дводневен вело-фест во Конче и Мантово

Претстојниот викенд, на 8 и 9 јули, ќе се одржи дводневниот велосипедски настан „Авантурите на Конче и Мантово“, на езерото Мантово во општина Конче.
Во рамките на овој вело-фест ќе се одржат две велосипедски тури, кои ќе бидат надополнети со интересна програма.
В сабота, покрај велосипедската тура околу езерото Мантово и можноста учесниците да кампуваат на брегот на езерото, во програмата се предвидени саем на локални производи и културно-уметничка програма составени од настапи на фолклорни ансамбли, диџеј и бенд во живо.
В недела е предвидена главната велосипедска тура во должина од 56 километри по маркирани патеки низ природните предели на општината Конче, кои првпат ќе им станат достапни на посетителите на настанот.
Се очекува на настанот да земат учество над двесте велосипедисти, а за сите заинтересирани пријавувањето е сè уште отворено и може да се направи преку веб-страницата prvdovrv.mk.
Учеството е целосно бесплатно и покрај наведените содржини, за учесниците се обезбедени и оброци, пијалаци, маички и сувенири.
Настанот е наменет за сите оние што рекреативно возат планински велосипед, кои се чувствуваат физички подготвени за повеќечасовно возење во планинско-ридски предели и кои поседуваат неопходна опрема за ваков тип на возење.
Коорганизатор на настанот е здружението за спорт и рекреација „Прв до врв“ од Скопје, а тој е дел од проектот Netoural, кој е кофинансиран од Европската Унија преку ИПА-програмата „Интеррег“ за прекугранична соработка со Грција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Гвардиола: Го отпишав тој гад, а потоа даде 200 гола

Пеп Гвардиола беше гостин на YouTube каналот „xBuyer“, кој го водат браќата Хавиер и Ерик Руиз и има 5,7 милиони претплатници.
Домаќините го замолија да им даде совет на младите ѕвезди за да не се занесат премногу, а Пеп одговори вака: „Немам многу да им кажам на младите генерации денес. Ние страдавме многу повеќе. Навистина ми беше тешко. Доаѓате на Камп Ноу на прес-конференција, а има 50 новинари кои ве критикуваат…
Но, имавме ветерани кои нè штитеа. Покрај тоа, тие знаеја како да ние „удрат по прстите“. Тоа е најдобриот начин да се учи. Но, морам да додадам дека ни беше полесно во смисла дека немавме социјални мрежи како што имаат денешните млади фудбалери“.
Пеп се осврна на сегашната генерација млади ѕвезди на Барселона: „Тие играат фудбал како да се на училишно игралиште. Ги гледам тие 17-годишници и 19-годишници како играат против Реал на „Бернабеу“ и во полуфиналето на Лигата на шампионите како да се на училишно игралиште“.
Конечно, Гвардиола беше замолен да открие анегдота од неговата богата кариера што секогаш му тера да се насмее.
„Многу го сакам Серхио Агуеро. Тој е еден од најскромните великани што ги познавам. Тој го постигна најважниот гол во историјата на Сити. Благодарение на тој гол, со кој ја освои првата англиска титула во историјата на клубот, Сити почна да верува.
Се сеќавам на денот кога му кажав на Агуеро дека нема да му го обновиме договорот. Ми беше многу тешко да му кажам дека е отпишан. А потоа подоцна на тренингот тој ден, тој гад постигнува 200 гола! Имаше лице кое ми говореше: „Сега ќе му покажам на овој Ци*ан… 200 гола!“ Му реков: „Серхио, ќе ти го продолжиме договорот, згрешив!“ А потоа во последниот натпревар постигна два гола. Беше привилегија да го тренирам Агуеро. Тој беше уникатен талент.“
Спорт
Најпродуктивниот напаѓач во светот стапи во штрајк

Виктор Ѓокерес, извонредниот напаѓач на Спортинг, стапи во штрајк. Нема да доаѓа на тренинзите на шампионите на Португалија до понатамошно известување.
Шведскиот репрезентативец имал договор со раководството на клубот дека ќе биде продаден доколку некој понуди обештетување од 75 милиони евра.
Сепак, челниците на тимот од Лисабон се предомислија и бараат повеќе пари. Според извештаите, претседателот сега сака 100 милиони евра за неговата продажба, што е премногу, дури и за најбогатите тимови.
Поради ова, Ѓокерес се одлучил за радикален потег, се додека не ги принуди луѓето од Спортинг да ја променат својата одлука. Арсенал и Манчестер јунајтед покажаа најголем интерес за напаѓачот.
Минатата сезона, Ѓокерес постигна 54 гола, а за две сезони, вкупно 97 во 102 натпревари за Спортинг. Во шампионатот на Португалија, тој ја погоди мрежата неверојатни 39 пати во 33 натпревари, што го прави најпродуктивен играч во Европа.
Тој пристигна во Лисабон во 2023 година од Ковентри за 23 милиони евра.
Спорт
Леклер размислува да го напушти Ферари

Возачот на Ферари, Шарл Леклер, сериозно ја разгледува можноста да го напушти италијанскиот тим, објавува „Кориере дела Сера“.
Иако неговиот договор со „Скудерија“ трае до 2029 година, Леклер има клаузула што му дозволува да ја раскине соработката во летото 2026 година.
Се вели дека Леклер се сомнева дека Ферари ќе остане конкурентен откако ќе стапат во сила новите правила во Формула 1. Моментално, Ферари е втор во шампионатот на конструктори по девет трки, додека 28-годишниот Леклер е петти во пласманот на возачи.
Неговиот колега, седумкратниот светски шампион Луис Хамилтон, е на шестото место.
Леклер дебитираше во Формула 1 во болидот на Заубер во 2018 година. Следната година тој пристигна во Ферари, заменувајќи го Кими Раиконен. Во својата прва сезона во црвениот автомобил, тој победи на трките во Белгија (Спа) и Италија (Монца), и стана најмладиот возач што победил на трка за Ферари.
Тој забележа пет победи со 23 пол позиции. Својот најдобар вкупен пласман го постигна во 2022 година, кога го освои второто место.
Првенството во Формула 1 продолжува викендов со трката за Големата награда на Канада.