Селекторот на Шкотска, Стив Кларк, ги повика навивачите да не се задолжуваат за да го следат тимот на претстојното Светско првенство во САД, Канада и Мексико.

Се очекува осум проценти од билетите да им бидат достапни на навивачите на Шкотска за натпреварите против Хаити и Мароко во Бостон и против Бразил во Мајами, во групната фаза на Светското првенство. Шкотската фудбалска асоцијација изрази надеж дека бројот на билети за шкотските навивачи ќе се зголеми.

Меѓународната фудбалска федерација (ФИФА) беше критикувана поради прескапите билети за турнирот, кој ќе се одржи од 11 јуни до 13 јули 2026 година. И селекторот на Шкотска смета дека билетите се скапи.

„Ќе биде скапо. Но, секако е скапо да се оди во Америка. Билетите се скапи. Ако можете да одите таму, ако можете да си дозволите да одите таму, тоа е фантастично, но не се задолжувајте премногу за да одите. Тоа е турнир на ФИФА, тие одлучуваат што ќе одлучат“, изјави Кларк за Би-Би-Си Шкотска.

Цените на билетите за натпреварот против Хаити ќе бидат 134, 298 и 372 фунти, додека за натпреварот против Мароко ќе чинат 136, 320 и 447 фунти.

Цените на билетите за дуелот со петкратниот светски шампион Бразил, на 24 јули се 198, 373 и 523 фунти. Шкотската асоцијација доби 3.736 билети за тој натпревар.

Кларк рече дека се надева оти навивачите „кои патуваат на далечни места“ ќе можат да добијат билети по прифатливи цени бидејќи „заслужуваат да бидат таму“.

Foto/ depositphotos

Велосипедот што словенечкиот велосипедист Тадеј Погачар го возеше на овогодинешниот Тур д’Франс беше продаден на јавна аукција за огромна сума.

На 22 јули, Погачар се појави на почетокот на 16-та етапа од Тур д’Франс во Монпелје облечен во жолта маица, но и со велосипед кој веднаш го привлече вниманието на целиот свет.

Овој уникатен колекционерски предмет неодамна беше продаден за 163.719,51 евра.

Велосипедот беше понуден на аукцијата на „Сотби“, а аукцијата заврши во петокот кратко по 16:30 часот.

Новиот сопственик издвои 190.500 долари за велосипедот, односно точно 163.719,51 евра.

За споредба, стандардниот модел „Colnago Y1Rs“, на продажба чини околу 15.000 евра, што значи дека велосипедот на Погачар бил платен повеќе од десет пати поскапо, првенствено поради фактот што го возел шампионот.

За време на аукцијата, велосипедот бил изложен во луксузниот одморалиште на островот „St. Regis Saadiyat“ во Абу Даби.

Карактеристичната рамка од карбон со видлива завршна обработка и прецизно изработените детали одразуваат мешавина од супериорен инженеринг и естетика, прилагодени на возачот кој тогаш бркаше победа на Тур д’Франс.

Погачар на крајот го освои Турот, дополнително зацврстувајќи го своето место во историјата на велосипедизмот.

Потоа, токму овој велосипед го користел во своите најголеми победи на Светското првенство, Европското првенство и кога ја освои петтата последователна титула на Ил Ломбардија.

Велосипедот е „Colnago Y1Rs“, во варијантата со црн карбон, со тежина од малку повеќе од 7 килограми, опремен со група „Shimano Dura-Ace Di2“ со 22 брзини и тркала „ENVE SES 4.5 Pro“.

Иако 190.500 долари изгледаат импресивно, ова не е рекорд за велосипед продаден на аукција.

Најскапиот останува „Trek Madonna Butterfly“ создаден од Демиен Хирст и користен од Ленс Армстронг, исто така на Тур д’Франс.

Тој велосипед достигна цена од дури 500.000 долари на аукција за Фондацијата „LiveStrong“.

Патем, тој велосипед беше украсен со вистински крилја од пеперутки, што предизвика бес кај активистите за права на животните.

Foto/ depositphotos

Спектакуларен натпревар, во 16-то коло во Премиер лигата, одиграа Манчестер Јунајтед и Борнмут. Пресметката на „Олд Трафорд“ заврши без победник 4:4.

Манчестер Јунајтед во првиот дел водеа со 1:0 и 2:1, во втроиот Борнмут направија пресврт за 2:3, на десет минути до крајот Јунајтед возврати со два гола за 4:3, на крајот Крупи во 84-та минута ги постави конечните 4:4.

Рубен Аморим, стратегот на Јунајтед, не беше премногу задоволен од резултатот, бидејќи неговиот тим водеше три пати.

„Беше забавно за сите што го гледаа овој натпревар. Почнавме одлично, а потоа имавме влеговме во „црна дупка“ на почетокот на второто полувреме. Се вративме, водевме со 4:3, а потоа мораше мирно да го завршиме натпреварот. Не успеавме и тоа е малку фрустрирачки“, рече португалскиот стручњак.

Јунајтед сега го очекуваат нови проблеми, бидејќи Мбеумо, Мазрауи и Дијало ќе играат на Африканскиот куп на нации.

„Забавно е кога си менаџер. Мора да најдеш решенија со играчите што ги имаш. Така е. Без кукање, ова е можност да ги збиеме редовите и да бидеме уште подобри“, истакна Аморим.

Foto/ depositphotos