Спорт
ШК Алкалоид по третпат до европската вицешампионска титула!
Во последното седмо коло од Европскиот клупски куп, кој се играше на грчкиот остров Родос, шахистите на Алкалоид забележаа убедлива победа од 4,5 : 1,5 над најсилниот претставник на Израел, Ришон ле Цион, кој е седми носител на турнирот според почетниот рејтинг, со што ја освоија втората позиција на табелата, односно вицешампионската тутула!
Овој турнир е најсилен во клупската конкуренција на Стариот континент, поради што често се споредува со Лигата на шампионите, а ШК Алкалоид триумфираше на него во 2016 година, додека, пак, во 2017, 2024 и во 2025 година го освои второто место. Импресивен резултат за клубот кој бележи 49 години постоење и шаховски раст, континуирано поддржуван од компанијата „Алкалоид“. – Нималку лесна победа во последното коло против тим кој може да се нарече елитен, па по три часа игра резултатската неизвесност беше присутна.

На првите четири табли не гледавме шанса за победа, но нештата се свртеа откако на петтата табла Александар Инѓиќ (2.618) со бели фигури успеа да го надигра Евгени Занан (2.504). Постепено и на шестата табла Абиманју Пураник го скрши отпорот на ИМ Ор Бронштајн (2.460), па на тој начин започна да се наѕира победата која беше вредна медал. Тимот покажа карактер по вчерашниот минимален пораз од ривалите за тронот, со што беше демонстриран борбен и победнички дух против тврдокорниот противник – коментираше ВМ Влатко Богдановски, кој е капитен на интернационалниот состав на ШК Алкалоид.
Израелскиот тим беше предводен од легендарниот Борис Гељфанд (2.636), поранешен учесник во меч за светски првак, кој успеа со голем жар да ја одржи послабата позиција во сицилијанска одбрана на првата табла против Арјун Еригаиси (2.773). Ји Веи (2.754) имаше црни фигури против уште еден елитен израелски велемајстор, Максим Родштајн (2.647), кој годинава на поединечното Европско првенство го делеше првото место. Членот на ШК Алкалоид солидно се бранеше, а кога противникот ја мина црвената линија обидувајќи се да игра на победа, со целосен пресврт успеа да донесе цел поен за висок резултат.

И на третата табла Јангји Ју (2.720) не успеа да создаде конкретна предност бидејќи Ницан Штајнберг (2.554) одигра на врвно ниво. Најдолго траеше дуелот на Читамбарам Аравинд (2.711) на четвртата табла, кој играше 70 потези, и неговиот противник Јахли Соколовски (2.539), кој ги преживеа сите напади. Ји Веи и Абиманју Пураник дополнително освоија и сребрени медали како најуспешни играчи на втората и на шестата табла, додека, пак, Читамбарам Аравинд ја присвои бронзата на четвртата табла.
Романскиот претставник СуперЧес, предводен од светскиот првак Гукеш, иако четврти носител, на крајот како единствен непоразен тим и со само една загубена партија (и тоа во последното 7. коло) за првпат го освојува пехарот во Европскиот клупски куп со максимални 14 бодови. ШК Алкалоид на второто место има 12 бодови, колку и чешкиот Нови Бор, кој играше само со македонскиот шампион меѓу ривалите од првата петорка и го загуби тој дуел, но, сепак, на крајот стигна до шест победи и до бронзен медал. Идната година предвидено е домаќин на Европскиот клупски куп во шах да биде Црна Гора.

(ПР)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Капело: Интер неорганизиран, ранлив, Наполи конкретен, подобар без Де Брујне
Наполи во дербиот на колото во Серија А го победи Интер со 3:1 и се врати на челната позиција на табелата.
Де брујне од пенал го постигна првиот гол, потоа Мектоминеј со спектакуларен удар ја зголеми предноста на Наполитанците кој ја намали од пенал Чалханоглу, а со брилијантна соло акција Ангиса стави точка на натпреварот.
Дербито на „Диего Марадона“ за „Газета дело Спорт“ го анализираше легендарниот тренер, Фабио Капело. Дон Фабио смета дека Наполи изгледал на теренот како Интер „компактен, решителен, беа подобри без Де Брујне“.
„Натпреварот помеѓу Наполи и Интер беше одраз на Серија А, каде што сè се менува толку брзо. Перцепцијата за двата тима исто така се промени. По последниот свиреж, имав впечаток дека работите се свртеа. Наполи изгледаше како Интер што го гледавме до вчера. Компактен и решителен тим.
Интер изгледаше како Наполи во натпреварите против Торино и ПСВ Ајндховен. Неорганизиран, ранлив, тим кој страда од криза на идентитетот. Точно, текот на играта беше под влијание на непостоечки пенал, но тоа не е и не може да биде изговор за „нероаѕурите“.
Тие покажаа гордост со фактот дека Алесандро Бастони ја погоди гредата, а Дензел Дамфрис стативата. Покрај тоа Интер беше непрепознатлив, секоја изгубена топка значеше контранапад за Наполи“, напиша Дон Фабио во коментар за „Газета дело Спорт“.
И покрај фактот дека европскиот вицешампион имаше речиси двојно повеќе шутеви од „Наполитанците“ (15-7) и многу повеќе посед на топката (57 проценти, наспроти 43 на домашниот тим), тимот на Кристијан Киву не изгледаше толку убедливо како во претходните натпревари. Резултатот беше уште еден пораз од директен конкурент за врвот на табелата, по Јувентус.
„Она што ме изненади најмногу беше недостатокот на рамнотежа меѓу линиите. Тоа беше силата која му донесе на Интер седум последователни победи. Можеби победата во Лигата на шампионите против Сен Жилоа му даде премногу самодоверба на тимот, а синоќа ги видов резервите кои одзедоа повеќе отколку што му донесоа на тимот. Премногу ја држеа топката во своите нозе наместо да бараат длабочина.“
Како еден од најважните моменти во натпреварот, Капело ја издвои повредата на Кевин Де Брујне. Белгиецот се повреди во моментот кога го шутна пеналот во 33-та минута. Многумина очекуваа Наполи да потоне по повредата на Белгиецот, но се случи спротивното.
„Тие повторно се пронајдоа, ја видовме енергијата што ги красеше претходната сезона. Успеаја да ги избркаат духовите што ги прогонуваа поради поразите во Торино и Ајндховен. Се вратија на првото место на табелата и тоа во дуел против директен конкурент. Ова е голема победа и за Конте, тој најде начин да го подигне моралот на тимот. Звучи парадоксално но откако излезе Де Брујне, Наполи изгледа подобро, но така беше. Видовме солиден и стабилен тим со убиствените контра-напади што ги имплементираа Замбо Ангиса и Скот Мектоминеј“.
Спорт
Детвилер во сериозна состојба по страшната несреќа со Руеда
Швајцарскиот мотоциклист Ноа Детвилер е во тешка состојба и го чекаат неколку операции по сериозната несреќа што ја доживеа во излезниот круг пред Големата награда на Малезија во категоријата Мото3.
Овогодинешниот шампион во категоријата Мото3, Хозе Антонио Руеда, кој го предизвика инцидентот во кој двајцата беа повредени, е буден и свесен.
Тимот на Детвилер, „CIP Green Power“, не објави многу детали за состојбата на младиот Швајцарец, освен дека мора да се подложи на операција.
„Ноа е во добри раце и ве молиме сите да ја почитувате неговата приватност. Во овој момент нема да даваме повеќе информации. Ноа е вистински борец и целиот тим е со него“, се вели во соопштението на францускиот тим.
Руеда се здоби со фрактура на раката и се здоби со бројни контузии во хорор несреќата, но добрата вест е дека прегледите во болницата покажале дека нема сериозни повреди на главата и телото.

Инцидентот на патеката „Сепанг“ се случи кога возачите тргнуваа кон стартниот редослед, кога Руеда со голема брзина се судри со Детвилер.
Младиот Швајцарец се движеше бавно на тркачката линија поради проблеми со својот мотор, во тој момент Руеда необјасниво се судри со него.
Двајцата завршија на асвалтот, дирекцијата на трката веднаш истакна црвено знаме. На самата патека на двајцата им беше укажана прва помош, по што беа префрлени во болница.
Поради сериозноста на инцидентот, „Топспорт“, нема да објави видео од моментот кога се случи инцидентот.
Спорт
(Видео) Кристијано не запира, 950 голови во кариерата
Португалскиот фудбалер Кристијано Роналдо направи нов чекор кон бројката од 1.000 голови во кариерата.
Неговиот Ал Наср ја забележа шестата победа во исто толку натпревари во новата сезона на Про лигата. Во шестата рунда, Ал Наср го победи Ал Хазем (2:0).
Жоао Феликс ја најави победата на Ал Наср со својот деветти гол во само шест натпревари, додека Роналдо ја заврши работата во 88-та минута.
Тоа беше 950-от гол во кариерата на Кристијано и шести во лигата во сезона која се чини дека конечно ќе биде онаа што ќе ја освои титулата во Саудиска Арабија.
Во 2025 година, на 40-годишна возраст, Роналдо веќе постигна 34 гола и има три асистенции во 38 натпревари.
Неговиот Ал Наср е лидер со 18 бода, три повеќе од Ал Тавон.

