Роберт Федерер, таткото на Роџер, по завршувањето на кариерата на неговиот син, проговори за најтешките порази што ги доживеал Швајцарецот на Грен слем турнирите.

Посебно го апострофираше поразот во финалето на Вимблдон во 2019 година кога Федерер пропушти две меч топки против Новак Ѓоковиќ. Во тој момент Федерер имаше 20, Надал 18, а Новак 15 големи титули.

После тоа, Швајцарецот веќе не беше во ситуација да се бори за трофеј на Грен слем турнирите.

„Новак ни нанесе поголема болка од Рафа. Тој Лондон во 2019 година, кога Роџер имаше две меч топки на сервис, е особено за паметење. Сите ја видовме таа титула во неговите раце“, изјави Федерер сениор.

Роберт Федерер смета дека трите најтешки порази на Грен слем турнирите, Роџер ги доживеал од Ѓоковиќ. И во тие мечеви Роџер не реализираше меч топки.

„Тешки моменти беа полуфиналните мечеви на Ју-ес опен во 2010 и 2011 година против Новак. И тогаш пропушти две можност да ја заврши работата“, изјави Роберт Федерер.

Роџер ја заврши кариерата со 20 Грен слем титули. Надал моментално има 22, а Ѓоковиќ 21.

Дани Себаљос решил наредното лето како слободен играч да го напушти Реал. Иако Карло Анчелоти го користи во ротацијата и вели дека има доверба во него, тоа не е она што тој го сака.

Себаљос сака да има важна улога во тимот и е подготвен да замине.

За него се заинтересирани Бетис и Милан. Паоло Малдини веќе неколку пати истакна дека тоа е профилот на играчот кој им е потребен на актуелните шампиони на Италија.

Себаљос кариерата ја започна во Бетис, во 2017 година како МВП на Европското првенство за играчи до 21 година се пресели во Реал за 16 милиони евра.

Никогаш не успеа да се избори за место во тимот, две сезони додека му траеше договор со Реал ги мина на позајмица во Арсенал.

Сезонава запиша само 124 минути на осум одиграни натпревари за Реал Мадрид.

Германската фудбалска репрезентација најверојатно нема да учествува во квалификациите за ЕВРО 2024 година.

Германците, како домаќини на континенталниот турнир нема да ја прифатат улогата на „гостин“ и ќе играат пријателски натпревари во квалификацискиот период.

Така, Германија нема да го искористи правото за настап во една од квалификациските групи и покрај тоа што веќе го обезбеди своето место на завршниот турнир како организатор.

На пример, Франција го искористи тоа право за Европското првенство во 2016 година, исто како и Катар за Светското првенство во 2022 година.

„Како домаќини веќе се квалификувавме. Ова ни дава поголема флексибилност кога правиме планови за следната година за да можеме да се подготвиме против силни тимови“, изјави директорот на германската репрезентација Оливер Бироф.

Германија се надеваше дека како добра подготовка може да го има завршниот турнир од Лигата на нации во јуни следната година, но не успеа да го освои првото место во „групата на смртта“, во која беа Италија, Унгарија и Англија.

Ждрепката за квалификациите е закажана за 9. октомври во Франкфурт, а квалификациите ќе започнат во март следната година.