Спорт
Алиоски ги пропушта Австрија и Израел, неизвесен е настапот на Тричковски

Македонската репрезентација денеска ги започнува подготовките за последните два квалификациски натпревари од циклусот квалификации за пласман на ЕП 2020.
Селекторот Игор Ангеловски се соочува со проблеми околу составот, бидејќи Езџан Алиоски поради повреда нема да биде дел од тимот, а извесно е дека овие натпревари, поради повреда ќе ги пропушти и Иван Тричковски.
Поради повреда повик за овие два натпревари воопшто не доби Аријан Адеми.
Поради овие проблеми селекторот во националниот тим го повика фудбалерот на Ружомберок, Тихомир Костадинов.
„Дарко Велковски и Стефан Ристовски доаѓаат дефинитивно, па потоа ќе видиме колку и дали можат. Исто така Муслиу, Несторовски и Николов се тука, тие немаат право да играат со Австрија. Најпрво би сакал да можат да настапат и Спировски и Велковски. Не размислувам сега за викање на друг играч. Дефанзивци не ни има премногу во нашиот фудбал. Зајков, Младеновски, Тошевски и Ристевски, тоа е се играчите од кои може да се направи дефанзивна четворка. Адеми има пукнатина на стопалото и мора да паузира.“, рекол Ангеловски кој се надева на добар крај на квалификациите.
„Трети сме, и сакаме да останеме таму. Целта е да освоиме што повеќе бодови и да пробаме што повеќе тактички комбинации за она што претстои во март“, заврши селекторот.
Македонија на 16 ноември ќе гостува во Виена кај Австрија, а на 19 ноември во последниот натпревар од овој циклус ќе го пречека Израел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Каспер Руд: Тешко е да се игра кога сè околу тебе мириса на марихуана

Норвешкиот тенисер Каспер Руд коментираше дека мирисот на марихуана многу му пречи на Отвореното првенство на САД.
Откако употребата на марихуана беше легализирана во Њујорк во 2021 година, Отвореното првенство на САД речиси секоја година го следи истата приказна – тенисерите се жалат на мирисот што доаѓа од трибините и околу терените.
Каспер Руд се пласираше во второто коло на Ју-ес опен со победата над Офнер со 6:1, 6:2, 7:6 (5) по помалку од два часа игра, а моментално 13-от играч во светот призна дека таквата атмосфера сериозно му пречи додека се наоѓа на теренот..
„Најголема деградација на турнирот во Њујорк е што сега сè мириса на марихуана. Дури и во објектите на турнирот. Мора да се помирите со тоа, но тоа не е мојот омилен мирис“, рече Руд.
Тој додаде дека проблемот е особено изразен за време на натпреварите.
„Навистина е иритирачки кога ќе излезете на теренот и ќе почувствувате мирис на некој што пуши џоинт. Не е забавно за играчите, особено кога сте уморни и мора да го вдишувате тој мирис. За жал, не можеме ништо да направиме додека не се промени законот, а се сомневам дека тоа ќе се случи“, нагласи Норвежанецот.
Спорт
Лукас Васкез се сели во Леверкузен

Шпанскиот десен бек Лукас Васкез (34) денес треба официјално да стане нов играч на Баер Леверкузен. Фабрицио Романо напиша: „Постигнат е договор со поранешниот десен бек на Реал Мадрид, кој доаѓа во Баер како слободен агент. Лекарските прегледи веќе се извршени тајно, а договорот ќе биде потпишан во вторник.“
Васкез неодамна се збогува со Реал по 18 години во шпанската престолнина. Неговото збогување се случи во сенка на заминувањето на Лука Модриќ, но Васкез исто така беше многу ценет во клубот.
Ова лето, тој ќе ги замени местата со Чаби Алонсо, кој пристигна во Реал од Баер. Тимот од Германија сега го предводи Ерик тен Хаг.
Васкез пристигна во Реал Мадрид во 2007 година како 16-годишник и играше во сите категории на младинската академија, од тимот до 17 години до Кастиља. По една сезона на позајмица во Еспањол, тој го имаше своето деби за првиот тим на Реал Мадрид во септември 2015 година. Оттогаш, тој има 402 настапи за Реал во текот на 10 сезони, еден од најуспешните периоди во историјата на Реал Мадрид.
Тој освои 23 титули со клубот. Освои пет Лиги на шампиони и светски клупски првенства, четири европски Суперкупа, еден шпански Суперкуп и една титула во шпанското првенство, како и еден трофеј во Кралскиот Куп.
Спорт
Украдени велосипеди вредни 250.000 евра

Велосипедскиот тим Висма, тимот на лидерот на Вуелта, Данецот Јонас Вингегор, се соочи со голем проблем. Преку ноќ од камионот на механичарот биле украдени велосипеди. .
Италијанската полиција, во земјата каде што се одржуваат воведните етапи на Вуелта, го истражува случајот и вели дека се украдени „неколку велосипеди“. Медиумите објавија дека украдени се 18 велосипеди чија вредност изнесува 250.000 евра.
„Нашите механичари работат многу напорно за да се осигурат дека тимот е целосно подготвен за третата етапа“, се вели во соопштението на тимот.
Вингегор ја зеде црвената маичка за лидерот во трката, со победата на етапата во недела.
Двократниот победник на Тур де Франс сепак ќе биде без помошта на својотколега Аксел Зингл во остатокот од трката, кој мораше да се повлече по тешкиот пад на дождливата етапа во неделата.
Третата етапа е долга 134,6 километри и завршува со искачување до Церес во италијанските Алпи, северозападно од Торино.
Вингегор, кој веќе двапати го освои Тур д’Франс, се смета за главен фаворит на овогодинешната Вуелта, бидејќи актуелниот победник на Тур д’Франс, Тадеј Погачар, и четирикратниот шампион на Вуелта, Примож Роглич не учествуваат на оваа трка.