Спорт
Анчелоти обвинет за затајување данок

Карло Анчелоти, тренерот на Реал Мадрид, се соочува со сериозни обвинувања во Шпанија.
Италијанскиот стручњак следната недела ќе се појави пред суд за затајување данок, а јавниот обвинител тврди дека станува збор за сума поголема од еден милион евра. Анчелоти го негираше обвинението и ќе се брани на суд.
Се очекува Анчелоти да оди на судење на 2 април, каде што ќе треба да ја објасни сумата од 1.062.079 евра, која наводно настанала поради неправилности во даночните пријави за 2014 година (386.361 евра) и 2015 година (675.718 евра). Веќе е запленет неговиот имот во износ од 1.217.958,24 евра, со што долгот е подмирен.
Тренерот на Реал призна дека платил недоволен износ на даноци во 2014 година поради грешка на неговите сметководители, додека во 2015 година негираше какво било кривично дело бидејќи не поминал минимум 183 дена во земјата.
„Тоа е стара приказна. Тие веруваат дека сум бил жител во 2015 година, а не сум бил. Казната е платена и сè е сега во рацете на моите адвокати. Верувам во мојата невиност, ќе видиме што ќе одлучат судиите”, изјави претходно Анчелоти.
Шпанското обвинителство бара затворска казна од четири години и девет месеци доколку биде прогласен за виновен.
Само еден ден по судењето, Анчелоти има реванш полуфинален натпревар од Копа дел Реј против Реал Сосиедад.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Руне и повредата посилни од Алкараз

Данскиот тенисер Холгер Руне ја освои титулата на турнирот од серијата 500 во Барселона.
Руне стигна до петтиот трофеј во кариерата откако во финалето го совлада Карлос Алкараз со 7:6 (6), 6:2.
Алкараз, победникот во 2022 и 2023 година, го мачеше и повреда на мускулот на десната нога, поради која не можеше да биде на ниво, особено во вториот сет.
Првиот сет беше драматичен, Руне најпрво ја надополни негативата од брејк, а потоа пропушти две сет-токи, пред да го материјализира петтата во тај-брејкот.
Алкараз побара медицински тајм-аут во средината на вториот сет, Руне потоа направи брејк, па уште еден и ги реши дилемите околу победникот.
Алкараз се држеше до крајот, но практично статираше на теренот.
По овој пораз Алкараз од утре ќе падне на втората позиција на АТП листата.
Спорт
Пјастри ја покори Џеда и ја презеде лидерската позиција во шампионатот

Возачот на Мекларен, Оскар Пјастри, триумфираше на Големата награда на Саудиска Арабија, петта трка од овогодинешниот шампионат во Формула 1.
Австралиецот ја извојува втората победа по ред на улиците на Џеда, откако победи во Бахреин пред една недела, а трета сезонава.
Најблиску до Пјастри беше Макс Ферстапен во болидот на Ред Бул, кој заостана речиси три секунди, додека возачот на Ферари, Шарл Леклер се најде на третото скалило на подиумот.
До трката во Џеда, лидерот во генералниот поредок Ландо Норис успеа да се пробие до четвртата позиција откако стартуваше од 10. место, бидејќи во саботата направи голема грешка во квалификациите.
Пјастри на стартот го мина Ферстапен, кој со прекршок се врати на првото место, но не ја врати позицијата. Набргу потоа, трката беше забавена поради излегувањето на безбедносното возило на патеката, а управата на трката го казни Верстапен со додавање пет секунди бидејќи стекна неправедна предност, што го чинеше испад од борбата за триумф.
Покрај победата на Пјастри, петтата трка сезонава ја одбележа и инцидент на самиот старт, но и неколку маестрални претекнувања. Инцидентот што доведе до излез на безбедносното возило на патеката петта година по ред се случи помеѓу Јуки Цунода во болидот на Ред Бул и возачот на Алпин, Пјер Гасли. Болидот на Французинот беше смачкан по контактот, додека Цунода ја продолжи трката, но многу брзо се повлече во боксот.
По грешката во квалификациите, Норис имаше поинаква стратегија во споредба со повеќето возачи, бидејќи стартуваше со тврди гуми и го извлече максимумот од тоа. Слично направи и Шарл Леклер, кој извлече максимум од средно тврдите пенвматици, а кога се префрли на тврди лесно го мина Џорџ Расел.
Расел заврши петти, 18 секунди зад Леклер и седум и пол пред Кими Антонели. Бодови освоија и Луис Хамилтон, Карлос Саинц јуниор и Алекс Албон, како и Исак Хајар од Расинг Булс.
По новиот триумф, Пјастри го презеде водството во генералниот поредок со 99 бодови, Норис е втор со 10 помалку, додека заостанувањето на Ферстапен во однос на Австралиецот е 12 бода.
Овогодинешниот шампионат во Формула 1 продолжува со Големата награда на Мајами од 2 до 4 мај.
Спорт
(Видео) Болоња во 94.минута му пресуди на Интер

Фудбалерите на Болоња го победија Интер (1:0) во 33.коло во Серија А.
На овој расплет најмногу се радува Наполи, кој сега има ист број бодови како „нероаѕурите“, со подобра гол-разлика тимот од Милано, бидејќи скорот меѓу нив е изедначен.
Уморен од Лигата на шампионите, Интер потклекна во четвртата, последна минута од судиското надополнување.
Рикардо Орсолини акробатски ја зафати топката со левата нога по центаршут и го совлада Јан Сомер.
Болоња освои важни бодови на „Ренато Дал’Ара“ против актуелниот шампион и моментално е четврта со 60 бодови, што е бод повеќе од Јувентус, кој допрва треба да гостува во Парма во понеделник.
Во следното коло Интер ја пречекува Рома, додека Болоња ќе гостува кај Удинезе.