Карло Анчелоти ја откри причината зошто си заминал од Пари Сен-Жермен во 2013 година, оценувајќи дека ја загубил довербата во клубот откако му дале ултиматум: „Победи или си отпуштен“ пред меч од Лигата на шампионите со Порто.

Откако со Челси ја освои титулата од Премиерлигата во 2010 година, популарниот Карлето беше на „Паркот на принцовите“ од 2011 до 2013, велејќи дека првично уживал во работата со својот поранешен фудбалер, Леонардо, но дека немал поддршка од управата на клубот. Тој освои една лигашка титула и ги однесе до четврт-финале на ЛШ, каде што загубија од Барселона со правилото „гол-на-гости“, но вели дека мечот од групната фаза против Порто во декември 2012 значел дека мора да си замине.

„Отидов таму поради Леонардо, кого претходно му бев тренер. Тоа беше клуб кој Катар неодамна го купи и ми се допаѓаше проектот. Почнавме со менувањето на стратегијата на тренинзите, со поставување кујна, бидејќи француските фудбалери пристигнуваат на тренинг половина час пред тренинг и заминуваат половина час по крајот. Ми се допаѓаше работата, но не ми веруваа. Пред меч од Лигата на шампионите кој не беше важен бидејќи се пласиравме, загубивме од Ница (2:1) и ми кажаа дека ако не ги победам Порто ќе добијам отказ. Им кажав: ‘Како можете да кажете такво нешто, ја нарушивте довербата’. Решив да си отидам во февруари, иако сакаа да ми дадат нов договор“, вели Анчелоти.

По заминувањето, тој првпат седна на клупата на Реал Мадрид, освојувајќи ја славната „Ла десима“, десеттата титула од ЛШ пред да замине во 2015. По година пауза, тој се врати во Баерн Минхен како наследник на Пеп Гвардиола, па замина по една сезона, по што 18 месеци беше на клупата на Наполи, па година и пол во Евертон, пред да се врати во Реал.