Пари Сен-Жермен стигна до 4:3 победа во дербито на 26. коло во француската Лига 1 против Бордо, иако гостите успеаја на почетокот добро да ги испотат шампионите.

Кореецот Уи-Џо Хванг во 18-тата минута го замолче „Паркот на принцовите“ за водство на „Жирондинците“, пред Париз да се соземе и да направи пресврт со головите на Единсон Кавани во 25. и Маркињос во 45. минута, пред да следува уште едно изненадување во гостите – во последните секунди од полувремето, Пабло успеа да израмни. За Кавани, кој на лето ќе го напушти Париз ова беше јубилеен 200. гол за „светците“.

Второто полувреме, затоа, целосно им припадна на домаќините – Маркињос во 63. минута го врати водството, за Килијан Мбапе само шест минути да зголеми на 4:2. Гостите не се предадоа и Рубен Пардо во 83. минута намали на 4:3 за интересни последни десетина минути од мечот, во кои беше поништен голот на Мауро Икарди, а Нејмар успеа да добие црвен картон.

ПСЖ имаат 65 поени на врвот на Лига 1, дури 13 пред Марсеј, додека Бордо се само 12. со 35 освоени поени.

Атлетико Мадрид успеа да се врати од гол негатива, за 3:1 триумф над Вилјареал на „Ванда метрополитано“ за враќање на третото место во Ла лига, иако со големи 10 поени заостанување зад градскиот ривал Реал Мадрид и 12 зад Барселона.

По импресивната 1:0 победа над Ливерпул во првиот меч од осминафиналето во Лигата на шампионите, работите не почнаа најдобро против „жолтата подморница“, откако Пако Алкасер во 16. минута го совлада Облак за водство на гостите.

Анхел Кореа успеа да израмни пред крајот на полувремето, а по враќањето на Жоао Феликс на теренот во второто полувреме, прво Коке во 64. минута донесе водство за „јорганџиите“, за Феликс десет минути подоцна да ја осигура победата со својот прв гол во Ла лига од септември.

За Вилјареал, ова е прекинување на низата од четири меча без пораз, и тие остануваат на седмото место со 38 поени, пет од место кое води во Лигата на шампионите.

Дејвид Ејрс ја живее можеби најлудата спортска бајка во 2020 година, откако 42-годишниот возач на „Замбони“ (машина која го оддржува мразот мазен на хокеарските натпревари), доби шанса да стане НХЛ голман на една вечер, и целосно ја исполни.

Каролина хуриканс гостуваа кај Торонто мејпл лифс во меч од НХЛ лигата, и кога двајцата голмани им се повредија на натпревар, Ејрс, тој како голман за „итни случаи“ на Торонто доби повик да застане на голот како најстар дебитант во НХЛ лигата.

Ејрс прими голови во првите два удари кои беа упатени, но потоа ги одбрани следните осум, а Каролина стигна до 6:3 победа над Мејпл лифс. Тој инаку работи како резрвен голман на Торонто марлис, подружницата на Мејпл лифс, и возач на „Замбони“ возилото во текот на сезоната.

Дека во Каролина хуриканс го почитуваат тоа што го направи тоа, доволно зборува фактот што тие произведоа дресови со неговото име, а парите од продажбата ќе одат во добротворна фондација за болести на бубрезите – Ејрс пред 15 години имал трансплантација на бубрег.

„Момците беа фантастични. Ми кажаа, ти само забавувај се, без грижа колку гола ќе примиш. Ова е твој момент и оди по него. Публиката во Торонто беше одлична, иако бранев за противничкиот тим. Не ми се верува“, изјави Ејрс.

A memory we’ll all have forever pic.twitter.com/LUxqs8o3Wr

— Carolina Hurricanes (@Canes) February 23, 2020