Фабио Канаваро е назначен за нов селектор на репрезентацијата на Узбекистан, објави Фудбалската федерација на Узбекистан.

Канаваро потпиша договор со ФС Узбекистан во Ташкент, но деталите не беа откриени. Во соопштението се наведува дека Канаваро ќе ја предводи репрезентацијата на оваа земја на претстојното Светско првенство, кое ќе се одржи во 2026 година во САД, Канада и Мексико.

Италијанскиот стручњак го замени Тимур Кападзе на функцијата селектор на Узбекистан.

Во тренерскиот штаб на Канаваро ќе бидат Еугенио Албарела, Франческо Троазе и Антонио Кименти.

Во јуни, фудбалската репрезентација на Узбекистан се квалификуваше за Светското првенство за прв пат во историјата.

Канаваро претходно ги тренираше Динамо Загреб, Удинезе, Беневенто, Гуангжу, Тјанџин, Ал Наср и кинеската репрезентација.

Деветкратниот светски шампион Марк Маркез ќе ги пропушти претстојните трки во Австралија и Малезија поради фрактура на клучна коска. Постариот од браќата Маркез се повреди на трката за Големата награда на Индонезија, кога во првиот круг од патеката го исфрли возачот на Априлија, Марко Бецеки.

На Шпанецот веднаш му беше дијагностицирана фрактура, но во таа прилика беше нагласено дека повеќе ќе се знае кога ќе пристигне во Мадрид и ќе изврши подетални прегледи.

Прегледите во главниот град на Шпанија, покажале дека има фрактура во основата на коракоидниот процес на клучната коска и повреда на лигаментот на рамото. Инаку, новата фрактура нема никаква врска со претходните повреди што ги имаше Шпанецот.

Лекарите кои се грижат за состојбата на Маркез се одлучија за конзервативен пристап кон закрепнувањето, што вклучува одмор и мобилизација на повреденото рамо додека повредата не заздрави, што значи дека новиот шампион сигурно нема да вози во Австралија и Малезија.

Во отсуство на Маркез, се очекува во следните две трки да вози тест-возачот на италијанскиот тим, Микеле Пиро.

Шампионатот во Мото ГП продолжува со Големата награда на Австралија на патеката „Филип Ајленд“ од 17 до 19 октомври.

Легендата на Барселона, Чави, целата кариера ја мина на „Кап Ноу“, како тренер на функцијата се задржа две ипол години. Чави повеќе од една година е без работа и покрај тоа што редовно добива понуди. Пред две недели го поврзуваа со Манчестер Јунајтед, во случај Рубен Аморим да добие отказ.

Во интервју за „Cronache di Spogliatoio“,Чави откри дека во различни фази од неговата активна фудбалска кариера, во два наврати можел да заврши во Милано. Интер покажал сериозен интерс, додека на радарот на Милан бил како тинејџер.

„Бев блиску до напуштање на Барселона двапати. Првиот пат беше Милан. Разговарав со Галијани откако го освоив Светското првенство до 20 години со Шпанија. Росонерите беа навистина заинтересирани за мене, но решив да останам во Барселона. Вториот пат, речиси една деценија подоцна, се јавил и Интер. Имавме лош период во 2008 година во Барселона и многу луѓе ме обвинуваа што не можев да го раздвижам тимот. Интер ме сакаше, Баерн Минхен исто така беше заинтересиран, но на крајот Гвардиола дојде на клупата на првиот тим и сè се промени“.

Легендарниот играч од средниот ред зборуваше и на актуелни теми. Една од нив е Ламин Јамал, кого Чави го претстави во првиот тим и му даде шанса да дебитира за Барселона.

„Тој беше „избран“, може да биде еден од фудбалските генијалци. Сè зависи од него, од неговата амбиција, од неговата страст. На 15 или 16 години, тој дриблаше како професионалец, а ние од тренерскиот штаб секој ден на тренинг се прашувавме кој е најдобар. И тоа најчесто беше тој. Тој правеше посебни работи што нормално ги гледате само кај Нејмар, Меси и играчи од тој калибар. Видов дека е подготвен и не се плашев. Ниту тој не се плашеше, немаше комплекси. Може да направи разлика, она што го прави на негова возраст е прекрасно“, заклучи Чави.