Спорт
Баерн Минхен го сака Јан Зомер како замена за повредениот Нојер
Повредата на Мануел Нојер, која ќе го оддалечи од терените до крајот на сезоната, го натера раководството на Баерн Минхен итно да бара нов голман. Според „Скај Спорт Германија“, изборот паднал на Јан Зомер. Баварците веќе стапиле во контакт со претставници на 33-годишниот гард, кој веќе е во својата деветта сезона во Борусија Менхенгладбах и има солидно искуство во Бундеслигата.
Зомер има договор до крајот на актуелната сезона и може да биде доведен за многу разумна сума. Во оваа фаза тој не преговарал со други клубови.
Во првите денови по веста за повредата на Мануел Нојер се зборуваше дека Баерн Минхен е заинтересиран за хрватскиот голман Доминик Ливаковиќ, но тоа беше демантирано.
Германскиот гигант се обидува да го врати позајмениот играч на Монако, Александар Нубел, но не е сигурно дали двата клуба ќе се договорат. Затоа во преден план е ангажманот на Јан Зомер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Гвардиола: Ви гарантирам дека брзо ќе се извлечеме од оваа криза
Петте порази на Манчестер сити во низа во сите натпреварувања е нешто со што за прв пат во кариерата се соочува менаџерот Пеп Гвардиола. Шпанецот пред вечерашниот дуел со Феенорд во петтото коло од Лигата на шампионите изјави дека верува во подобри денови.
Последниот неуспех „граѓаните“ го претрпеа на натпреварот со Тотенхем. Во саботата на „Етихад“, Тотенхем победи со 4:0.
„Кога започна нашата негативна серија, на сите им кажав дека моја должност и работа е да најдам излез од се. Очигледно е дека сè уште не сум го нашол вистинскиот пат и сè уште го барам. Морам да кажам дека никогаш повеќе не сум имал верба во овој тим. Ќе се справиме брзо, гарантирам. Засилувања во текот на зимата? Кога мојот тим е заедно, без повреди, тогаш апсолутно ништо не му недостига“, изјави Гвардиола.
Голем проблем беше повредата на Родри, официјално најдобриот фудбалер на светот, без кој тимот го нема потребниот биланс на средината на теренот.
„Тешко е да се справиш со фактот дека треба да играш без Родриго, кој беше прогласен за најдобар во светот. Имавме и други повреди, а сега Ковачиќ и Рубен Диас се надвор од терените. Јасно е дека не сме во конфорната зона, но знам дека наскоро ќе дојде фазата кога повторно ќе победуваме“, оптимист е шпанскиот стручњак.
Сити заостанува осум бода зад лидерот Ливерпул во Премиер лигата на кого ќе му гостува во недела. Што се однесува до Лигата на шампионите, тие имаат седум бода од четири кола и се чини дека доаѓањето на Феенорд е идеална можност за прекин на лошата серија.
Спорт
Серхио Рамос преговара за трансфер во Премиер лигата
Серхио Рамос шест месеци е без клуб. Дефанзивецот на крајот од сезоната се раздели со Севилја, го поврзуваа со многу клубови но тој се уште е слободен играч. Изминатите месеци се пишуваше дека се договорил со Бока јуниорс, а пред две недели се поврзуваше со својот поранешен клуб, Реал Мадрид.
Медиумите во Шпанија и Англија објавија дека Рамос е во контакт со Њукасл и дека се водат сериозни преговори и дека има големи шанси искусниот Шпанец да се пресели на „Сент Џејмс Парк“.
Њукасл не ги пружа очекуваните партии оваа сезона, а „страчките“ синоќа повторно ги разочараа своите навивачи бидејќи загубија на домашен терен од Вест Хем (0:2) во натпреварот од 12. коло на Премиершип.
Се пишува дека Њукасл е подготвен да му понуди на Рамос договор до летото 2026 година и дека Шпанецот веќе дал знак дека ќе го прифати бидејќи не сака да го одбие предизвикот да дојде во Премиерлигата.
Спорт
Де Брујне: Или ќе се договориме или ова е мојата последна сезона во Сити
Манчестер сити е во историски лоша серија од пет порази во сите натпреварувања, најлоша во кариерата на Пеп Гвардиола, но тоа не е единствениот проблем со кој треба да се справат челниците на англискиот шампион. Имено, многу е веројатно најголемата ѕвезда на клубот, Кевин де Брујне, на крајот од сезоната бесплатно да го напушти клубот.
Белгиецот влезе во последната година од договорот, се уште нема вести за можно продолжување, а самиот фудбалер стави до знаење дека не е ни блиску до договор.
„Знам дека луѓето ќе ме прашаат за тоа, но не сум загрижен. Среќен сум и сакам само да играм добар фудбал. Не брзам и се чувствувам добро. Или ќе се договориме или ова ќе биде мојата последна година во Манчестер, не сум загрижен“, изјави Де Брујне на прес-конференцијата пред натпреварот со Феенорд во Лигата на шампионите.
Да потсетиме, Де Брујне пристигна во Манчестер сити во 2015 година и оттогаш се трансформира во еден од најдобрите играчи од средниот ред во историјата и играч кој го предводеше тимот до бројни успеси на теренот.