Челси, синоќа во 94.минута му го препушти првото место, во Г-групата, на Јувентус. Актуелните европски шампиони, одиграа 3:3 против Зенит, во Санкт Петербург.

Тимо Вернер со два гола и асистенција беше прво има на натпреварот.

За холандската телевизија „Зиго спорт“, натпреварот го анализираше Рафаел ван дер Варт. Поранешниот играч на Ајакс, ХСВ и Реал бурно реагирал кога водителот констатирал дека вториот гол на Вернер, во 85.минута, бил во стилот на Робин ван Перси.

„Доколку уште еднаш го споредите Вернер со Ван Перси ќе го напуштам студиото“, рекол Ван дер Варт и дополнил.

„Вернер трча како слеп коњ. Таков беше во Бундес лигата, таков е и сега. Се кај него делува диво, слепо…Повеќе очекувам од фудбалер за кого се платени големи пари. Вернер е посебен, но не постигнува голови. Негова среќа е што е брз, во спротивно ќе беше просечен фудбалер“.

Јошуа Кимих ќе се врати во тимот на Баерн на почетокот на 2022 година. Играчот од редот за врска, четири недели не е во тимот поради коронавирусот. Кимих има јасен став дека не сака да се вакцинира.

Баерн не сакаат да ризикуваат со Кимих, ќе им биде потребен за вториот дел од сезоната, поради што решија тој да не игра до крајот на годината.

„Конечно, во средата, ми заврши карантинот. Се чувствувам добро. Имам голема желба да им се приклучам на соиграчите. Сепак ќе морам да бидам трпелив. Не ми е дозволено да го користам целиот капацитет на белите дробови. Последните три натпревари во оваа година ќе ги гледам од дома. е надевам дека во јануари повторно ќе бидеме заедно“, напишал Кимих на „Инстаграм“.

Серген Јалчин повеќе не е тренер на фудбалерите на Бешикташ. Јалчин претпладнево поднел оставка на функцијата. Бешикташ се наоѓа во серија од осум порази, во сите натпреварувања.

Јалчин, минатата сезона, со Бешикташ ги освои првенството и купот на Турција, но оваа сезона работите се сменија. Во Лигата на шампионите турскиот тим не освои ниту еден бод, а во домашното првенство се наоѓа на деветтото место.

Клупската управа како привремен тренер го назначи предводникот на младинскиот тим, Ореден Каравли.