Дерик Луис, попознат како „Црниот ѕвер“, стана крал на нокаутите во тешката категорија, откако го „уништи“ Алекеј Олејник во втората рунда во главниот меч на УФЦ фајт најт во Лас Вегас.

Со овој финиш, Луис го оствари својот рекорден 11. нокаут во УФЦ, со што ги помина поранешните шампиони Каин Веласкез и Жуниор дос Сантош и сега е на второто место (со уште четири фајтери) без разлика на категоријата.

Луис „влета“ во втората рунда со луд удар на колено кој заврши во градите на Олејник, по што со силен удар со десната рака го прати противникот на подот, по што ја заврши работата.

„Не ми се верува дека сум рекордер по бројот на нокаути, бидејќи пред мене имаше големи фајтери како Брок Леснар и Каин Веласкез. Морам да останем скромен“, вели Луис.

35-годишниот Луис сега има четири победи во низа и седум во последните осум меча. Тој загуби од Даниел Кормиер во меч за титулата на УФЦ 230 во ноември 2018, но сега повторно е еден од кандидатите за титулата.

Another look at that Derrick Lewis shot that dropped Oleinik #UFCVegas6 pic.twitter.com/33fG2Y9Pa9

— Spinnin Backfist (@SpinninBackfist) August 9, 2020



Лука Дончиќ постигна 36 поени, 19 асистенции (најмногу во неговата кариера) и 14 скока за неверојатен 17. трипл-дабл оваа сезона предводејќи ги Далас маверикс до 136:132 победа во продолженијата над Милвоки бакс во Орландо.

Далас постигнаа 16 поени во низа, последните седум во регуларниот дел и првите девет во продолжението, а да направат 128:119 водство, пред Бакс да се вратат на два поени, за Дончиќ да му асистира фантастично на Макси Клебер за тројка и за запечатување на победата.

Доријан Финли-Смит додаде 27 поени и 11 скока за Мавс, а Криштапс Порзингис имаше 26 поени и 11 скока. За Милвоки, Брук Лопез имаше 34 поени (шест тројки), а Јанис Адетокумбо додаде 34 поени, 13 скока и 5 блокади. Бакси го имаат најдобриот скор во НБА 55-15.

Лос Анџелес лејкерс, пак, запишаа уште еден пораз, откако Индијана пејсерс предводена од 39-те поени на Ти Џеј Ворен стигна до 116:111 победа.

Ворен, кој има неверојатни 33.8 поени по натпревар по рестартот на лигата на 30 јули, постигна седум поени во последните 1:25 за од негатива од еден поен да направи предност од шест поени на 10.6 секунди пред крајот.

За Лејкерси (51-18), Леброн Џејмс се врати по еден меч пауза со 31 поен, 8 скока и 7 асистенции, и тој беше единствениот стартер со двоцифрен број на поени, бидејќи Ентони Дејвис постигна само осум поени (3-од-14 од поле).

НБА

Далас – Милвоки 136:132 ОТ

Феникс – Мајами 119:112

Индијана – ЛА Лејкерс 116:111

Денвер – Јута 134:132 ОТ

ЛА клиперс – Портланд 122:117



Барселона и Баерн Минхен без проблеми ја завршија работата во заостанатите мечеви од осминафиналето на Лигата на шампионите, забележувајќи победи за да закажат пресметка во четврт-финалето на елитното европско натпреварување.

Барселона дома го пречека Наполи по гостинските 1:1 во Италија, и ги реши сите дилеми уште во првото полувреме од мечот. Клемен Ленгле уште во 10. минута со убав гол со глава го отвори резултатот, а Лео Меси уште еднаш покажа дека е „магионичар“ кога во 23. минута и покрај тоа што беше соборен на земја, успеа да стане и да зголеми на 2:0.

До крајот на полувремето, паднаа уште два гола од пенал, откако прво во 45. минута, Луис Суарез зголеми на 3:0, пред капитенот Лоренцо Инсиње, исто така од белата точка да намали на 3:1.

Во Минхен, пак, Баерн го пречека Челси, кого успеа да го победи со 3:0 на првиот меч во Лондон, и исто така ја поништи цела неизвесност во првото полувреме. Роберт Левандовски во 10. минута од пенал донесе 1:0 водство, пред Иван Перишиќ во 24. минута да зголеми на 2:0. Челси прво имаше поништен гол поради офсајд, а потоа преку Теми Абрахам во 44. минута намали на 2:1.

Корентин Толисо, само што влезе во игра во 76. минута зголеми на 3:1, пред Левандовски да го запечати триумфот во 84. минута.

ОСМИНАФИНАЛЕ, 2.МЕЧ

Барселона – Наполи 3:1, прв меч 1:1, вкупно 4:2

Баерн Минхен – Челси 4:1, прв меч 3:0, вкупно 7:1

ЧЕТВРТ-ФИНАЛЕ

РБ Лајпциг – Атлетико Мадрид

Аталанта – Пари Сен-Жермен

Манчестер сити – Лион

Барселона – Баерн Минхен