Едуардо Гурбиндо еден месец се задржа во редовите на Вардар. Шпанскиот репрезентативец кариерата ќе ја продолжи кај сонародникот Чаби Пасквал, во Динамо Букурешт.

Гурбиндо кој беше најавуван како еден од носителите на играта оваа сезона, го напушти клубот.

Од Вардар не ги соопштија причините поради кои Шпанецот заминал од клубот, додека играчот за шпанските медиуми рекол дека „не бил задоволен од она што го видел“.

„Она што го видов, не е тоа што го ветија кога преговаравме“, рекол Гурбиндо за „diariodenavarra.es“.

Освојувачот на бронзениот медал со Шпанија, на ОИ во Токио, потврдил дека формалности го делат од трансферот во Букурешт.

Фото/rkvardar.mk

Поранешниот селектор на младата репрезентација на Германија Штефан Кунц е именуван за нов селектор на Турција, соопшти Фудбалскиот сојуз на оваа земја.

Кунц на функцијата ќе го наследи Шенол Гунеш, кој доби отказ по дебаклот против Холандија (6:1), во квалификациите за пласман на Светското првенство.

Штефан Кунц ја предводеше младата германска репрезентација од 2016 година. Со оваа селекција три пати играше во финалните натпревари на Европските првенства, успеа да освои две титули, во 2017 и  во 2021 година.

Турција, во квалификациите за Мундијалот, во Г-групата, се наоѓа на третото место со 11 поени, два помалку од Холандија и Норвешка.

Роналд Куман, по заминувањето на Миралем Пјаниќ, има нова жртва. Каталонските медиуми пишуваат дека 22-годишниот Рики Пуиг го очекува тежок период во кариерата.

Пуиг во летниот преоден рок не сакаше да го напушти клубот, Куман на почетокот на сезоната изјави дека младиот играч ќе добие шанса, меѓутоа досега не одигра ниту една минута во трите меча во Примера и дуелот со Баерн во Лигата на шампионите.

„Треба да напредува во многу работи. На последниот меч се загреваше, имаше шанса да влезе, но морав да ја сменам одлуката бидејќи Алба се повреди. Тој треба да работи многу, како и сите останати млади фудбалери“, рекол Куман.