Бојан Миовски и Брајан Хил, во саботата го униптија Еспањол во малото каталонско дерби. Џирона го победи Еспањол со 4:1. Головите тимот од „Монтоливи“ ги постигна во интервал од четвртата до 27.минута.

Серијата против Еспањол ја отвори Хил по додавањето кое го доби од Миовски. Потоа Хил два пати му асистираше на Миовски во 16. и 22.минута. Македонецот ги постигна првите голови за Џирона во Примера, откако летово за осум милиони евра пристигна од Абердин.

Точка на натпреварот стави Чехот Крејчи. И за него ова беше деби гол во дресот на Џирона.

Миовски за својот прформанс против Еспањол доби оценка 8,91. Подобро оценет од него беше само Брајан Хил (9,10).

Во идеалниот тим на 14.коло, покрај Миовски и Крејчи се најдоа уште двајца играчи на Џирона: Ва де Бек и Крејчи.

🇪🇸 La Liga Team of the Week pic.twitter.com/JCadKaiQkV

— WhoScored.com (@WhoScored) November 25, 2024

Возачот на Ред Бул, Макс Ферстапен, изјави дека никогаш не ни замислувал дека ќе освои четири последователни шампионски титули во Формула 1 и дека сепак ја претпочита титулата што ја освои минатата сезона.

„Стоењето овде како четирикратен светски шампион е нешто што никогаш не мислев дека ќе биде возможно. Значи во овој момент чувствувам само олеснување, но и многу гордост“, изјави 27-годишниот холандски возач, објави „Скај Спорт“.

Ферстапен ја освои својата четврта последователна титула во Формула 1 со петтото место на трката за ГН на Лас Вегас. Холанѓанеџот се изедначи на третото место на сите времиња со Себастијан Фетел и Ален Прост. Пред нив по бројот на титули се Хуан Мануел Фанџо со пет, како и водечките Михаел Шумахер и Луис Хамилтон со по седум трофеи.

Во генералниот поредок Ферстапен има недостижни 403 бода, додека неговиот најголем ривал Ландо Норис од Мекларен заостанува 63 бода. Возачот на Ферари, Шарл Леклер е на третото место со 319 бодови.

Ферстапен додаде дека сезоната е многу долга, одчично ја започнале со тимот, а подоцна влегле во резултатска криза.

„Како тим работевме заедно, продолживме да го подобруваме болидот и на крајот ја минавме целта“. Неверојатно сум горд на се што направија за мене“, рече Ферстапен.

Тој исто така рече дека и понатаму ја претпочита претходната титула, која ја освои на доминантен начин со речиси 300 бодови пред второпласираниот тимски колега Серхио Перез.

„На некој начин, сè уште ја претпочитам минатата сезона, многу уживав, но мислам дека повторно научив многу лекции оваа сезона. Начинот на кој што ја освоивме титулата ја прави оваа сезона многу посебна и убава“, заклучи Верстапен.

Возачот на Мерцедес Џорџ Расел победи на трката за Големата награда на Лас Вегас, втор беше неговиот тимски колега Луис Хамилтон, додека трет заврши Карлос Саинц од Ферари.

До крајот на шампионатот остануваат уште две трки, а следната ќе се вози на 1 декември во Катар. Покрај главната трка следната сабота, ќе има и спринт во Катар.

Еден од најдобрите фудбалери во историјата, играчот на Ал Наср Кристијано Роналдо добил тужба од британскиот естетски хирург д-р Рошан Равиндран, познат и како доктор Рош, за наводно неплатена сметка од 48.000 евра.

Рош тврди дека поранешниот фудбалер на Манчестер јунајтед должи за третмани за време на неговиот престој на „Олд Трафорд“ во 2021 и 2022 година, пишува „Сан“.

Поранешниот кардиолог, кој е специјализиран за ботокс и филери, нега на кожа и подигнување на веѓите, забележува во тужбата дека вршел третмани за Роналдо, членовите на неговото семејство и придружбата во неговата клиника во Чешир.

Британските таблоиди повеќе ги интересираше дали и сопругата на Роналдо, Џорџина Родригез е негова пациентка.

„Судската постапка е во тек и како професионалец не можам да зборувам за моите пациенти“, изјавил докторот за „Сан“.

Пријател на хирургот на читателите им го доближи ликот и делата на д-р Рош.

„Тој е многу почитуван експерт во светот на личности од висок профил, вклучувајќи врвни политичари, членови на кралското семејство, спортисти и холивудски ѕвезди. Кога станува збор за третмани како ботокс и филери, тој несомнено е „број еден“. Неговата клиентела ја цени апсолутната дискреција и супериорните третмани“.