Спорт
Борна Чориќ за Топспорт: Лош тенис прикажав на Вимблдон

Ненад Живановски за Топспорт од Лондон,
Борна Чориќ, е најдобро пласираниот хрватски тенисер на АТП листата, заземајќи го 14-то место. По пауза од пет години, повторно настапи на Вимблдон, во меч кој почна во понеделник, а се заврши во среда. Во понеделникот дојде до прекин поради темница, во кој Борна губеше 0-2 во сетови од Аргентинецот Гуидо Пела, вторникот беше дожлив и мечот не се продолжи, за во среда да успее да се врати во игра, израмнувајќи на 2-2 во сетови. Сепак, немаше сили за целосен пресврт, така што беше поразен 3-2 (6-3, 7-5, 4-6, 3-6 и 6-1).
– Борна, добро се врати во мечот. После 2-0 во сетови, израмни на 2-2. Можеше ли нешто повеќе во петиот сет да направиш?
Чориќ: Можеше, сигурно дека можеше, да успеев да искористам неколку брејк топки. Кога имав предност за 2-2, сигурно можеше поинаку да се заврши, иако не сакам да зборувам што би било кога би било. Тука сме каде сме. Многу лоша сезона на трева изиграв. Единствено добро што имам изиграно во целата тревната сезона е денешниот четврти сет. Освен тој четврти сет, сè на Вимблдон и на претходните два турнира беше многу лошо. Нема оправдување, едноставно лош тенис играв.
– Дали прекинот на мечот во понеделник лошо влијаеше на твојата игра, бидејќи во моментот кога направи рибрејк, судијата го прекина мечот?
Чориќ: Не знам, тешко ми е да кажам. Добро го отворив мечот, но на битни моменти одиграв криминално лошо, под моето ниво, а Гуидо играше добро. Мислам дека прекинот во понеделникот дури и одеше во моја корист, бидејќи денеска изгубив еден сет, но потоа успеав да добијам два.
– Што се случи во петтиот сет за таков голем пад на фокусот? Четвртиот сет го одигра перфектно, и потоа тотално ти се распадна играта.
Чориќ: Едноставно Гуидо сè погаѓаше после многу раниот брејк во петтиот сет. Не знам што би рекол, противникот ми одигра добри ритерни. Всушност, јас и не играв толку лошо, но тој играше многу добро.
– Поради повреди, те немаше на Вимблдон од 2018 година. Може ли барем нешто позитивно да се најде во твоето годинешно учество?
Чориќ: Позитивно, единствено тоа што се вратив на Вимблдон после пет години, иако можеби би било подобро да не сум тука.
– Колку го пратиш тенисот во Хрватска и регионот? Хрватска оваа година имаше победник во јуниорска конкуренција на Ролан Гарос, а и минатата година јуниорски шампион на Вимблдон, исто така, беше Хрват.
Чориќ: Не само што го следам тенисот во Хрватска, јас и тренирам со сите тие дечки во Загреб или во Сплит. Го имаме Призмиќ и Пољичак. Призмиќ мислам дека до крајот на годината ќе биде меѓу 150-200 тенисери и следната година, ќе биде компетитивен за топ 100. Оваа година во вториот месец игравме во Дејвис купот, и дечкото навистина игра феноменално, одлично напредува, така што наскоро очекувам големи работи од него.
– Познат ли ти е најдобриот македонски тенисер Калин Ивановски?
Чориќ: Да се знаеме, тој тренира во Загреб и сме тренирале заедно неколку пати. Навистина тоа беше одамна, кога јас го оперирав рамото, но се надевам дека повторно ќе се сретнеме.
– Твојот имењак Борна Гојо, вчера, преку некои портали од регионот, распали против организаторот на Вимблдон. Дали навистина е толку лошо да се игра на Вимблдон кога ветерот дува?
Чориќ: Па, мислам дека директорот на турнирот нема премногу врска со ветерот кој дува и дождот. Борна Гојо е супер дечко, ние сме одлични пријатели. И јас исто играм лошо кога е силен ветерот, но тоа организаторот не може да го промени. Исто е за сите.
-А, неговите критики упатени кон Тенискиот сојуз на Хрватска и политичарите, кои се покрај вас да се сликаат само кога имате успех, но еден солиден тениски терен немаат направено каде би тренирале.
Чориќ: Не сум прочитал што Борна изјавил, но пак ќе повторам ние сме супер пријатели, тој е супер дечко. Дали може да биде подобро, сигурно дека може. Дали е толку лошо – не знам. Не сум премногу фокусиран на тие работи, не знам каква е состојбата во Хрватскиот тениски сојуз, но, имаме три-четири терени.
-Што после Вимблдон? Имаш ли план каде и како ќе ја започнеш американската турнеја?
Чориќ: Не можам сега да размислувам за тоа. На последните три турнири на трева изгубив уште во првото коло и единствено што сакам во моментов е да се вратам дома.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Шампионот ќе биде домаќин и ќе го игра првиот меч во Лигата на шампионите

Европската фудбалска асоцијација (УЕФА) објави дека од сезоната 2027/28 ќе воведе дополнителна новина во календарот на Лигата на шампионите. Сезоната ќе започне со домашен натпревар на бранителот на титулата во посебен термин.
Средбата шампуионот ќе се игра во вторник, додека сите други натпревари од 1. коло ќе се играат во среда и четврток.
УЕФА сака на овој начин да му даде посебено медиумско внимание, како што е случајот во американската професионална лига на американски фудбал, НФЛ, која со години започнува со домашен натпревар на бранителите на титулата во четврток, односно три дена пред да се играат другите натпревари од 1. коло.
Во позадина на оваа одлука е можноста за дополнителни приходи од продажбата на телевизиските права за следниот тригодишен период, кој ќе започне токму со сезоната 2027/28, кога дел од натпреварите би можеле да се префрлат на канали како DAZN, Netflix или Disney.
Спорт
Гаскоњ: Испив девет чаши бренди и бев прогласен за играч на натпреварот

Веројатно најталентираниот фудбалер во историјата на англискиот фудбал, Пол Гаскоњ, се потсети на неколку моменти од својата кариера во ТВ-шоуто „Добро утро Британијо“.
Животот на Пол Гаскоњ беше обележан со неверојатен дар за фудбал, но и со ексцеси во неговиот приватен живот, од кои некои оставија големи последици за него. Неодамна, тој објави автобиографија наречена „Осум“. Во ТВ-шоуто „Добро утро Британијо“, Газа се потсети на неколку моменти од својата кариера, како и на некои надвор од теренот.
Една од епизодите се случи за време на финалето на Шкотскиот Лига Куп. Глазгов Ренџерс играше против Хартс, а тогашниот менаџер на „Полицајците“, Волтер Смит, најде начин да го разбуди Пол.
„На полувремето ме праша дали сум пиел пред натпреварот, јас реков не, на што тој одговори: „Оди да се напиеш неколку пијалоци“. Испив девет чаши бренди, се вратив на теренот, постигнав два гола и бев прогласен за играч на натпреварот“, рече Гаскоњ.
Колку и да беше гениј на теренот, толку беше самодеструктивен надвор од него, понекогаш штетен дури и за оние што му беа најблиски.
„Со години се дистанцирав од семејството, тишината ме обземаше. Кога татко ми одлучи да ме смести во психијатриска установа, сфатив колку е сериозна ситуацијата. Поминав 11 дена во таа установа и тоа ми го спаси животот.“
Можеби најтешкиот дел од приказната е оној за неговиот помлад брат. За Пол, тоа беше најголемата траума.
„Самиот си ја презедов обврската да се грижам за него. Но, во момент на невнимание, тој истрча пред мене. Го удри автомобил. Мислев дека сè уште дише. Ми почина во раце.“
Неговите проблеми со алкохолот му предизвикаа многу проблеми, до тој степен што го уништија на секој можен начин.
„Можев да поминам месеци без да предизвикувам проблеми, а потоа пиев два дена и последиците ќе се почувствуваа. Се чувствував мизерно. Морав да одам на состанок на Анонимните алкохоличари. Дури кога отидов кај нив сфатив дека сум алкохоличар. Ја напишав книгата „Осум“ за да им помогнам на другите. Нема никаква врска со фудбалот“.
Друга интересна ситуација се случи во летото 1988 година. Гаскоњ тогаш се пресели од Њукасл во Тотенхем. Сер Алекс Фергусон сакаше да го доведе во Манчестер Јунајтед, Газа му ветил, но не го одржал ветувањето. Клучна улога одиграл тогашниот претседател на Тотенхем, Ирвинг Сколар.
„Татко ми сакаше 120.000 фунти и БМВ, сестра ми сакаше лежалка пред куќата. Сколар прифати сè и договорот беше склучен. Кога го видов Фергусон години подоцна, разговаравме и тој ми рече: „Како, по ѓаволите, се осмели да ме одбиеш. Ја направи најголемата грешка во животот“, се присети Гаскоњ.
Спорт
Казорла: Немам врска со отказот што го доби Пауновиќ

Легендарниот шпански фудбалер Санти Казорла беше принуден да ги негира написите дека влијаел врз отпуштањето на Вељко Пауновиќ.
Казорла одговори по обвинувањата на социјалните мрежи, каде што откри дека веста за отпуштањето на Пауновиќ е шокантна за него.
„Јас сум професионалец 22 години, а можете да ги прашате сите претседатели, спортски директори и тренери со кои сум соработувал. Никогаш немав никаква врска со одлуките на клубот за отпуштање на тренер“, рече Казорла на прес-конференцијата.
„Не можам да дозволам мојот имиџ да биде нарушен, бидејќи секогаш се обидував да придонесам на секој начин.“
Потоа ја искористи можноста да му се заблагодари на српскиот тренер за сè што направи за Овиедо.
„Би сакал да му се заблагодарам на Пауновиќ за неговата работа. Имаме одличен однос и вчера разговарав лично со него. Сакам да му се заблагодарам нему и на неговиот стручен штаб за сè што постигнавме. Тие засекогаш станаа дел од историјата на овој клуб“, нагласи Казорла.
Пауновиќ минатата сезона, по пауза од 24 години го врати Овиедо во елитниот ранг на шпанскиот фудбал. Доби отказ откако забележа две победи во првиоте осум рунди во новата сезона.
Фото/ Принтскрин