Спорт
Брајант блескаше, Ефес изедначи во серијата со Панатинаикос

Патникот на завршниот турнир од пресметката меѓу Ефес и Панатинаикос ќе го реши петтиот меч. Вечерва, Ефес успеа да го изедначи резултатото во серијата на 2:2 откако победи со 85:82.
Панатинаикос го отвори натпреварот подобро и успеа да поведе со 9:4. Следеше серија од 10:0 на Ефес, но ниту еден тим не успеа да направи посериозна предност.
Екипите го менуваа водството во текот на првото полувреме, а на крајот Ефес имаше пет бода предност на „големата пауза“.
Впечатокот од првото полувреме секако беше фактот дека МВП-то и најдобриот стрелец во лигашкиот дел од натпреварувањето, Кендрик Нан, дури и не шутираше од поле во првите 20 минути.
Ефес го отвори подобро второто полувреме и набрзо успеа за прв пат да стигне до двоцифрена предност. Не траеше долго, следеше серија од 10-0 на Панатинаикос за ново израмнување.
Голема борба се водеше во третиот дел од натпреварот, кој беше најефикасен за двата тима, но во интересна завршница, Ефес ја задржа предноста.
Решавачкиот период беше обележан со грешки од двете страни. Елајџа Брајант го одржа Ефес во живот.
На минута до крајот, Митоглу промаши чиста тројка и шанса да му донесе предност на Панатинаикос од два поени, потоа Брајант ја постигна својата четврта тројка и му донесе предност на Ефес од 77:73 на 38 секунди до крајот на натпреварот.
Во следниот напад на Панатинаикос, Дужер одигра одлична одбрана врз Нан, како што правеше во текот на голем дел од натпреварот, но Нан успеа во вториот обид да постигне тројка за 77:76 на нешто повеќе од 20 секунди до крајот. Одговорот дојде од Шмитс, со прекршок на 16,8 секунди до крајот. Шмитс промаши, но Осман направи неспортски фаул.
Ергин Атаман се скара со навивачите и ја напушти салата пред крајот на натпреварот.
Брајант го предводеше Ефес до победата со 19 поени, Шмитс уфрли 15, а Османи 14. Ларкин имаше девет поени и девет асистенции.
Од другата страна, најдобри беа Осман со 22 поени, Ернангомез со 15 и седум скока, Слукс со 14 поени и шест асистенции и Нан со 12 поени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
(Видео) Кремонезе го победи Милан

Фудбалерите на Кремонезе направија големо изненадување на стартот на сезоната во Серија А. Кремонезе на Сан Сиро со 2:1 го победи Милан. Во истиот термин Рома со минимален резултат ја победи Болоња.
Повратникот во Серија А, Кремонезе му го расипа дебито на Лука Модриќ во Серија А, прв пат во историјата успеа да го победи Милан на „Сан Сиро“.
Во 28-та минута, стоперот Федерико Баскирото им донесе предност на гостите со удар со глава, а во првата минута од судиското продолжение, Милан израмни на ист начин. Стрелец беше српскиот репрезентативец Страхиња Павловиќ.
Федерико Бонацоли беше најзаслужен за големото славје на тимот од Кремона, во 61-та минута постигна сепктакуларен гол.
Милан во следната рунда ќе игра против на гости против Лече, додека Кремонезе ќе го пречека Сасуоло.
Во дербито на колото, Рома на дебито на новиот тренер Џанпјеро Гасперини ја победи Болоња.
Единствениот гол на натпреварот во 53-тат минута го постигна десниот бек Весли, Бразилец кој пристигна во италијанската престолнина пред помалку од еден месец од Фламенго.
Во втората рунда, Рома ќе гостува во Пиза, додека тимот од „Ренато Далара“ Комо.
Foto/ EPA/MATTEO BAZZI
Спорт
Глазгов Ренџерс се распрашува за Бојан Миовски

Иднината на македонскиот репрезентативец Бојан Миовски во Џирона е неизвесна. Нема да биде изненадување доколку во финишот на преодниот рок Македонецот си замине од Каталонија.
Вечерва, шпанските и англиските медиуми објавија дека шкотскиот великан Глазгов Ренџерс покажал интерес за Миовски. Според информациите, „полицајците“ сакаат да го донесат Миовски на позајмица.
Миовски, минатото лето од Абердин пристигна во Џирона за сума од 8.500.000 евра. Во Каталонија немаше добра сезона, постигна четири гола во 25 натпревари во сите натпреварувања, но речиси не играше во вториот дел од сезоната, поради повредите, но и поради одлука на тренерот.
Во првиот натпревар оваа сезона, Миовски беше стартер, а потоа заменет во 45.минута кога голманот Газанига доби црвен картон. Инаку, во првото коло Џирона загуби на домашен терен од рајо Ваљекано (0:2).
Миовски има договор со Џирона до јуни 2028 година.
Спорт
(Видео) 15-годишник дебитираше во убедливата победа на Арсенал

Фудбалерите на Арсенал го декласираа Лидс со 5:0 во рамките на второт коло во Премиер лигата.
Тренерот на Арсенал, Микел Артета, одлучи да направи две измени во стартните 11 во споредба со натпреварот против Манчестер јунајтед. Јуриен Тимбер го замени Бен Вајт, додека Нони Мадуеке ја презеде стартната лево крилна позиција од Габриел Мартинели.
Виктор Ѓекереш постигна два гола на дебито пред домашната публика, Микел Артета е загрижен за повредите на Мартин Едегард и Букајо Сака, а за „тобџиите“ дебитираше 15-годишниот Макс Дауман.
Со 15 години и 229 дена, Дауман стана вториот најмлад дебитант во историјата на Премиер лигата, веднаш зад неговиот соиграч Итан Нванери, кој го имаше своето деби за Арсенал на 15 години и 181 ден.
Макс Роберт Дауман е на 31 декември 2009 година во Челмсфорд и веќе неколку години е најпознатото име на Академијата Хејл Енд, познатата школа на Арсенал за млади таленти.
Дауман го имаше своето деби за тимот на Арсенал до 18 години во септември 2023 година на само 13 години, а набрзо стана најмладиот играч во историјата на Премиер лигата 2, кога го имаше своето деби за тимот до 21 година на 14 години во декември 2024 година. Тој одигра 25 натпревари за тимот до 18 години и постигна 20 гола, додека во Младинската лига на УЕФА стана најмладиот стрелец во историјата на натпреварувањето, постигнувајќи гол против Аталанта на возраст од 14 години и осум месеци.
Минатата сезона тој беше и капитен на тимот до 18 години, каде што редовно ги водеше своите соиграчи и покрај фактот дека всушност беше член на генерацијата до 15 години.
Тој го имаше своето деби за првиот тим на Арсенал во пријателски натпревар против Милан, а најголемо внимание привлече против Њукасл во Сингапур, каде што влезе од клупата и го постигна победничкиот пенал и воодушеви многумина со својот дриблинг против многу постари и физички посилни противници.
Микел Артета јавно го пофали, велејќи дека не е вообичаено да се види такво присуство и храброст кај 15-годишник во првиот тим.
Дауман веќе има значајни настапи за англиските репрезентации до 16 и до 17 години, а на неодамнешното Европско првенство до 17 години ги започна сите три натпревари и постигна гол против Чешка. Тој е опишан како многу разновиден и технички надарен плејмејкер со одлично чувство за клучни додавања и прецизно изведување на нападот.
Тренерите и експертите го нарекуваат следниот Кака.