Тигст Асефа од Етиопија го собори светскиот рекорд во маратон, откако победи на 45-от Лондонски маратон со време од 2:15,50 часа. Асефа, освојувачка на сребрен медал на маратонот на Олимписките игри во Париз 2024, се одвои од Кенијката Џојсилин Џепкосгеи во последните неколку километри откако двете поставија исто темпо од самиот почеток.

Со денешниот резултат таа го подобри претходниот рекорд од 2:16,16, кој минатата година во Лондон го постави Перес Јепчирчир од Кенија. Џепкосгеи беше втора со време од 2:18,44, додека актуелната победничка на олимпискиот маратон, Сифана Хасан од Холандија, беше трета со време од 2:19,00.

Во машка конкуренција, Кениецот Себастијан Саве славеше завршувајќи ја трката со повеќе од една минута предност пред Џејкоб Киплимо од Уганда. Саве, кој го победи на маратонот во Валенсија пред четири месеци, ја помина целта по 2 часа, 2 минути и 20 секунди.

Јакоб Киплимо од Уганда, кој го собори светскиот рекорд во полумаратон во февруари, беше втор во своето деби во маратонските трки со време од 2:03,37, додека минатогодишниот победник Александар Мутисо Муњао заврши на третото место.

Тренерот на Реал, Карло Анчелоти, е многу блиску до преземање на репрезентацијата на Бразил, објави британската телевизија „Скај Спортс“.

Анчелоти има договор со челниците на Реал до јуни следната година, но се поизвесно е дека ќе го напушти Мадрид на крајот од тековната сезона, пред Светското клупско првенство.

По неуспехот на Светското првенство во Катар 2022 година, Бразил имаше дури тројца селектори, а последниот беше Доривал Жуниор, кој беше отпуштен во март по само седум победи во 16 натпревари.

Бразил има скор од 6-3-5 во 14 квалификациски натпревари за Светското првенство, кое ќе се игра во САД, Мексико и Канада следното лето, а на четири кола пред крајот на квалификациите, теоретски сè уште не му е загарантирано место на Светското првенство, но сигурно е дека петкратниот светски шампион ќе се квалификува за Мундијалот. Бразил ја освои последната од петте титули светски шампион во 2002 година.

„Тренерот на Реал, Карло Анчелоти, е многу блиску до преземање на бразилската репрезентација, дознава „Скај Спортс“.

Изворот потврди дека преговорите меѓу двете страни ќе продолжат во мај. Анчелоти е на радарот на Бразилската фудбалска асоцијација од крајот на Светското првенство во 2022 година.

„Бразилската фудбалска асоцијација се надева дека Анчелоти би можел да ја предводи селекцијата веќе во јунските квалификации за Светското првенство во 2026 година“, соопшти денес реномираната телевизија.

Кошаркарите на Голден Стејт, без повредениот Џими Батлер, го победија Хјустон со 104:93 во третиот натпревар од првото коло на плејофот на Западната конференција, свртувајќи ја серијата во нивна корист на 2-1.

И покрај тоа што играа без еден од своите лидери, кој го пропушти натпреварот поради повреда заработена во вториот натпревар, Вориорс успеаја да го надоместат раниот дефицит и да го свртат текот на серијата.

Одличниот Стеф Кари го предводеше тимот од Калифорнија со 36 поени, вклучувајќи пет тројки, со 7 скока и 9 асистенции.

Гари Пејтон, кој не постигна ниту еден поен во претходниот натпревар, беше клучен во четвртата четвртина со девет поени по ред, додека Бади Хилд додаде 17 поени со пет тројки. Дебитантот Квинтен Пост забележа 12 скока во својот прв старт во плејофот. Во поразениот тим, Фред Ванвлит постигна 17 поени, Дилон Брукс 13 и Џабари Смит 12.

Четвртиот натпревар е во вторник во 16 часот, исто така во Сан Франциско.