Познати се бараж двојките од африканската зона за пласман на Светскоот првенство во Катар. Место во баражот изборија десет репрезентации, пет од нив ќе играат на Светското првенство.

Најголемо внимание привлекува пресметката помеѓу Египет и Сенегал, чии најдобри играчи се ѕвездите на Ливерпул, Мохамед Салах и Садио Мане.

Натпреварите ќе се играат на 23. и 29.март.

Златан Ибрахимовиќ, открил дека му дал совет на Килијан Мбапе каде треба да ја продолжи кариерата. Ибрахимовиќ нема дилема дека Мбапе треба да се пресели во Реал Мадрид.

Според она што го пишуваат медиумите, Мбапе има голема желба да го облече дресот на Реал. Ибрахимовиќ го советува да си го оствари сонот.

„Мбапе ме праша за мислење околу неговата иднина и што треба да направи. Му реков дека да сум на неговото место би се пресели во Реал. Лесно е кога играш во својата земја, дури кога ќе заминеш во странство можеш да почувствуваш авантура и да созрееш како фудбалер“, рекол Ибрахимовиќ.

Атлетико Мадрид со нестварен пресврт, во судиското надополување на времето, ја победи Валенсија со 3:2. Актуелните шампиони се вратија по минусот од два гола.

Атлетико се самоуништија во првото полувреме. Примија два гола од своите грешки, Облак прво потклекна пред Муса во 25.минута, а потоа и пред Уго Дуро во 44.минута.

Во второто полувреме, Атлетико со сите сили тргна во напад, додека Валенсија се определи да го брани водството. Таквата определба на крајот ги однесе во пораз.

Пресвртот го најави Куња во 64.минута. Потоа Луис Суарез пропушти две добри шанси да го израмни резултатот.

Валенсија имаше предност до истекот на 90.минута. Во 91. израмни Анхле Кореа, а две минути подоцна Марио Ермозо го комплетираше пресвртот.

Дуелот траеше 101 минута, главниот судија покажа 11 жолти картони.