Дани Себаљос решил наредното лето како слободен играч да го напушти Реал. Иако Карло Анчелоти го користи во ротацијата и вели дека има доверба во него, тоа не е она што тој го сака.

Себаљос сака да има важна улога во тимот и е подготвен да замине.

За него се заинтересирани Бетис и Милан. Паоло Малдини веќе неколку пати истакна дека тоа е профилот на играчот кој им е потребен на актуелните шампиони на Италија.

Себаљос кариерата ја започна во Бетис, во 2017 година како МВП на Европското првенство за играчи до 21 година се пресели во Реал за 16 милиони евра.

Никогаш не успеа да се избори за место во тимот, две сезони додека му траеше договор со Реал ги мина на позајмица во Арсенал.

Сезонава запиша само 124 минути на осум одиграни натпревари за Реал Мадрид.

Германската фудбалска репрезентација најверојатно нема да учествува во квалификациите за ЕВРО 2024 година.

Германците, како домаќини на континенталниот турнир нема да ја прифатат улогата на „гостин“ и ќе играат пријателски натпревари во квалификацискиот период.

Така, Германија нема да го искористи правото за настап во една од квалификациските групи и покрај тоа што веќе го обезбеди своето место на завршниот турнир како организатор.

На пример, Франција го искористи тоа право за Европското првенство во 2016 година, исто како и Катар за Светското првенство во 2022 година.

„Како домаќини веќе се квалификувавме. Ова ни дава поголема флексибилност кога правиме планови за следната година за да можеме да се подготвиме против силни тимови“, изјави директорот на германската репрезентација Оливер Бироф.

Германија се надеваше дека како добра подготовка може да го има завршниот турнир од Лигата на нации во јуни следната година, но не успеа да го освои првото место во „групата на смртта“, во која беа Италија, Унгарија и Англија.

Ждрепката за квалификациите е закажана за 9. октомври во Франкфурт, а квалификациите ќе започнат во март следната година.

Сестрата на Кристијано Роналдо, Катија Авеиро, застана во одбрана на својот брат. Португалецот е мета на критики од навивачите и медиумите по слабите игри во дресот со националниот грб.

Португалија, во вторникот, загуби во последното коло од Лигата на нации од Шпанија на домашен терен (0:1) и не успеа да се пласира на завршниот турнир.

Медиумите во своите анализи, бараат Роналдо да му го отстапи своето место во првата постава на некој од помладите играчи.

Насловите во медиумите предизвикале револт кај сестрата на Роналдо.

„Португалците плукаат по чинијата од која јадат, така било секогаш. Неопходно е да им се подаде рака на оние кои секогаш давале се од себе за Португалија. Но, Португалците (навивачите) можат да бидат болни, ситни, бездушни, глупави. .. вечно неблагодарни“, напиша таа на Инстаграм.

Светското првенство во Катар се очекува да биде последниот голем турнир за Кристијано Роналдо во националниот тим.