Спорт
Челзи под истрага во Премиер лигата

Премиер лигата истражува дали Челзи го прекршил финансискиот фер плеј.
УЕФА ги казни „сините“ со 8,6 милиони фунти во јули поради кршење на финансискиот фер-плеј, како резултат на „доставување нецелосни финансиски информации помеѓу 2012 и 2019 година“.
Тие прекршоци новите сопственици ги пријавиле по купувањето на клубот во мај, а за слични проблеми ја известиле и Премиер лигата, објави денеска Би-би-си.
Лигата сега размислува дали конкретните обвиненија, како оние против Манчестер сити и Евертон, се соодветни. Првобитната казна се однесуваше на седумгодишниот период кога сопственик беше Роман Абрамович.
По политички притисок, рускиот милијардер минатиот мај го продаде клубот на американскиот инвеститор Тод Боли и на приватната инвестициска компанија „Клирлејк Капитал“.
Челзи соопшти дека целосно соработувале со УЕФА за време на истрагата и дека склучиле договор за порамнување со европската куќа на фудбалот.
Клубовите може да бидат казнети финансиски или да им бидат одземени бодови доколку се утврди дека се виновни за кршење на финансиските правила.
Шампионот на Европа и Премиер лигата Манчестер сити беше обвинет за прекршување на повеќе од 100 финансиски правила во февруари, а Евертон во мај беше упатен до независната комисија на Премиер лигата поради наводни финансиски неправилности.
Двата клуба негираа дека го изиграле финансискиот фер плеј.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
„Голем интерес за НБА Европа, ќе бидат основани нови клубови“

Генералниот менаџер на НБА Европа за Блискиот Исток, Јоргос Аваизоглу, навести кои тимови би можеле да се приклучат на проектот, кој се очекува наскоро да заживее и да биде легитимен конкурент на Евролигата.
Грчкиот функционер разговараше со „Њујорк тајмс“, споменувајќи ги веќе етаблираните кошаркарски клубови, но и фудбалските клубови кои се заинтересирани за формирање кошаркарски секции, како и сосема нови тимови.
„Постојните кошаркарски тимови на континентот се многу заинтересирани за учество и, во многу случаи, тие тимови се дел од мултиспортски организации. Средбите со Реал Мадрид и Галатасарај одговараат на тие критериуми.
Ова е одлична можност за нив да добијат разновидност и да изградат мултиспортска понуда, што е многу честа појава во некои европски земји, како Шпанија, Грција или Турција, а помалку честа во други, како Велика Британија. Но, мислам дека меѓу нив постои вистинска желба да бидат дел од ова“, рече Аваизоглу и додаде.
„Она што е навистина интересно е што тие клубови имаат децениска, а дури и вековна традиција, па затоа се силни брендови. Тие брендови во многу случаи се глобални и имаат фанови низ целиот свет. Од практична страна, тие се водени од луѓе кои знаат како да ги полнат арените и да изградат високо-перформансни тимови. Покрај базата на фанови што веќе ја имаат, тоа е огромна вредност што можат да ја донесат во лигата од самиот почеток.“
Се очекува новата лига да започне во 2027 или 2028 година, како што потврди комесарот на НБА, Адам Силвер. Аваизоглу истакна дека тимови од Париз, Лондон, Манчестер, Берлин и Рим би можеле да бидат дел од натпреварувањето.
„Можеме да видиме и сценарио каде што во некои градови се создаваат сосема нови брендови како дел од оваа лига, но мислам дека повеќето од учесниците ќе бидат од категоријата на веќе постоечки тимови“, рече тој, осврнувајќи се на претходните примери.
Домашните натпреварувања би можеле да бидат поврзани и со нова лига, слично на системот што моментално го спроведува УЕФА во фудбалот.
Спорт
Шик ќе паузара најмалку три недели

Фудбалерот на Баер Леверкузен, Патрик Шик, се повреди на натпреварот против Сент Паули и ќе биде надвор од теренот до средината на октомври, објави клубот.
„Баер Леверкузен ќе мора да игра без напаѓачот Патрик Шик во следните натпревари“, се наведува во соопштението за медиумите на клубот, во кое се прецизира дека чешкиот репрезентативец има повреда на мускулот на задниот дел од левата нога.
29-годишниот стрелец на голови треба да се врати за натпреварот од Бундеслигата против Мајнц на 18 октомври.
Шик, најдобриот стрелец на Леверкузен во претходните сезони, ќе го пропушти натпреварот против ПСВ Ајндховен во среда во второто коло од Лигата на шампионите, како и натпреварот против Унион Берлин во сабота.
Исто така, не се очекува да игра за чешката репрезентација во октомврискиот квалификациски прозорец за Светското првенство во 2026 година, против Хрватска (9 октомври) и Фарските Острови (12 октомври).
Спорт
Ал Хорфорд се сели кај Стеф Кари во Голден Стејт

Ал Хорфорд, 39-годишен кошаркар со 18 сезони во НБА зад себе, кариерата ќе ја продолжи во Голден Стејт Вориорс.
Според изјавата на агентот на Хорфорд, Џејсон Глушон, Вориорс чекаат одлука од Џонатан Куминга, кој е ограничен слободен агент, за да ги финализираат деталите од договорот на Хорфорд. Самиот играч се збогува со Бостон Селтикс, каде што помина седум од последните девет сезони и ја освои титулата во 2024 година.
Ал Хорфорд е само еден од четворицата играчи во НБА кои успеале да постигнат 900 или повеќе тројки и да поделат 1300 или повеќе блокади. Останатите тројца се Рашид Волас, Брук Лопез и Клифорд Робинсон.
Играчките карактеристики на Хорфорд треба добро да се вклопат во тимот предводен од Стефен Кари, Џими Батлер и Дрејмонд Грин. Тој редовно постигнува повеќе од 100 тројки со реализација од 41 отсто во последните три сезони.
Минатата сезона, тој одигра 60 натпревари за Селтикс, а во 42 од нив беше во почетната постава. Просечно постигнуваше 9 поени, 7,9 скока и 2,1 асистенција.
Хорфорд влезе во НБА во 2007 година како трет избор на драфтот. Беше избран од Атланта Хокс, каде што ги помина првите девет сезони (2007 – 2016). Потоа играше три сезони со Селтикс (2016 – 2019), а откако го напушти Бостон, помина по една сезона со Филаделфија 76ерс (2019 – 2020) и Оклахома Сити Тандер (2020 – 2021). Се врати во Бостон во 2021 година.
Во текот на 18 сезони, Хорфорд имаше просек од 12,9 поени, 7,9 скока и 3,2 асистенции во 1138 натпревари.