Спорт
Циципас: Собирам поени, се надевам дека еден ден ќе бидам број 1

Грчкиот тенисер Стефанос Циципас истакнува дека тоа што се искачи на третата позиција на АТП листата дополнително му дава „ветар в грб“.
Тој на Роџерс купот во Торонто играше полуфинале (загуби од Опелка), а во Синсинати во втората рунда го очекува подобриот од дуелот Себастијан Корда – Ласло Ѓере.
„На секој турнир во САД се поинакви условите – некаде надморската висина е малку поголема, некаде пак влажноста е поголема. Потребно е да се прилагодиш. Лично, моментно ми е приоритет што побрзо да се префрлам од еден на друг турнир, без поголеми проблеми во играта. Тоа доаѓа со многу тренинг, кондициска работа. Не ми е целта да ја освојам секоја титула, сакам да дојдам до фаза да собирам многу поени. Сакам да ја остварам мојата цел, да бидам во топ 3, а за тоа мора да сум и ментално и физички подготвен и да имам јасна слика пред себе. Од аспект на самодовербата, тој влез во топ 3 многу ми значи. Следниот чекор е број 1, се надевам дека ќе успеам еден ден“ – рече Циципас.
Кога би можел да бира, дали грен слем титула или број 1 на АТП:
„Со освојување на грен слем се зголемуваат шансите за број 1, добиваш бодови и самодоверба. Да не сум во топ 10 веројатно ќе е поинаку, вака одбирам освојување на грен слем“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Мареј за пет години ќе добие 140 милиони

Киган Мареј, кошаркарот на Сакраменто Кингс, доби нов пет годишен договор вреден 140 милиони долари.
Мареј беше четвртиот избор на НБА драфтот во 2022 година, а Кингс обезбедија долгорочен договор со еден од најважните играчи кој е под договор до 2031 година.
Тој ја започна својата „дебитантска кампања“ многу добро и беше во идеалниот руки тим со одлични партии што го доведоа тимот до првиот плејоф по 17 години.
Киган е еден од тројцата играчи кои постигнале 500 тројки, со 150 блокади и 150 украдени топки во претходните три сезони.
Останатите двајца се Ентони Едвардс од Минесота и Дерик Вајт од Бостон.
Тој е шестиот играч кој потпиша продолжување на договорот оваа година пред рокот, 20 октомври, утврден со правилата на НБА.
Минатата сезона тој имаше просек од 12,4 поени со 6,7 скока и 1,4 асистенции во 76 одиграни натпревари.
Спорт
На 25-годишна возраст една од најдобрите пливачки замина во пензија

Една од најдобрите пливачки на денешницата, Австралијката Аријарне Титмус, изненадувачки објави дека ја завршува кариерата.
25-годишната Титмус освои осум олимписки медали, од кои четири златни, три сребрени и еден бронзен. Исто така таа е четирикратна светска шампионка. Најголемиот успех го постигна во дисциплината 400 метри слободен стил, дисциплина во која е двократна олимписка и светска шампионка, а освои и медали на 200 и 800 метри слободен стил и во штафетните трки 4 x 200 слободен стил.
По Олимписките игри во Париз минатата година, Титмус изјави дека ќе земе една година пауза од натпреварите за да ги „наполни батериите“, па работеше како телевизиски коментатор за време на Светското првенство во Сингапур оваа година.
Сепак, само неколку месеци подоцна, Титмус одлучи да се пензионира.
„Ова е тешка одлука, но сум задоволна. Го сакам пливањето, тоа ми е страст уште од детството, но откако неодамна направив пауза од тренинзите, сфатив дека некои други работи во мојот живот станаа многу важни“, рече Титмус.
Титмус го имаше своето меѓународно деби на Светското првенство во 2019 година во Гвангжу кога ја освои титулата на 400 метри слободно со победа против најтрофејната пливачка на сите времиња, Американката Кејти Ледеки.
Нивното соперништво траеше до Игрите во Париз, каде што Титмус ја одбрани титулата олимписки победник во истата дисциплина во финалето, кое беше наречено „трка на векот“ бидејќи нејзини сопернички беа канадската сензација Самер Мекинтош, која освои сребро, и Ледеки, која мораше да се задоволи со бронза.
Покрај бројните освоени медали, Титмус е и актуелна светски рекордерка на 200 метри слободно со време од 1:52,23.
Спорт
Уапсен Лука Вилдоза

Необичен и скандалозен инцидент се случи синоќа откако Виртус Болоња го победи Монако (77:73), во четвртото коло, во Евролигата.
Плејмејкерот на италијанскиот клуб Лука Вилдоза и неговата сопруга Милица Тасиќ се уапсени под сомнение за напад врз медицинскиот персонал.
Според весникот „Ил Ресто дел Карлино“, сè започнало на улицата Калори, во непосредна близина на салата „Паладоца“, каде што амбулантно возило застанало за да ја запише адресата на следната интервенција.
Во тој момент, поминал автомобилот на аргентинскиот кошаркар, кој, фрустриран од возилото што делумно го блокирало патот, прво неколку пати сигнализирал со фаровите, а потоа го навредил медицинскиот персонал.
Инцидентот не завршил тука. Вилдоза и екипата на амбулантата повторно се сретнале на Виале Силвани, каде што возилото веќе било на должност со вклучени сирени и ротација.
Кошаркарот почнал да сопира и да прави маневри пред амбулантата, отежнувајќи го нејзиното движење. Кога медицинските лица застанале да го прашаат зошто се однесува така, ситуацијата ескалирала.
Вилдоза вербално ја нападнал екипата на брзата помош, обвинувајќи ги дека „го окупираат патот и си играат со телефонот“, а потоа физички нападнал и зграпчил една од медицинските сестри за вратот.
Виртус Болоња се уште не се огласиле по повод овој инцидент.