Спорт
Далас без Дончиќ падна во Мајами, Кливленд не знае за пораз на домашен терен

Кливленд Кавалирс против Торонто Репторс ја забележаа 17. победа во 18.натпревар сезонава. Кавалирс славеа над Репторс со 122:108.
Ова е десетта јубилејна победа за Кливленд на домашен терен. Кавалирс ја презедоа контролата од самиот старт и успеаја да одржат двоцифрена предност во поголемиот дел од натпреварот.
Исто така, ова е 18-ти натпревар сезонава во кој тие постигнаа повеќе од 100 поени. Донован Мичел доминираше со 26 поени, од кои 11 постигна во последната четвртина, со што дефинитивно ги згаснаа надежите на гостите за пресврт.
Тај Џером исто така уфрли 26 поени, додека Џерет Ален доминираше во рекетот со 23 поени и 13 скока.
На другата страна Торонто имаше шест кошаркари со двоцифрен број на поени: Скоти Барнс и Грејди Дик ги предводеа Репторс со по 18 поени, Џејлен Барет додаде 16.
Мајами Хит го победи Далас без Лука Дончиќ со 123:118. Мајами славеа по едно продолжение, кое со кош на четири секунди до крајот го избори Џими Батлер.
Батлер го одигра најдобриот меч од почетокот на сезоната со 33 поени, девет скока и шест асистенции. Одлична поддршка му дадоа Бем Адебајо со 19 поени и 11 скока и Тајлер Хиро со 18 поени и 10 скока. Кајри Ирвинг постигна 27 поени за Мавс (14 во последната четвртина), на кои се уште им недостасува Лука Дончиќ поради повреда на зглобот.
Во другите дуели, ЛА Клиперс ја декласираа сезнава очајна Филаделфија со 125:99 на гостински терен, додека Бруклин во Калифорнија го совлада Сакраменто Кингс со 108:103.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Македонија одржа час по ракомет во Естонија

Фото/ facebook.com/rfmofficial
Ракометната репрезентација на Македонија ја оправда фаворитската улога против Естонија, победи во Талин со 36:17, во претпоследното квалификациско коло за пласман на Европското првенство следната година.
Избраниците на Кире Лазаров во ниту еден момент немаа проблем со, според квалитетот, скромната домашна селекција.
Акумулираа девет голови предност по првиот дел (19:10), односно десет во второто полувреме, за најубедливата победа на гостински терен во историјата на националниот тим.
Блескаа голманите Митревски и Томовски, комбинираа 19 интервенции. Митревски во првиот дел одбрани седум, а Томовски во вториот 12 удари.
Стрелците ги предводеа Кузмановски со шест, однсоно Серафимов со пет гола.
На 11.мај, во Скопје, Македонија ќе ја пречека Литванија во последното коло. Со победа Македонија ќе избори пласман на континенталниот шампионат.
Спорт
Балде закрепна од повреда пред ел класико

Фудбалерот на Барселона, Алехандро Балде (21), се опорави од повреда и ќе се биде во конкуренција за натпреварот против Реал Мадрид во недела, објави шпанскиот спортски весник „АС“.
Балде го повреди левиот бутен мускул пред три недели, поради што го пропушти финалето на Купот на Кралот и победата од 3:2 над Реал Мадрид во продолженијата, како и двата натпревари од полуфиналето на Лигата на шампионите каде што Барселона беше елиминирана од Интер.
Според „АС“, Балде нема да биде во почетниот состав на Барселона во недела кога каталонскиот клуб ќе го пречека Реал Мадрид во 35-то коло од Ла Лига, но ќе му биде на располагање на тренерот Ханси Флик.
На четири кола до крајот на Ла Лига, Барселона го пречекува Реал Мадрид со четири бода предност и, доколку не загуби, ќе има отворен пат до освојување на титулата.
Балде одигра 42 натпревари за Барселона во сите натпреварувања оваа сезона, од кои 37 како стартер.
Спорт
Кеш и Дарвин Нуњез за Хулијан Алварез

Англискиот шампион Ливерпул се распрашува за најдобриот играч на Атлетико Мадрид оваа сезона, Хулијан Алварез. Аргентинецот минатото лето пристигна на „Метрополитано“ за сума од 75 милиони евра, плус 20 милиони што Манчестер сити може да ги добие преку потенцијалните бонуси.
Алварез досега одигра 51 натпревар за „јорганџиите“, постигна 27 голови и забележа пет асистенции.
Наводно, Ливерпул е подготвен да го испрати во Мадрид, Дарвин Нуњез и да доплати за да го обезбеди потписот на Алварез.