Фудбалерите на Арсенал синоќа со 2:0 славеа победа над Лестер во Лига купот. Микел Артета играше со комбиниран состав во кој немаше место за играчот кој зема најмногу пари во Арсенал, Месут Озил.

Токуму поранешниот германски репрезентативец бил тема на прес-конференцијата по натпреварот.

„Овој тим напредува, тоа можете да го видите и по тоа како делуваме на теренот. Ги бираме најдобрите играчи за кои мислиме дека најмногу ќе покажат на мечот што го играме“, рекол Артета и дополнил.

„Не му е тешко само на Озил, има и други играчи кои не играа во Премиер лигата, а не беа во тимот ниту вечерва. Имаме тим од 27 играчи, не можат сите да играат“.

Кошаркарите на Мајами хит се наоѓаат на чекор до пласман во големото финале во НБА-лигата. Мајами во четвртиот натпревар од финалната серија во Источната конференција славеше над Бостон селтикс со 112:109.

Четвртиот меч го обележа дебитантот Тајлер Хиро со 37 поени, шест скока и три асистенции. Хиро влезе во историјата на НБА-лигата како играч од клупата кој постигнал најмногу поени во плејофот.

Голема помош Хиро имаше во тројката Џими Батлер (24 поени), Горан Драгиќ (22 поени) и Бем Адебајо (20 поени, 12 скокови).

На спротивната страна се истакнаа Џејсон Тејтум со 28 поени, Џејлен Браун со 21 и Кемба Вокер со 20 пени.

Петтиот меч на програмата е в сабота наутро.

Луис Суарез официјално ќе стане играч на Атлетико Мадрид, потврди неговиот досегашен клуб Барселона. Официјалното збогување со клубот е закажано за 12:30 часот, а ден подоцна тој ќе биде претставен во новиот клуб.

Луис Суарез (33) по шест години заминува од Барселона. Иако имаше договор до крајот на сезоната, тој најде нов клуб бидејќи тренерот Роналд Куман му соопшти дека нема да му биде потребен во тимот.

Уругваецот на „Ноу камп“ пристигна во 2014 година од Ливерпул за сума од 82.000.000 евра. Веднаш се наметна како еден од најважните играчи во тимот, на 283 натпревари постигна 198 голови и забележал 109 асистенции.

Кариерата ја започнал во Насионал, а играл и во Гронинген и Ајакс.