Спорт
Дали некој плаќа за Дембеле да ја освои Златната топка?

Напаѓачот на Пари Сен Жермен, Усман Дембеле, одигра клучна улога во најуспешната сезона во клупската историја, во која „светците“ прв пат во историјата ја освоија Лигата на шампионите. Со 35 постигнати гола и 16 асистенции, тој беше движечката сила на тимот на Луис Енрике.
Благодарение на импресивната сезона, Дембеле се смета за еден од главните фаворити за освојување на „Златната топка“.
Малкумина би биле изненадени доколку на 22 септември во Париз, Дембеле не ја добие престижната награда.
Тинејџерската сензација Ламин Јамал и Мохамед Салах од Ливерпул се исто така во трката, но се чини дека некои Пи-ар агенции вложуваат дополнителен напор за да се осигурат дека Дембеле нема да остане во нивна сенка.
Сепак, автентичноста на е-поштата што беше објавена во јавноста, а која го фаворизира 28-годишниот Французин, сè уште не е потврдена.
Целата приказна ја започна Нил Гарднер, австралиски креатор на фудбалски содржини кого го следат повеќе од 120.000 луѓе на „X“. Тој тврди дека бил контактиран од неименувана агенција со предлог поврзан со кандидатурата на Дембеле.
Е-поштата сугерирала дека трена да објави три „внимателно изработени твитови неделно во текот на еден месец што би ги истакнале неговите перформанси, влијание и целокупниот аргумент за оваа награда“.
Сепак, автентичноста на оваа наводна кампања останува под знак прашалник, особено откако гласањето за најпрестижната индивидуална фудбалска награда заврши пред неколку недели.
Гарднер не го откри името на Пи-ар агенцијата или точното време кога ја добил понудата, но тврди дека ги одбил парите за да разоткрие можна корупција.
„Неодамна ми се обрати Пи-ар агенција да водам ПЛАТЕНА кампања во корист на кандидатурата на Дембеле за „Златната топка“. Не знам кој ја финансира, но мислам дека е апсолутно смешно и морав да ја подигнам свеста за тоа“, напиша тој во својата објава.
Свесен дека таквата објава може да му наштети на угледот, Гарднер ја бранеше својата одлука во коментарите. „Апсолутно сум свесен за последиците“, му одговори тој на еден критичар. „Ова беше УЖАСНА деловна одлука од моја страна, но погодете што? Не ми е гајле.“ Додаде: „Доволно сум привилегиран да бидам во позиција каде што можам, и сум одбил, илјадници долари. Тоа е тоа. Веќе живеам повеќе од добро.“
Foto/ EPA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Започна лошо, заврши супериорно – Спринтот во Малезија за Марко Бецеки

Возачот на Априлија, Марко Бецеки, славеше на спринт трката што се возеше во рамките на Големата награда на Индонезија, 18-та рунда од овогодинешното првенство во Мото ГП.
Италијанецот триумфираше на патеката „Мандалика“ по сензационалниот пробив, кој следеше по лошиот старт од пол-позицијата, и го спречи Фермин Алдегер да стане најмладиот победник во спринт.
На финишот, Алдегер заостана157 илјадити делови од секундата, а нему и на Бецеки им се придружи на подиумот возачот на Тракхаус, Раул Фернандес, кој го забележа најдобриот резултат во спринтот.
Новиот шампион Марк Маркез ја заврши трката на седмото место, по казната од долг круг, бидејќи на стартото го истурка Алекс Ринс од патеката. Другиот возач на Дукати, Франческо Бања, беше последен, 14-ти.
Од почетокот на тркачкиот викенд во Индонезија, Бецеки е незапирлив, но на самиот почеток од спринтот направи голема грешка, поради која се најде на осмата позиција. Алдегер водеше, пред Фернандес, Педро Акоста од КТМ Рејсинг, Лука Марини од Хонда и Алекс Маркез од Гресини.
Бецеки го започна веднаш својот пробив, кој кулминираше во последниот круг кога го мина Алдегер и на крајот прв ја мина целта.
Спорт
Ако не го победи Сандерленд, Аморим ќе лета од „Олд Трафорд“

Менаџерот на Манчестер Јунајтед, Рубен Аморм, ќе добие отказ доколку попладнево неговиот тим не забележи победа над Сандерленд.
Позицијата на Аморим во клубот не е сигурна, а дополнително се влоши по поразот од Бренфторд минатата недела. Поради тоа медиумите во Англија тврдат дека денешниот меч може да биде последен за Аморим на клупата на Јунајтед.
„Лошата игра и неуспехот против Брентфорд минатиот викенд го вклучија алармот кај клупските челници. Уште еден пораз би можел сериозно да го тестира трпението на ко-сопственикот Сер Џим Ратклиф и на Глејзерс. Отпуштањето на тренерот во првите 12 месеци од неговиот договор би го чинело Јунајтед дури 12.000.000 фунти, но сите индикации се дека овој факт нема да влијае на евентуалната одлука за негово отпуштање, со оглед на вложувањата“.
Самиот Аморим е свесен дека би можел да биде отпуштен ако нема поволен резултат против Сандерленд.
„Никој овде не е наивен. Разбирам дека ни требаат резултати за да го продолжиме проектот. Ако не ги добиеме, ќе стигнеме до точка на пресврт. Но, сето тоа не е важно. Ми треба уште еден натпревар, една победа, малку повеќе надеж… Не ми е важно, важен е само следниот натпревар. Она од што страдам се поразите, а не евентуалното губење на работата. Се плашиш дека ќе ја изгубиш работата кога треба да ги платиш сметките. Јас немам таков проблем.“
Спорт
Златан за 44-от роденден се почести со автомобил од четири милиони евра

Златан Ибрахимовиќ вчера го прослави 44-ти роденден, и како и секоја година, ја продолжи традицијата. Се почести со нов луксузен автомобил, а се пофали со својот избор на социјалните мрежи со пораката: „Среќен роденден Златан“, пишува „Aftonbladet“.
Неговата гаража е побогата за „Ferrari F80“, најновиот хиперавтомобил од Маранело.
Автомобилскиот експерт Матес Нилсон објаснува како ова бил логичен потег за познатиот фудбалер.
„Тој е апсолутно во право што го купи, па затоа неговата колекција од модерни ѕверови на „Ferrari“ е комплетна“, рече Нилсон.
Тој го опиша „F80“, како водечки автомобил на „Ferrari“ и наследник на легендарните модели „LaFerrari“ и „Enzo“.
„Тоа е супер спортски автомобил инспириран од Формула 1. Може да се каже дека е речиси Формула 1 автомобил за друмско возење“, додаде тој.
Произведени се само 799 примероци од овој модел, а може да го купат само одбрани и лојални клиенти на брендот.
Се шпекулира дека неговата цена достигнува околу четири милиони евра. Со хибридниот погон V6, автомобилот достигнува максимална брзина од 350 км/ч, а забрзува од 0 до 100 км/ч за само 2,15 секунди.
„Значи, тоа е вистински ѕвер. Еден од најбрзите автомобили во светот“, истакнува Нилсон.