Спорт
Дали Шарл Леклер е следната голема Ф1-ѕвезда?

Речиси совршената трка на Шарл Леклер на неделната трка во Бахреин, која заврши со солзи за возачот од Монако кога неговото Ферари остана без моќ, го промовира 21-годишниот поранешен возач на Заубер како најновата Ф1-ѕвезда, односно човек од кого се очекува да освојува титули.
Леклер беше најбрз речиси во сите сесии на патеката Сакир, ја освои пол-позицијата со удобна предност и беше на пат до лесна победа кога на 10 круга пред крајот се појавија проблеми со моторот. Луис Хамилтон во Мерцедес ја наследи победата, но петкратниот шампион и неговиот шеф Тото Волф беа импресионирани од тоа што го видоа од Леклер.
„Мислам дека видовме млад возач што набргу ќе биде шампион и кој беше емотивен победник во Бахреин. Најбрзиот човек и најбрзата машина“, изјави вчера Волф.
Леклер го замени светскиот шампион од 2007 година, ветеранот Кими Раиконен, на крајот на минатата сезона во неочекуван потег за Ферари, тим што обично повеќе смета на искусни возачи отколку на таленти. Најмладиот возач на Ферари од 1961 година покажа дека може да се справи со очекувањата и со притисокот.
Кумчето на поранешниот талент на Ферари, Жил Бјанки, Леклер, го загуби таткото во 2017 година пред Формула 2-трката во Баку, но тој остана смирен и победи од пол-позицијата.
„Многу импресивно. Знам многу возачи што го имаат лавот во себе и кои ќе реагираат поконтроверзно на тоа трето место. Но, Шарл не е таков“, вели Волф.
Sometimes, it is just not your day. Today it was not ours but I’m so proud of my team. They gave me an amazing car all week-end long and we’ll come back stronger, I’m sure ?
?: @motorsportpics1 pic.twitter.com/tlNAq7BHxt— Charles Leclerc (@Charles_Leclerc) March 31, 2019
Леклер, кој инаку е на иста возраст со уште еден талент, Макс Ферстапен во Ред бул, засега останува скромен.
„Во основа сум задоволен од викендот. Секогаш сакам да се фокусирам на негативните работи, така што има работи на кои можам да работам за да бидам подобар во иднина“, изјави скромно Леклер.
Трагедија за Леклер и Ферари во Бахреин – Мерцедес до „подарена“ 1-2 победа!
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
На 25-годишна возраст една од најдобрите пливачки замина во пензија

Една од најдобрите пливачки на денешницата, Австралијката Аријарне Титмус, изненадувачки објави дека ја завршува кариерата.
25-годишната Титмус освои осум олимписки медали, од кои четири златни, три сребрени и еден бронзен. Исто така таа е четирикратна светска шампионка. Најголемиот успех го постигна во дисциплината 400 метри слободен стил, дисциплина во која е двократна олимписка и светска шампионка, а освои и медали на 200 и 800 метри слободен стил и во штафетните трки 4 x 200 слободен стил.
По Олимписките игри во Париз минатата година, Титмус изјави дека ќе земе една година пауза од натпреварите за да ги „наполни батериите“, па работеше како телевизиски коментатор за време на Светското првенство во Сингапур оваа година.
Сепак, само неколку месеци подоцна, Титмус одлучи да се пензионира.
„Ова е тешка одлука, но сум задоволна. Го сакам пливањето, тоа ми е страст уште од детството, но откако неодамна направив пауза од тренинзите, сфатив дека некои други работи во мојот живот станаа многу важни“, рече Титмус.
Титмус го имаше своето меѓународно деби на Светското првенство во 2019 година во Гвангжу кога ја освои титулата на 400 метри слободно со победа против најтрофејната пливачка на сите времиња, Американката Кејти Ледеки.
Нивното соперништво траеше до Игрите во Париз, каде што Титмус ја одбрани титулата олимписки победник во истата дисциплина во финалето, кое беше наречено „трка на векот“ бидејќи нејзини сопернички беа канадската сензација Самер Мекинтош, која освои сребро, и Ледеки, која мораше да се задоволи со бронза.
Покрај бројните освоени медали, Титмус е и актуелна светски рекордерка на 200 метри слободно со време од 1:52,23.
Спорт
Уапсен Лука Вилдоза

Необичен и скандалозен инцидент се случи синоќа откако Виртус Болоња го победи Монако (77:73), во четвртото коло, во Евролигата.
Плејмејкерот на италијанскиот клуб Лука Вилдоза и неговата сопруга Милица Тасиќ се уапсени под сомнение за напад врз медицинскиот персонал.
Според весникот „Ил Ресто дел Карлино“, сè започнало на улицата Калори, во непосредна близина на салата „Паладоца“, каде што амбулантно возило застанало за да ја запише адресата на следната интервенција.
Во тој момент, поминал автомобилот на аргентинскиот кошаркар, кој, фрустриран од возилото што делумно го блокирало патот, прво неколку пати сигнализирал со фаровите, а потоа го навредил медицинскиот персонал.
Инцидентот не завршил тука. Вилдоза и екипата на амбулантата повторно се сретнале на Виале Силвани, каде што возилото веќе било на должност со вклучени сирени и ротација.
Кошаркарот почнал да сопира и да прави маневри пред амбулантата, отежнувајќи го нејзиното движење. Кога медицинските лица застанале да го прашаат зошто се однесува така, ситуацијата ескалирала.
Вилдоза вербално ја нападнал екипата на брзата помош, обвинувајќи ги дека „го окупираат патот и си играат со телефонот“, а потоа физички нападнал и зграпчил една од медицинските сестри за вратот.
Виртус Болоња се уште не се огласиле по повод овој инцидент.
Спорт
Индонезија му врачи отказ на Патрик Клајверт

Холандската фудбалска легенда Патрик Клајверт повеќе не е селектор на репрезентацијата на Индонезија.
По серијата лоши резултати во квалификациите за Светското првенство, Индонезиската фудбалска асоцијација одлучи да ја прекине соработката со некогаш познатиот напаѓач.
Клајверт ја презеде клупата на Индонезија во јануари оваа година, кога потпиша двегодишен договор. Главната цел беше да ја однесе репрезентацијата на нивното прво Светско првенство откако земјата стекна независност во 1945 година. Тој не успеа во тоа.
Иако Индонезија за прв пат под негово водство стигна до четвртото коло од азиските квалификации, надежите беа уништени минатата недела. Поразите против Саудиска Арабија и Ирак ги згаснаа сништата дека Индонезија ќе игра на својот прв Мундијал.
Неговата судбина беше запечатена со пораз од 1:0 од Ирак во Џеда во саботата. После тоа, Индонезиската фудбалска асоцијација не губеше време и веднаш договори спогодбен раскин на договорот со селекторот со Клајверт.
Единствениот значаен тренерски успех на Клајверт останува третото место на Светското првенство во 2014 година, кога му беше асистент на Луј ван Гал во холандската репрезентација.